Ginakonsiderar Niya ang Aton mga Limitasyon
Mangin Suod sa Dios
Ginakonsiderar Niya ang Aton mga Limitasyon
“GINHIMO ko na ang tanan pero daw may kulang pa.” Siling sang isa ka babayi nga nagatinguha nga mapahamut-an ang Dios. Ginaapresyar bala ni Jehova nga Dios ang pinakamaayo nga mahimo sang iya mga sumilimba? Ginakonsiderar bala niya ang ila mga limitasyon bangod sang ila kahimtangan? Para masabat ini nga mga pamangkot, binagbinagon naton ang ginasiling sang kasuguan parte sa paghalad nga ginhatag sang Dios kay Moises nga mabasa sa Levitico 5:2-11.
Suno sa Kasuguan, ginapatuman sang Dios ang lainlain nga halad para sa katumbasan sang sala. Ginsambit sa sini nga mga bersikulo nga ang isa ka tawo nakasala sing indi hungod. (Bersikulo 2-4) Kon mahibaluan niya nga nakasala sia, dapat sia magtu-ad kag magdala sing isa ka halad sa paglapas nga isa ka “cordero ukon kanding.” (Bersikulo 5, 6) Pero paano kon imol sia kag wala sing ihalad nga kordero ukon kanding? Nagsiling bala ang Kasuguan nga dapat gid sia manghulam sini nga sapat, amo nga malubong sia sa utang? Dapat gid bala sia maghimakas sa pagtrabaho para makabakal sini nga sapat, amo nga madugayan pa ang pagtumbas sang iya sala?
Ang Kasuguan nagsiling parte sa mahigugmaon nga konsiderasyon ni Jehova: “Apang kon indi sia makasarang sing isa ka cordero, niyan magdala sia sa GINOO sang iya halad-sa-paglapas tungud sa iya sala, sing duha ka tukmo ukon duha ka kuyabog nga salampati.” (Bersikulo 7) Ang mga tinaga nga “kon indi sia makasarang” nagapahangop nga ginabaton man sang Dios ang mga halad nga masarangan lang sang isa nga nakasala. Kon pigado gid ang isa ka Israelinhon kag indi makasarang maghalad sang kordero, ginabaton sang Dios ang iya masarangan nga amo lamang ang duha ka tukmo ukon duha ka salampati.
Kamusta naman kon indi pa gid niya masarangan ang paghalad sing duha ka pispis? Ang Kasuguan nagsiling: “Niyan magdala sia sang halad-tungud-sa-sala nga iya nahimo, nga ikapulo nga bahin sang efa [walo ukon siam ka tasa] sang harina nga mapino nga sa halad-tungud-sa-sala.” (Bersikulo 11) Para sa mga pigado gid, naghatag si Jehova sing konsiderasyon. Puede sila makahatag sing halad nga wala sing dugo para sa ila sala. * Sa Israel, bisan pigado ang isa, matumbasan gihapon niya ang iya sala kag matigayon ang maayo nga kaangtanan sa Dios.
Ano ang matun-an naton kay Jehova sa kasuguan parte sa halad tungod sa paglapas? Maluluy-on sia kag mahinangpanon nga Dios nga nagakonsiderar sa mga limitasyon sang iya mga sumilimba. (Salmo 103:14) Gusto niya nga magpalapit kita kag magtigayon sing maayo nga kaangtanan sa iya bisan pa sa mabudlay nga mga kahimtangan pareho sang pagtigulang, pagluya sang lawas, mga obligasyon sa pamilya, ukon iban pa nga obligasyon. Malugpayan gid kita bangod nahibaluan naton nga nalipay si Jehova nga Dios kon ginahimo naton ang tanan naton nga masarangan.
[Nota]
^ par. 4 Sa paghalad sang sapat, ang nagatumbas sa sala amo ang dugo sini, nga ginatamod sang Dios nga sagrado. (Levitico 17:11) Buot bala silingon nga ang paghalad sang harina wala sing balor? Indi. Ginapabaloran gid ni Jehova ang mapainubuson kag kinabubut-on nga paghalad. Isa pa, ang sala sang bug-os nga pungsod, lakip na ang sala sang mga imol, ginatumbasan sang dugo sang mga sapat nga ginahalad sa Dios sa Adlaw sang Katumbasan nga ginahiwat kada tuig.—Levitico 16:29, 30.
