May Nagaulikid Gid Bala sa Akon?

Nagaisahanon ka bala kag daw wala na sing madangpan? Nagabatyag ka bala nga daw wala sing nakaintiende sa imo mga problema? Kag bisan pa nahibal-an ini sang iban, pamatyag mo daw wala man sila gihapon nagaulikid sa imo.

KON may mag-abot nga mga problema, daw kaangay lang nga may bagyo sa aton kabuhi nga wala nagauntat. Kon kaisa, mahimo makasiling kita nga grabe kabug-at sang aton problema, kag daw indi na gid naton ini masarangan. Masami amo sini ang aton mabatyagan kon nagaantos kita sing mga trauma sa kabuhi, depresyon, nagabalikbalik nga balatian, mga sablag sa lawas nga resulta sang aksidente, kag iban pa. Mahimo magbatyag kita nga daw wala na gid sing madangpan ukon wala na sing paglaum. Kag mahimo mamangkot kita kon diin makakita sing lugpay. May nagaulikid gid bala sa akon?

Nagaulikid “ang Dios nga May Bug-os nga Paglugpay”

Ang Biblia nagasiling nga ang Dios isa ka “Amay nga may mapinalanggaon nga kaluoy kag . . . may bug-os nga paglugpay.” (2 Corinto 1:3) Ang Dios nga ang iya ngalan amo si Jehova nakahibalo nga kinahanglan naton ang paglugpay. Ginatos ka beses nga gingamit sang Biblia ang tinaga nga “paglugpay” sa lainlain nga paagi. Nagapasalig ini sa aton nga wala lamang nahangpan sang Dios ang aton mga ginaatubang nga problema kundi gusto man niya nga lugpayan kita. Nagapalig-on ini sa aton nga si Jehova nga Dios nagaulikid gid bisan pa ang iban daw wala nakatalupangod, nakahangop, ukon nagakabalaka sa aton kahimtangan.

Ang matuod, maathag nga ginapakita sang Biblia nga si Jehova nagaulikid gid sa iya katawhan subong mga indibiduwal. Ini nagasiling: “Ang mga mata sang GINOO yara sa tagsa ka duug, nga nagabantay sang malaut kag maayo.” (Hulubaton 15:3) Kaanggid man sini ang ginsiling sang Job 34:21: “Ang iya mga mata yara sa mga dalanon sang tawo, kag makita niya ang tanan niya nga tikang.” Nakita ni Jehova ang aton ginahimo, maayo man ini ukon malain, kag nahibaluan niya ang aton mga kahimtangan. Gani sarang niya mahimo kon ano ang nagakaigo para sa aton. Ginpamatud-an ini sa ginsiling sang isa ka manugpanan-aw ukon manalagna nga si Hanani kay Hari Asa sang Juda: “Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.”—2 Cronica 16:7, 9.

May isa pa ka rason kon ngaa padayon kita nga ginabantayan ni Jehova. Si Jesus nagsiling: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” (Juan 6:44) Ginausisa ni Jehova ang tagipusuon sang isa ka tawo para mahibal-an kon bala luyag niya nga makilala pa gid ang Dios. Kon luyag gid niya, buligan sia ni Jehova. Halimbawa, ang isa ka babayi sa Dominican Republic uloperahan bangod sa kanser. Nakitluoy sia sa Dios nga buligan sia nga makita ang matuod nga relihion. Wala madugay, gindalhan sia sang iya bana sing brosyur nga Ano ang Ginapatuman sang Dios sa Aton? * nga nabaton niya sa isa sa mga Saksi ni Jehova nga nagkadto sa ila balay sina nga aga. Ginbasa sang babayi ang brosyur kag narealisar niya nga amo ini ang sabat sang Dios sa iya pangamuyo. Nagtuon sia sa Biblia upod sa isa ka Saksi, kag wala pa mag-anom ka  bulan, gindedikar niya ang iya kabuhi sa Dios kag nagpabawtismo.

Sa libro sang Salmo, masapwan naton ang madamo nga makatalandog nga pinamulong sang Hebreo nga mga salmista kaangay ni Hari David parte sa mahigugmaon nga pag-atipan ni Jehova sa iya mga alagad. Sa Salmo 56:8, mabasa naton ang pagpakitluoy ni Hari David sa Dios: “Isulud sa imo suludlan ang akon mga luha! Wala bala sila sa imo tolon-an?” Sa sini nga pagpaanggid, ginpakita ni David nga wala lamang nahibaluan ni Jehova ang iya pag-antos kundi pati man ang epekto sini sa iya emosyon. Nahibaluan gid ni Jehova nga nagahibi si David bangod sang mga pag-antos kag kabudlayan nga iya naagyan. Matuod gid nga ang aton Manunuga nagaulikid sa tanan nga nagatinguha nga himuon ang iya kabubut-on. Sila ang mga tawo “nga may tagiposoon nga himpit ayon sa iya.”

Ang bantog nga Salmo 23 nagapakita man sang mahigugmaon nga pag-atipan sang Dios. Sa una nga mga tinaga sini nga salmo, ginpaanggid ang Dios sa isa ka mahigugmaon nga manugbantay sang karnero: “Ikaw GINOO amo ang akon manugbantay, gani indi ako pagkulangon.” (Ang Pulong sang Dios) Sa Middle East, ginaatipan sang manugbantay ang kada isa sang iya mga karnero, kag ginangalanan pa gani niya ang kada isa. Kada adlaw, ginatawag niya ang tagsa ka karnero, dayon ginahapulas ini kag ginatan-aw kon bala may mga pilas. Kon may makita sia nga pilas, ginabutangan niya ini sing lana ukon ointment para madali mag-ayo. Kon nagamasakit ang isa ka karnero, ginatingal niya ini dayon sing bulong kag ginaalay-ayan nga makatindog para indi ini magparumatay kag madayunan nga mapatay. Makapaumpaw gid ini nga paglaragway kon paano ginaatipan ni Jehova ang mga nagapalapit sa iya.

 Ang Pangamuyo kag Pagkabanhaw—Pamatuod sang Pag-ulikid sang Dios

Wala ginsulat ining matahom nga mga salmo para basahon lamang. Ginapakita sini kon paano ginpabutyag sang matutom nga mga alagad sang Dios sang una ang ila pagpangabay sing bulig kay Jehova kag ang ila pagpasalamat sa iya paggiya kag pagpakamaayo. Maathag man nga ginapakita sini nga nabatyagan gid nila ang pag-atipan sang Dios. Amo man sini ang aton mabatyagan sa Dios kon basahon kag pamalandungan naton ang ila tinagipusuon nga mga pagpabutyag. Ang pagpahanugot ni Jehova nga makapangamuyo kita sa iya isa gid ka maathag nga pamatuod nga nagaulikid sia sa aton.

Pero kon kaisa, grabe gid ang aton problema nga daw indi na kita makahibalo kon paano ini ipangamuyo. Bangod sini, indi na bala mahibaluan ni Jehova ang aton problema? Ang Roma 8:26 nagasiling: “Ang espiritu nagaupod man nga may bulig sa aton kaluyahon; kay ang palaligban amo nga wala kita makahibalo kon ano ang aton ipangamuyo subong dapat naton himuon, apang ang espiritu mismo nagapangabay para sa aton kon nagaugayong kita apang indi makabungat.” Ini nga bersikulo nagapakita nga ang balatyagon sang mga alagad sang Dios sang una sa ila pagpangamuyo mahimo kaanggid man sa aton balatyagon. Gani, bangod si Jehova amo ang isa nga “nagapamati sang pangamuyo,” makasalig gid kita nga magapamati sia sa aton.—Salmo 65:2.

Ang paglaum sa pagkabanhaw isa man ka pamatuod nga nagaulikid ang Dios sa kada isa sa aton. Si Jesucristo nagsiling: “Magaabot ang tion nga ang tanan nga yara sa handumanan nga mga lulubngan makabati sang iya [Jesus] tingog kag magagua.” (Juan 5:28, 29) Ang Griegong tinaga nga gingamit diri gin-translate indi lamang “lulubngan” kundi “handumanan nga lulubngan.” Ginapakita sini nga ginadumdom sang Dios kon ano nga sahi sang tawo ang isa sang buhi pa sia.

Hunahunaa lang, kon banhawon sang Dios ang isa ka tawo, kinahanglan nga dumdumon niya ang tanan nga butang parte sa iya lakip na kon ano ang iya hitsura, napanubli nga mga kinaiya, kag ang iya bug-os nga memorya! (Marcos 10:27) Indi gid malipatan sang Dios ang tanan nga butang parte sa isa ka tawo bisan pa magligad ang linibo ka tuig. (Job 14:13-15; Lucas 20:38) Gani, ang bug-os nga detalye sang binilyon ka tawo nga napatay yara sa memorya ni Jehova nga Dios. Pamatuod gid ini nga nagaulikid ang Dios sa kada isa sa aton!

Si Jehova Nagapadya

Ano ang himuon naton para matigayon ang pag-ulikid sang Dios? Una sa tanan, dapat ipakita naton nga nagasalig kita, nagatuman, kag nagatuo sa iya. Ginpakita ni apostol Pablo nga importante ang pagtuo para matigayon ang pag-ulikid sang Dios. Sia nagsiling: “Kon wala sing pagtuo imposible nga mapahamut-an gid sia, kay ang nagapalapit sa Dios dapat magpati nga nagaluntad sia kag ginapadyaan niya ang mga nagapangita sa iya sing hanuot.”—Hebreo 11:6.

Talupangda nga may duha ka bahin ang pagtuo nga nagapahamuot sa Dios. Una, dapat kita “magpati nga nagaluntad” ang Dios kag sia ang aton Supremo nga Manuggahom nga dapat gid tumanon kag simbahon. Ikaduha, dapat kita magpati nga “ginapadyaan niya ang mga nagapangita sa iya sing hanuot.” Buot silingon, ang matuod nga pagtuo amo ang pagpati nga interesado gid ang Dios sa kaayuhan sang tanan nga nagatinguha nga tumanon ang iya kabubut-on kag padyaan niya sila. Paagi sa pagtuon sa Pulong sang Dios kag pagpakig-upod sa mga nagatuman sa iya, matigayon mo man ang pagtuo nga nagadala sing padya kag pag-ulikid sang Dios.

Madamo nga tawo karon ang nagapati nga indi interesado ang Dios sa ginahimo sang mga tawo. Pero maathag nga ginapakita sang Biblia nga ginaulikdan gid sang Dios ang nagapakita sing matuod nga pagtuo sa iya. Bisan pa ang kabuhi subong puno sing kalisod, kabalaka, kapaslawan, kag kasakit, indi kita dapat madulaan sing paglaum. Nagaulikid gid si Jehova nga Dios. Ang matuod, ginaagda pa niya kita nga mangayo sing bulig sa iya. “Itugyan sa GINOO ang imo mga palaligban, kay atipanon niya ikaw,” siling sang salmista. “Indi niya pagpabay-an ang mga matarong hasta san-o.”—Salmo 55:22, APD.

[Nota]

[Kahon/Retrato sa pahina 29]

Mga Teksto nga Makapabakod sang Imo Pagtuo sa Mahigugmaon nga Pag-ulikid sang Dios

“Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.”—2 CRONICA 16:9

“Isulud sa imo suludlan ang akon mga luha! Wala bala sila sa imo tolon-an?”—SALMO 56:8

“Ikaw, GINOO, amo ang akon manugbantay, gani indi ako pagkulangon.”—SALMO 23:1, APD

“O ikaw nga nagapamati sang pangamuyo! Sa imo magakari ang tanan nga unud.”—SALMO 65:2

“Magapanawag ka, kag ako magasabat sa imo; magahandum ka sa binuhatan sang imo mga kamut.”—JOB 14:15

“Ang nagapalapit sa Dios dapat magpati nga nagaluntad sia kag ginapadyaan niya ang mga nagapangita sa iya sing hanuot.”—HEBREO 11:6

“Itugyan sa GINOO ang imo mga palaligban, kay atipanon niya ikaw. Indi niya pagpabay-an ang mga matarong hasta san-o.”—SALMO 55:22, APD