Nagabag-o Bala ang Pensar sang Dios?

ANG Biblia nagasiling parte sa Dios: “Sa iya wala sing pagbag-o subong sang pagbag-obag-o sang landong.” Kag masaligan gid naton ang iya ginsiling: “Ako nga GINOO wala nagabaylo.” (Santiago 1:17; Malaquias 3:6) Tuhay gid si Jehova kon ipaanggid sa mga tawo nga mabudlay pahamut-an kag indi masaligan bangod nagabag-obag-o pirme ang ila pensar!

Pero, ang pila ka tawo nga nagabasa sang Biblia nagapamangkot kon bala nagabag-o ang pensar sang Dios. Halimbawa, ginhatagan sadto ni Jehova nga Dios ang mga Cristiano sing gahom para maghimo sing mga milagro, pero wala na niya ini ginahimo subong. Sang dumaan nga panahon, ginpasugtan sang Dios ang poligamya ukon ang pagpangasawa sing madamo, pero wala na niya ini ginatugutan subong. Sa kasuguan nga ginhatag sang Dios kay Moises, ginpatuman ni Jehova ang Adlaw nga Inugpahuway, pero wala na niya ini ginapatuman subong. Ini bala nga mga halimbawa nagapakita nga nagabag-o ang pensar sang Dios?

Una, mapat-od naton nga wala ginabag-o sang Dios ang iya talaksan sa gugma kag hustisya. Isa pa, wala nagbag-o ang iya “dayon nga katuyuan” nga pakamaayuhon ang mga tawo paagi sa iya Ginharian. (Efeso 3:11) Pero, nagabag-o ang pagpakig-angot ni Jehova bangod sa nagabag-o nga kahimtangan, pareho man sa pagbag-o sang imo pagtamod sa isa ka tawo nga pirme nagapaslaw sa imo.

Ginabag-o man sang Dios ang iya mga instruksion sa iya katawhan depende sa ila sitwasyon kag mga kinahanglanon. Indi ini mabudlay hangpon. Halimbawa, ano sa banta mo ang himuon sang isa ka maayo nga tour guide kon makita niya nga delikado ang alagyan sa unhan? Sigurado gid nga hambalan niya ang iya mga gina-tour nga maagi sila sa iban nga alagyan para malikawan ang katalagman. Pero, indi buot silingon nga nagbag-o  ang pensar sang tour guide sa ila ginaplano nga kadtuan, indi bala? Gani, usisaon naton ang tatlo ka halimbawa nga ginsambit kaina nga nagapalibog sa iban.

Ngaa Wala na sing mga Milagro Subong?

Ngaa ginhatagan sang Dios ang mga Cristiano sang unang siglo sing gahom para maghimo sing mga milagro? Mahimo nahibaluan mo nga ang Israel isa ka pungsod nga pinili sang Dios sadto. Gingamit sang Dios ang mga milagro bilang pasalig sa mga Israelinhon nga kaupod nila ang Dios. Paagi kay Moises, ginpakita sang Dios ang iya daku nga gahom sang ginluwas niya ang Israel halin sa Egipto kag gingiyahan sila sa desyerto pakadto sa Ginsaad nga Duta. Makapasubo nga madamo nga beses nga wala nagtuo ang mga Israelinhon sa Dios. Sang ginsikway sang ulihi ni Jehova ang Israel kag gintukod ang Cristianong kongregasyon, ginhatagan niya ang mga apostoles kag ang iban pa sing gahom sa paghimo sing mga milagro. Halimbawa, gin-ayo nanday apostol Pedro kag Juan ang isa ka lupog halin sa pagkabun-ag, kag ginbanhaw man ni Pablo ang patay. (Binuhatan 3:2-8; 20:9-11) Ang mga milagro nga ila ginhimo nakabulig agod matukod ang Cristianismo sa madamo nga lugar. Pero, ngaa wala na subong sing mga milagro?

Ginsabat ini ni apostol Pablo paagi sa isa ka ilustrasyon: “Sang bata pa ako, nagahambal ako subong sang bata, nagahunahuna subong sang bata, nagapangatarungan subong sang bata; apang karon nga hamtong na ako nga tawo, gindula ko na ang mga batasan sang bata.” (1 Corinto 13:11) Ang pagtratar sang mga ginikanan sa iya gamay nga bata lain na kon magdaku na ini. Sing kaanggid, nagbag-o man ang pagpakig-angot ni Jehova sa Cristianong kongregasyon sang indi na ini “bata.” Ginpaathag ni apostol Pablo nga ang ginhatag sa ila sang Dios nga mga gahom pareho sang paghambal sang lain nga mga lenguahe kag pagsugid sang matabo sa palaabuton, “madula” na sa ulihi.—1 Corinto 13:8.

Ngaa Gintugutan Anay ang Poligamya?

Ginpakita ni Jesus nga naghatag ang Dios sing talaksan para sa pag-asawahay sang ginsilingan Niya ang una nga mag-asawa: “Bangod sini bayaan sang lalaki ang iya amay kag ang iya iloy kag magahiusa sa iya asawa, kag ang duha mangin isa ka unod.” (Mateo 19:5) Ang pag-asawahay isa ka permanente nga kaangtanan sang lalaki kag babayi. Pero, sang tion nga gin-organisar sang Dios ang Israel subong isa ka pungsod kag ginhatagan niya ang mga Israelinhon sing Kasuguan, nangin kinaandan na ang poligamya. Gani, bisan pa indi ini bahin sang katuyuan sang Dios, naghatag sia sing kasuguan para kontrolon ini. Sang gintukod ang Cristianong kongregasyon, maathag nga gindumilian na sa Pulong sang Dios ang poligamya.—1 Timoteo 3:2.

May pila ka butang nga ginatugutan si Jehova nga Dios asta mag-abot ang husto nga tion nga tadlungon na niya ini. (Roma 9:22-24) Ginpakita ni Jesus nga temporaryo nga ginpasugtan ni Jehova ang sala nga mga kinabatasan sa pag-asawahay. ‘Gintugutan’ ini sang Dios bangod sa “katig-a sang tagipusuon” sang Israel.—Mateo 19:8; Hulubaton 4:18.

Ngaa Temporaryo Lamang ang Adlaw nga Inugpahuway?

Sa tapos ginluwas sang Dios ang mga Israelinhon sa Egipto, nagsugo sia nga saulugon ang Adlaw  nga Inugpahuway kada semana. Sang ulihi, nangin bahin ini sang Kasuguan sang pungsod sang Israel. (Exodo 16:22-30; 20:8-10) Ginpaathag ni apostol Pablo nga ginhalad ni Jesus ang iya kaugalingon kag “gindula . . . ang Kasuguan nga nagalakip sang mga sugo kag mga mando” kag “ginpanas [niya] ang ginsulat sang kamot nga dokumento.” (Efeso 2:15; Colosas 2:14) Ang kasuguan parte sa Adlaw nga Inugpahuway nalakip sa “gindula” kag “ginpanas” kay ang Biblia padayon nga nagasiling: “Gani wala sing tawo nga maghukom sa inyo sa pagkaon kag sa pag-inom ukon may kaangtanan sa kapiestahan ukon sa pagsaulog sa lati ukon sa adlaw nga inugpahuway.” (Colosas 2:16) Kon amo, ngaa naghatag pa ang Dios sing kasuguan parte sa Adlaw nga Inugpahuway?

Si apostol Pablo nagsulat: “Ang Kasuguan nangin manunudlo naton nga nagadul-ong sa aton kay Cristo.” Dayon nagsiling pa sia: “Apang karon nga nag-abot na ang pagtuo, wala na kita sa idalom sang isa ka manunudlo.” (Galacia 3:24, 25) Sa baylo nga hunahunaon nga nagbag-o ang pensar sang Dios, gingamit niya sing temporaryo ang Adlaw nga Inugpahuway para tudluan ang mga tawo nga hatagan pirme sing tion ang pagpamalandong sa espirituwal nga mga butang. Bisan pa temporaryo lang ang kasuguan parte sa Adlaw nga Inugpahuway, ginapakita sini nga matigayon sa ulihi sang mga tawo ang kapahuwayan sa tanan nga pag-antos sa pisikal kag espirituwal.—Hebreo 4:10; Bugna 21:1-4.

Isa ka Masaligan kag Mahigugmaon nga Dios

Ang mga halimbawa sa Biblia nga bag-o lang ginbinagbinag nagapakita nga naghatag si Jehova nga Dios sing lainlain nga instruksion sa lainlain nga kahimtangan. Pero indi buot silingon sini nga nagabag-o ang iya pensar. Ginahatag lamang niya ang kinahanglanon sang iya katawhan depende sa ila kahimtangan kag ginahimo niya ini para sa ila kaayuhan. Amo man sini ang ginahimo niya subong.

Wala gid ginabag-o ni Jehova ang iya mga talaksan, gani nakahibalo gid kita pirme kon ano dapat ang aton himuon para mapahamut-an sia. Dugang pa, mapat-od naton nga matuman gid ang tanan nga ginsaad sang Dios. Si Jehova nagsiling: “Himoon ko ang tanan ko nga luyag . . . Ginboko ko, kag himoon ko man ini.”—Isaias 46:10, 11.

[Blurb sa pahina 21]

Wala ginabag-o sang Dios ang iya talaksan sa gugma kag hustisya

[Blurb sa pahina 22]

Ginpaathag ni Pablo nga ang gahom nga ginhatag sang Dios sa paghimo sang mga milagro “madula” sa ulihi

[Blurb sa pahina 23]

Ang pag-asawahay isa ka permanente nga kaangtanan sang lalaki kag babayi