Pagpangita sing Mapuslanon nga Laygay

KON nagapangita ka sing laygay, madamo ka sing makita. Isa na karon ka matin-ad nga negosyo ang pagbaligya sang self-help nga mga libro kag mga video nga nagahatag sing laygay sa isa ka topiko. Sa lainlain nga lugar kaangay sang Britanya, Latin Amerika, Japan, kag Estados Unidos, ang self-help nga mga libro amo ang pinakamabakal. Ang mga video, seminar, kag mga programa sa TV nga nagahatag sing laygay nangin popular man. Ginapakita sini nga mga libro nga masolbar mo ang imo problema bisan indi ka na mangayo sing laygay sa isa ka psychologist, marriage counselor, ukon ministro. Ano nga mga topiko ang ginabinagbinag sini nga mga libro, video kag iban pa?

Lakip sa popular nga mga topiko nga ila ginabinagbinag amo ang paglab-ot sa imo handum, pagpangita sing palangasaw-on ukon palamanhon, kag pagpadaku sa kabataan. Ang iban pa nga kinaandan nga topiko amo ang pag-atubang sa depresyon, kasubo, kag ang mga epekto sang pagdiborsio. Gusto man sang madamo nga tawo ang mga laygay kon paano masolusyunan ang sobra nga pagkaon, pagpanigarilyo, kag sobra nga pag-inom. Mapuslanon bala ini nga mga laygay? Huo, mapuslanon ini kon kaisa, pero indi gid pirme. Gani, maalamon nga binagbinagon ang paandam sang Biblia: “Ang buangboang nagapati sang bisan ano, Pero ang maalam nga tawo nagaandam sang iya kaugalingon nga tikang.”—Hulubaton 14:15, Maayong Balita nga Biblia.

Ang self-help nga mga libro lain gid kon ipaanggid sa mga manual nga nagatudlo sang photography, accounting, lenguahe, kag iban pa. Ang mga manual mahimo nga epektibo kag barato sa baylo nga magkuha sing malawig kag magasto nga kurso. Sa pihak nga bahin, ang self-help nga mga libro masami nagatudlo sang mga pilosopiya sang tawo parte sa negosyo, pag-asawahay, pagpadaku sang bata, ukon mental nga kapagros. Gani maalamon gid nga mamangkot: ‘Sin-o ang nagahatag sini nga laygay? Diin niya ginbase ang iya impormasyon?’

Ang opinyon sang mga eksperto nga nagahatag sini nga laygay mahimo wala nabase sa napamatud-an na nga mga butang. Ang pila sa ila mahimo maghatag sing laygay nga makaganyat sa mga  tawo, bangod nahibaluan nila nga daku ang ila maganar kon isugid nila ang mga butang nga gusto lang mabatian sang mga tawo. Bilang pamatuod, sa isa lamang ka pungsod, ang self-help nga industriya nagaganar sing sobra sa walo ka bilyon ka dolyar kada tuig!

Daw Ano ka Mapuslanon ang Self-Help nga mga Laygay?

Mahimo makasiling ka nga ini nga mga laygay mapuslanon gid. Pero kon kaisa, hapaw ukon teoriya lamang ini. Sa masami, ini nga mga laygay daw nagasiling sa imo: ‘Kon positibo ka lang, magamadinalag-on ka gid. Bisan ano man ang gusto mo—kuarta, ikaayong lawas, ukon malipayon nga relasyon—matigayon mo ini kon positibo ka.’ Mapuslanon bala ini nga laygay? Makabulig bala ini sa imo nga maatubang ang realidad kag mga kapaslawan sa kabuhi?

Halimbawa, popular gid ang mga libro parte sa pagpakig-angot sa lainlain nga tawo kag ang mga libro parte sa pag-asawahay. Ang mga laygay bala sa sini nga mga libro makabulig sa mga tawo para mangin malipayon kag mabakod ang ila pamilya? Indi sa tanan nga tion. Suno sa isa ka reviewer, ang awtor sang self-help nga libro parte sa paghigugma “nagagiya sa mga bumalasa kon paano matigayon ang maayo nga relasyon kag pagsalig sa kaugalingon.” Ini nga libro nangin mabakal sa Latin Amerika. Ang awtor sini nagsiling nga kon magpabilin ka sa isa ka relasyon nga indi ka man malipayon, daw pareho lang nga ginadaya mo ang imo kaugalingon. Ginapahangop sini nga dapat himuon sang isa ang butang nga makapaayo lang sa iya kaugalingon, sa baylo nga hibaluon kon ano gid ang problema kag solbaron ini.

Matuod maayo man ang pila ka self-help nga mga laygay. Pero, ang iban nga laygay sini mahimo man makapalain. Halimbawa, ang isa ka eksperto mahimo maghatag sing mapuslanon nga laygay sa isa ka topiko, pero makapalain naman ang iya laygay sa isa naman ka topiko. Imposible gid nga makakuha sing maayo nga laygay sa sining madamo, kag masami nagakontrahanay nga mga opinyon. Diin sini nga mga laygay ang masaligan mo? Pamangkuta ang imo kaugalingon: ‘Nausisa bala sing maayo ini nga mga laygay, ukon opinyon lang ini sang awtor? Naimpluwensiahan bala ang awtor sing handum nga magmanggaranon kag magbantog?’

Ang Biblia napamatud-an na nga mapuslanon sa sulod sang malawig nga tion. Nagahatag ini sing mapuslanon nga laygay sa madamo nga topiko nga ginabinagbinag man sang self-help nga mga giya. Ang Biblia nagpahulag man sa minilyon ka tawo nga sundon ini nga laygay: “Magbag-o kamo sa puersa nga nagapahikot sa inyo hunahuna, kag magsuklob sang bag-o nga personalidad.” (Efeso 4:23, 24) Ang Biblia nagahatag sing kasanagan kon ano ang kabangdanan sang aton mga problema kag nagatudlo sa aton kon paano ini masolbar. Labaw sa tanan, nagahatag ini sing makapakumbinsi kag mapuslanon nga laygay kon ngaa dapat himuon ang husto. Ipaathag ini sa masunod nga artikulo.