Pamangkot sang mga Bumalasa

Silot Bala sang Dios ang mga Kabudlayan sa Kabuhi?

Naghunahuna ka bala nga hungod ka nga ginpaantos sang Dios bangod sa masakit nga hitabo sa imo kabuhi? Halimbawa, ang gulpi lang nga pagbalatian, pagkadis-ebol bangod sa aksidente, ukon ang wala ginapaabot nga kamatayon sang isa ka miembro sang pamilya mahimo magpahunahuna sa aton nga ginpili gid kita sang Dios para silutan.

Pero ang matuod, makalulugpay nga luyag gid sang Dios nga magmalipayon ang mga tawo kag indi mahalitan. Napamatud-an ini sang gintuga sang Dios ang una nga mga tawo. Ginbutang niya sila sa “katamnan sang Eden,” nga isa ka paraiso, diin wala sing kabudlayan ang ila kabuhi.—Genesis 2:15.

Makapasubo nga ginsikway sang una nga mag-asawa ang ila maayo nga palaabuton kag hungod nga nagrebelde sa Dios. Malain gid ang resulta sini, indi lamang sa ila kundi sa ila man mga kaanakan, lakip sa aton. Ngaa? Ini nga kahimtangan mapaanggid naton sa amay sang isa ka pamilya nga wala magbayad sang arkila sa balay. Bangod sini, ang bug-os nga pamilya ginpahalin sa ila gin-istaran, amo nga binudlayan gid sila. Nangin kaangay man sini ang kahimtangan sang tanan nga katawhan sugod sang nagrebelde ang una nga mag-asawa. (Roma 5:12) Pila ka tuig pagkatapos sini, ang matarong nga tawo nga si Job nanganduhoy nga kon puede lang ‘timbangon’ ang iya kasakit kag pag-antos, “mabug-at pa ini sa balas sang mga dagat.”—Job 6:2, 3.

Ang isa pa ka kabangdanan sang mga kabudlayan amo ang limitado nga ihibalo. Halimbawa, ang isa ka nagapatindog sang mga subdibisyon nagpatukod sang mga balay sa lugar nga pirme lang may sunog. Bangod wala mo ini nahibal-an, ginbakal mo ang isa sa mga balay diri kag gin-istaran. Sa paghimo sini, indi bala nga ginbutang mo sa katalagman ang imo kabuhi kag sang imo pamilya? Indi mo gid masiling nga ginsilutan ka sang Dios kon may sunog nga matabo, indi bala? Ang Biblia nagsiling: “Ang kulangkulang nagapati sa tagsa ka polong, apang ang mahalongon nagatan-aw sa iya paglakat.”—Hulubaton 14:15.

Pero, makapaumpaw nga malapit na lang dulaon sang Dios ang aton ginaatubang nga mga kabudlayan. Kon mag-abot ina nga tion, indi mo na maeksperiensiahan, makit-an, ukon mabatian pa ang mga kabudlayan. Ang mga luha sang kasubo, kasakit, kamatayon, kag paglalaw “nagtaliwan na.” (Bugna 21:4) Makalilipay man ang saad nga ang mga tawo magatukod sing balay kag magapananom, kag indi na ini paggub-on sang mga inaway ukon kalamidad. Sa baylo, ‘makapanginpulos’ gid sila sa hinimuan sang ila kamot.—Isaias 65:21-25, APD.

Samtang ginahulat mo nga dulaon sang Dios sing bug-os ang kabudlayan, ano ang himuon mo subong para mapahaganhagan ang epekto sini? Una sa tanan, ‘indi magsandig sa imo kaugalingon nga paghangup,’ siling sang Biblia, kundi ‘magsalig sa GINOO sa bug-os mo nga tagiposoon.’ (Hulubaton 3:5) Pangabaya ang Dios nga giyahan ka kag lugpayan. Magtuon sa kaalam sang Dios nga mabasa sa Biblia. Makabulig ini sa imo nga makadesisyon sing husto kag malikawan mo ang mga problema nga mahimo magresulta sing mga kabudlayan.—Hulubaton 22:3.