Maintiendihan Ayhan ang Biblia?

“Kada Domingo, ang amon pamilya nagabasa sing Biblia. Pero daw wala ako nanamian sini. Bisan nagapati ako nga ang Biblia Pulong sang Dios, madamo sang akon ginbasa ang wala ko naintiendihan.”—Steven, Britanya.

“Sang 17 anyos ako, gintilawan ko nga basahon ang Biblia, pero gin-untatan ko ini kay daw kabudlay intiendihon.”—Valvanera, Espanya.

“Ginbasa ko na anay ang Biblia kay para sa akon, subong isa ka Katoliko, dapat ko gid ini basahon. Natapos ko ini sa sulod sang tatlo ka tuig! Pero daw wala gid ako sing naintiendihan.”—Jo-Anne, Australia.

ANG Biblia amo gihapon ang pinakabantog nga libro sa kalibutan. Amo ini ang pinakamabakal sa tanan nga libro. Matigayon man ini sa madamo nga lenguahe, kag bisan sa audio tape, video tape, CD, kag DVD. Pero, madamo nga tawo nga may Biblia ang indi makaintiende sini. Nabudlayan ka man bala nga intiendihon ang Biblia?

Gusto Bala sang Dios nga Maintiendihan Mo ang Iya Pulong?

“Ang pagsulat sa bug-os nga Kasulatan gintuytuyan sang Dios,” siling sang Biblia. (2 Timoteo 3:16) Si Jehova nga Dios amo ang Awtor sang Biblia. Gusto bala niya nga maintiendihan naton ang iya Pulong? Ukon ginhungod gid niya nga mabudlay ini intiendihon sang kalabanan, kag ang makaintiende lang amo ang mga klero kag mga iskolar sa Biblia?

Binagbinaga ini nga mga bersikulo sa Biblia:

“Ining sogo nga ginasogo ko sa imo sining adlaw indi tama kabudlay sa imo, ukon malayo.”—Deuteronomio 30:11.

“Ang pagbukas sang imo mga polong nagahatag sing kapawa; nagahatag ini sing paghangup sa bunayag.”—Salmo 119:130.

“Sa amo gid nga tion napuno [si Jesus] sing kalipay kag balaan nga espiritu kag nagsiling: ‘Nagadayaw ako sing dayag sa imo, Amay, Ginuo sang langit kag duta, bangod gintago mo sing maayo ini nga mga butang gikan sa mga maalam kag mga intelihente, kag ginpahayag ini sa gamay nga mga bata.’”—Lucas 10:21.

Gusto gid sang Awtor sang Biblia nga maintiendihan mo ang iya Pulong! Pero, madamo nga sinsero nga tawo ang nabudlayan sa pag-intiende sini. Ano ang makabulig sa ila? Ang masunod nga artikulo nagahatag sing tatlo ka suhestyon nga makabulig para maintiendihan ang Biblia.