Ang Manugtuman sang mga Promisa
Mangin Suod sa Dios
Ang Manugtuman sang mga Promisa
NABUDLAYAN ka bala magsalig sa iban? Sa aton tion subong, permi na lang nagakaguba ang pagsalig. Kon naglain ang imo buot bangod ang tawo nga imo ginasaligan nagbinutig ukon wala nagtuman sang iya ginpromisa sa imo, mahimo nga madula na ang imo pagsalig sa iya. Pero, may isa nga puede mo saligan kag indi ka gid niya pagpaslawon. “Salig [kay Jehova] sa bug-os mo nga tagiposoon,” siling sang Hulubaton 3:5. Ngaa masaligan gid naton si Jehova? Para masabat ini, usisaon naton ang ginsiling ni Josue, ang tawo nga nagsalig gid kay Jehova. Mabasa ini sa Josue 23:14.
Binagbinaga ini nga hitabo: Si Josue nga nagbulos kay Moises subong lider sang Israel, mga 110 anyos na. Sa bug-os niya nga kabuhi, nasaksihan niya ang madamo nga milagro ni Jehova para sa Israel, pati na ang pagluwas sa ila sa Pula nga Dagat, mga 60 na ka tuig ang nagligad. Karon, samtang ginapanumdom niya ang natabo sang una, ginpatawag niya “ang ila mga tigulang kag ang ila mga pangolo, ang ila mga hukom kag ang ila mga manugdumala.” (Josue 23:2) Ang iya mga pulong puno sing kaalam indi lamang bangod tigulang na sia, kundi bangod may ara sia daku nga pagtuo.
“Sa sini nga adlaw nagalakat ako sa dalanon sang bug-os nga duta,” siling ni Josue. Ang mga tinaga nga “sa dalanon sang bug-os nga duta” isa ka ekspresyon nga ginagamit para sa kamatayon. Daw subong bala nga nagasiling si Josue nga, “Indi na ako magdugay pa.” Nahibaluan niya nga dali na lang sia mapatay, gani pirme sia nagaisahanon kag nagapamalandong sa iya kabuhi. Ano ang iya pamilinbilin sa mga kaupod niya?
Nagsiling pa sia: “Wala sing isa ka butang nga nakulang sa tanan nga butang nga maayo nga ginpamolong nahanungud sa inyo sang GINOO nga inyo Dios; ang tanan nahanabu sa inyo, wala sing isa ka butang nga nakulang sa ila.” Amo ini ang ginhambal sang tawo nga may daku gid nga pagsalig sa Dios. Ngaa nasiling niya ini? Sang ginapanumdom niya ang tanan nga ginhimo ni Jehova, napamatud-an niya nga ginatuman gid ni Jehova ang iya mga saad. * Gusto ni Josue nga magsalig man sing bug-os ang mga Israelinhon nga tumanon gid ni Jehova ang tanan niya nga promisa sa ila sa palaabuton.
Ginkomentuhan sang isa ka reperensia sa Biblia ang Josue 23:14. Ini nagsiling: “Pangitaa ang tanan nga ginpromisa [sang Dios] sa Biblia, dayon usisaa ang rekord sang maragtas sang kalibutan; kag pamangkuta ang tanan nga tinuga kon may makita ka bisan isa lang ka pamatuod nga ginkalimtan ukon wala gintuman sang Dios ang iya promisa.” Kon masarangan naton ini himuon, sigurado nga pareho ang aton konklusion sa ginsiling ni Josue—ang mga promisa ni Jehova wala gid nagakapaslawan.—1 Hari 8:56; Isaias 55:10, 11.
Mabasa sa Biblia ang mga promisa sang Dios nga natuman na, pati na ang mga promisa nga nagakatuman sa aton mismo tion. Mabasa man naton diri ang matahom nga mga promisa ni Jehova sa palaabuton. * Usisaa bala ang Biblia para mapamatud-an mo nga masaligan gid ang Manugtuman sang mga promisa.
[Mga Nota]
^ par. 4 Amo ini ang pila sa mga promisa nga nakita ni Josue nga natuman. Hatagan ni Jehova ang Israel sang ila kaugalingon nga duta. (Ipaanggid ang Genesis 12:7 sa Josue 11:23.) Hilwayon ni Jehova ang Israel sa pagkaulipon sa Egipto. (Ipaanggid ang Exodo 3:8 sa Exodo 12:29-32.) Amanan ni Jehova ang iya katawhan sang ila mga kinahanglanon.—Ipaanggid ang Exodo 16:4, 13-15 sa Deuteronomio 8:3, 4.
^ par. 6 Para sa dugang nga impormasyon parte sa mga promisa sang Dios sa palaabuton, tan-awa ang kapitulo 3, 7, kag 8 sang libro nga Ano Gid ang Ginatudlo sang Biblia? nga ginbalhag sang mga Saksi ni Jehova.
