Ano ang Pagtamod sang Dios sa Alkohol?

LUYAG sang aton Manunuga ang pinakamaayo para sa aton kag wala niya ginadumili ang haganhagan nga pag-inom. * Naghatag pa gani sia sing “alak nga nagapasadya sang tagiposoon sang tawo, lana nga nagapakanaw sang iya nawung, kag tinapay nga nagapabakud.” (Salmo 104:15) Isa ka bes, ginhimo ni Jesucristo ang tubig nga “maayong alak,” amo nga nangin masadya ang isa ka kasal.—Juan 2:3-10, Ang Biblia.

Nahibaluan gid sang Manunuga kon ano ang epekto sang alkohol sa aton lawas kag utok. Paagi sa Biblia, ginpaandaman kita sang aton Amay nga indi magpasobra sa pag-inom sang makahulubog nga ilimnon. ‘Ginatudlo niya ini para sa aton kapuslanan.’ (Isaias 48:17) Talupangda ini nga mga paandam:

“Indi kamo magpahubog, kay ini pagpatuyang lang sang inyo kabuhi.” (Efeso 5:18, Ang Pulong sang Dios) Ang “mga palahobog . . . indi makapanubli sang ginharian sang Dios.” (1 Corinto 6:9-11, Ang Biblia) Ginapakamalaut man sang Pulong sang Dios ang “paghoboghobog, magansal nga kinalipay, kag ang [mga butang] kaangay sini.”—Galacia 5:19-21, Ang Biblia.

Binagbinagon naton subong ang malain nga epekto sang pagpahubog.

Malain nga Epekto sang Pagpahubog

May mga bentaha man ang alkohol, pero may makusog ini nga mga ingrediente nga makaapektar sa aton lawas kag hunahuna. Ang sobra nga pag-inom mahimo magresulta sa masunod nga mga problema:

Maapektuhan sini ang aton desisyon, gani ‘indi kita makahunahuna sing maayo.’ (Hulubaton 23:33, APD) Si Allen, nga ginsambit sa una nga artikulo, nagsiling: “Ang pagpahubog  indi lamang balatian sang lawas kundi pati na sang hunahuna kag panimuot. Indi mo na mapamensaran ang malain nga epekto sini sa iban.”

Madula naton ang pagpugong sa kaugalingon. Ang Biblia nagpaandam: “Ang alak kag ang bag-o nga alak nagakuha sang paghangup.” (Oseas 4:11) Paano? Kon mahubog kita, mahimo naton ang mga ginahunahuna kag mga ginahandum naton nga sang una ginapunggan pa naton. Gani, magaluya ang aton determinasyon nga himuon ang maayo kag maguba ang aton kaangtanan sa Dios.

Halimbawa, sa tapos sila magbaisay sang iya asawa, nagkadto si John sa isa ka bar. Nag-inom sia sang pila ka botelya para magkalma. Dugaydugay, ginpalapitan sia sang isa ka babayi. Pagkatapos nga naubos niya ang pila pa ka botelya, nagua sila sang babayi kag may natabo sa ila. Naghinulsol gid sia nga nahimo niya ang butang nga indi gid niya tani mahimo kon indi sia hubog.

Indi naton makontrol ang aton ginahambal kag ginahimo. “Sin-o ang tawo nga miserable, nagapangaway, nagareklamo?” pamangkot sang Biblia. “Siya amo ang tawo nga palahubog, nga mahilig magtilaw sang sari-sari nga ilimnon.” (Hulubaton 23:29, 30, APD) Kon hubog ka, “pamatyag mo daw ara ka sa tunga sang lawod nga nagahigda sa ibabaw sang palo sang barko. Magasiling ka, ‘May naglampos kag nagsumbag sa akon, pero wala lang ako kabatyag.’”—Hulubaton 23: 34, 35, APD.

Makahatag sing balatian. “Sa katapusan nagakagat [ang alkohol] kaangay sang man-ug, kag nagakutut kaangay sang dalitan nga man-ug.” (Hulubaton 23:32) Napamatud-an sang medisina nga husto ini nga hulubaton. Makahililo gid ang sobra nga pag-inom sing alkohol. Magaresulta ini sa kanser, hepatitis, cirrhosis sa atay, balatian sa pancreas, pagnubo sing blood sugar sang mga may diabetes, istrok, balatian sa tagipusuon, pagbun-ag sing lapsag nga may diperensia, kag madamo pa. Mahimo pa gani nga ma-coma ukon mapatay ang isa sa sobra-sobra nga pag-inom sa isa lang ka tion. Pero, ang pinakagrabe nga halit sini indi naton mabasahan sa mga libro sang medisina.

Ang Pinakagrabe nga Halit sang Pagpahubog. Bisan ang isa indi pa mahubog, ang sobra nga pag-inom makahalalit sa espirituwal. Ang Biblia nagsiling: “Kaluluoy kamo nga aga pa nga nagabangon agod magsugod sa pag-inom, kag hasta sa gab-i ang inyo pagpahubog.”  Ngaa? Ginpaathag ni Isaias ang halit sini sa espirituwal: “Wala ninyo ginasapak ang mga ginahimo sang GINOO.”—Isaias 5:11, 12, APD.

Ang Pulong sang Dios nagalaygay sa aton nga indi makig-upod sa mga “palainum sing alak.” (Hulubaton 23:20, APD) Ang may-edad nga mga babayi ginlaygayan nga indi magpaulipon “sa madamo nga alak.” (Tito 2:3) Ngaa? Kay mahimo indi lang matalupangdan sang isa nga sa tagsa ka tion nga mag-inom sia, amat-amat nga nagadamo ang iya ginainom. Sa ulihi, kada bugtaw niya, mamangkot sia: “San-o pa ako maumpawan agod makainom ako liwat?” (Hulubaton 23:35, APD) Delikado na gid ang kahimtangan sang isa kon pagbugtaw niya sa aga mangita naman sia dayon sing ilimnon para maumpawan sa iya kahulugbon sang nagligad nga gab-i.

Ang Biblia nagpaandam nga ang mga tawo nga ‘nagapahubog kag nagatipon pirme para mag-inom, manabat sa Dios sa mga butang nga ila ginhimo, kay hukman niya ang tanan nga tawo, buhi ukon patay.’ (1 Pedro 4:3, 5, APD) Kag sa mabudlay nga mga tion nga nagakabuhi kita karon, si Jesus nagsiling: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw [ni Jehova] magaabot sa inyo sing hinali subong sang siod.”—Lucas 21:34, 35.

Gani, ano ang dapat himuon sang mga palainom para indi sila ‘mabug-atan sang sobra nga pag-inom’?

[Nota]

[Mga Retrato sa pahina 4, 5]

Ang pagpahubog nagaresulta sa madamo nga problema