Makabulig Bala ang mga Patay sa Buhi?

ANG pamatan-on nga lalaki nga taga West Africa nga si Tamba manugkuha sing eksam sa eskwelahan. * Ginpilit sia ni nanay niya nga mangayo sing bulig sa mga patay nila nga paryente para makapasar sia. Sa Palermo Sicily naman, madamo nga mga turista ang nagabisita sa mga sementeryo nga may ginadispley nga ginatos ka napreserbar nga bangkay. Nagapati ang iban nga ini nga mga patay makahatag sing proteksion sa mga buhi. Kada tuig, madamo man ang nagakadto sa Lily Dale, isa ka banwa sa katundan sang New York State, U.S.A., kay kilala ini nga lugar nga madamo sing espiritista. Ang mga nagakadto diri nagalaum nga makaistorya sila kag makapangayo sing bulig sa ila napatay nga mga paryente kag mga abyan.

Bisan diin nga lugar, madamo ang nagapati nga makabulig sa aton ang mga patay. Ano sa banta mo? Mahimo amo man sini ang gintudlo sa imo ukon may kilala ka nga amo sini ang ginapatihan. Natural lang nga mahidlaw ka sa imo mga pinalangga nga napatay. Nagapasalig ang mga espiritista nga mabulong nila ang imo kahidlaw. Suno sa magasin nga Time, ang isa ka espiritista nagsiling nga ang mga espiritu “handa pirme magbulig kon magpabulig kita sa ila.” Matuod bala ini? Makabulig gid man bala ang mga patay sa buhi? Mahimo makibot ka sa maathag nga sabat sang Biblia.

Nagakabuhi Pa Bala ang mga Patay?

Ang Biblia nagahatag sing simple kag madali maintiendihan nga sabat sa matuod nga kahimtangan sang mga patay. Binagbinaga kon ano ang ginasiling sang Manugwali 9:5: “Ang buhi nakahibalo nga mapatay sila, apang ang patay wala makahibalo sang bisan ano.” Posible bala nga may balatyagon pa ang mga patay? Ang bersikulo 6 nagasiling: “Ang ila gugma kag ang ila dumut kag ang ila kahisa nawala sing dugay na, kag wala na sila sing bahin sa gihapon sa bisan anong butang nga ginahimo sa idalum sang adlaw.” Talupangda man ang ginasiling sang bersikulo 10: “Sa Sheol nga imo ginakadtoan walay buluhaton ukon pahito ukon ihibalo ukon kaalam.” Ang Hebreo nga tinaga nga “Sheol” nga gingamit diri nagakahulugan nga “lulubngan sang mga tawo.” Ang Griego naman nga termino para sa sini amo ang “Hades.” Gingamit ini sa Kasulatan sa pagpatuhoy sa lugar nga ginbutangan kay Jesus sang napatay sia.—Binuhatan 2:31.

Madamo sing nabuligan si Jesus sang buhi pa sia, pero nahibaluan niya nga mapatay sia sa ulihi. Namensar bala si Jesus nga mabuligan pa niya ang mga tawo kon ara na sia sa lulubngan? Wala. Ginpaanggid niya mismo ang iya kamatayon sa kagab-ihon nga ang mga tawo wala sing ginahimo. (Juan 9:4) Nahibaluan gid ni Jesus nga ang mga tawo nga wala sing kabuhi, wala na sing mahimo pa kay ‘patay na sila.’—Isaias 26:14.

Naghimo si Jesus sang isa pa ka pagpaanggid para maintiendihan ang kahimtangan sang mga patay. Sang napatay ang iya abyan nga si Lazaro, ginpaanggid ni Jesus ang kamatayon sa pagtulog. (Juan 11:11-13) Indi gid makabulig sa aton ang tawo nga nagakatulog. Ngaa? Kay wala sia nakahibalo kon ano ang nagakatabo sa iya palibot.

Wala Bala Nagakapatay ang Kalag?

Madamo ang ginpapati nga ang kalag daw landong nga nagagua sa aton lawas kon mapatay kita. Pero indi amo sini ang ginatudlo sang Biblia. Ang una nga tulun-an sang Biblia, ang  Genesis, nagsiling nga kita mismo ang kalag. Ang Genesis 2:7 nagsiling nga sang gintuga ang tawo, “nanginbuhi [sia] nga kalag.” Ang tawo kalag kag amo man ang mga sapat. (Genesis 1:20-25) Gani, kon ang tawo ukon ang sapat mapatay, ang kalag mapatay man. Kag amo gid sini ang ginatudlo sang Biblia.—Ezequiel 18:4.

Pero ang iban mahimo magsiling, ‘Madamo ang nagahambal nga naistorya gid nila, nabatian, kag nakita mismo ang ila mga paryente nga napatay.’ Ini nga mga istorya mabatian bisan diin nga lugar. Amo nga madamo ang nagakadto sa mga espiritista nga nagapasalig sa mga namatyan nga puede nila maistorya ang mga patay.

Matuod gid bala ini? Kon matuod ini, indi bala nga nagasumpakil ini sa ginasiling kaina sang Biblia? Si Jesucristo nagsiling nga ang Pulong sang Dios kamatuoran. (Juan 17:17) Kag ang kamatuoran wala nagasumpakilay. Maathag nga ginapakita sang Biblia kon paano naton dapat tamdon ang mga ginasiling sang iban nga ang patay makabulig sa buhi. Ginsugid sini sa aton nga may isa ka tawo nga nangayo sing bulig sa patay. Kon binagbinagon naton ini sing maayo, mabal-an naton kon ano gid ang kamatuoran.

Ang Hari Nangayo sing Bulig sa Patay

Natabo ini sa patag-awayan sang naaminhan nga Israel. Magapakig-away si Hari Saul kag ang iya mga soldado sa ginakahadlukan nga mga Filistinhon. Sang makita ni Saul ang kampo sang mga Filistinhon, “nagkurug [gid] ang iya tagiposoon.” Sa sini nga tion wala na sia nagasimba kay Jehova, amo nga wala na ginapamatian ang iya mga pangamuyo. Gani, diin sia karon mangayo sing bulig kay patay na ang propeta sang Dios nga si Samuel?—1 Samuel 28:3, 5, 6.

Nagkadto si Saul sa espiritista sa En-dor. Ginsilingan niya sia nga ‘paguwaon si Samuel.’ Ginpagua sang espiritista ang isa nga daw si Samuel. Ining “Samuel” nagsiling nga magadaug ang mga Filistinhon, kag si Saul kag iya mga anak nga lalaki mapatay sa inaway. (1 Samuel 28:7-19) Si Samuel gid man bala ato nga napatay?

Pamensara ini: Ang Biblia nagsiling nga kon mapatay ang tawo ‘nagabalik sia sa duta’ kag “nagakawala [ukon nagakadula] ang iya mga hunahuna.” (Salmo 146:4) Nahibal-an ni Saul kag ni Samuel nga ginapakamalaut sang Dios ang pagpangayo sing bulig sa mga espiritista. Si Saul pa gani ang nagpahalin sa mga espiritista sa Israel sang una!—Levitico 19:31.

Pamensara bala: Kon espiritu gid man ato ni Samuel, lapason bala niya ang sugo sang Dios kag magkooperar sa espiritista para maistorya si Saul? Isa pa, indi na gusto ni Jehova nga mag-istorya kay Saul. Masarangan bala sang espiritista nga piliton ang Labing Gamhanan nga Dios nga makig-istorya kay Saul paagi sa patay nga si Samuel? Indi gid. Kon amo, ini nga “Samuel” indi ang matutom nga propeta sang Dios. Isa ato ka espiritu ukon malaut nga demonyo nga nagpakunokuno lang nga si Samuel.

Ang mga demonyo, mga anghel anay nga madugay na nga nagrebelde sa Dios. (Genesis 6:1-4; Judas 6) Mahimo nila obserbahan ang mga tawo sang buhi pa. Gani nahibal-an gid  sang mga demonyo kon ano ang ila hitsura kag kon paano sila mag-istorya kag manghulaghulag. Gusto nila papatihon ang mga tawo nga sala ang ginasiling sang Biblia. Amo nga ginpaandaman kita sang Dios nga indi gid mangayo sing bulig sa ila! (Deuteronomio 18:10-12) Ining malaut nga mga espiritu padayon gihapon subong nga nagapatalang sa mga tawo.

Karon, naintiendihan na naton kon ngaa madamo ang nagasugid nga “nabatian” nila ukon “nakit-an” ang patay nila nga pinalangga. Bisan kon kaisa daw indi man ini malain, tandaan naton nga ginahimo ini sang malaut nga mga espiritu para patalangon ang mga tawo. * (Efeso 6:12) Isa pa, pamensara ini: Si Jehova mahigugmaon gid nga Dios nga nagaulikid sa aton. Kon ang mga patay nagakabuhi gid man kag makabulig sa ila mga abyan kag pamilya, dilian bala kita sang aton mahigugmaon nga Manunuga sa pag-istorya sa ila kag kabigon ini nga “kangil-aran”? Indi gid! (1 Pedro 5:7) Kon ang mga patay wala sing mahimo, sin-o ang makabulig sa aton?

Ang Makabulig sa Buhi kag sa Patay

Suno sa nabinagbinag na, naintiendihan naton nga ang mga patay indi makabulig sa mga buhi. Isa pa, ang pagpangayo sing bulig sa ila delikado gid kay ginalapas nila ang sugo sang Dios. Kag mahimo nga maimpluwensiahan pa kita sang mga demonyo.

Suno sa Biblia, ang makabulig gid sa aton amo si Jehova, ang aton Manunuga. Mahimo niya kita luwason bisan sa kamatayon. (Salmo 33:19, 20) Handa gid sia magbulig sa aton subong. Indi pareho sa mga espiritista, ginhatagan niya kita sing matuod nga paglaum.

Natun-an ni Tamba, nga ginsambit kaina, nga si Jehova lang ang makahatag sang matuod nga paglaum kag indi ang mga espiritista. Ginsilingan sia sang mga espiritista nga kon indi sia maghalad sa iya mga katigulangan nga napatay, indi sia makapasar sa eksam. Nagatuon si Tamba sa Biblia sa mga Saksi ni Jehova. Natun-an niya kon ano ang matuod nga kahimtangan sang mga patay kag kon sin-o ang nagapakunokuno nga napatay. Bisan ginpilit sia sang iya iloy nga magpabulig sa espiritista, wala sia nagpati. Nagsiling sia: “Kon indi gid man ako kapasar, tinguhaan ko lang sa dason tuig.”

Ano ang resulta? Sia ang may pinakamataas nga grado sa eksam! Nakibot gid si nanay niya kag sugod sadto, wala na ini nagsalig sa mga espiritista. Wala naman niya ginsugo si Tamba nga maghalad sa mga patay. Natun-an ni Tamba nga nagpaandam si Jehova nga ‘indi kita magpamangkot sa mga patay para sa kaayuhan sang mga buhi.’ (Isaias 8:19, Biblia sang Katilingban sang mga Kristiano) Nahibaluan niya nga magamadinalag-on gid sia kon pirme niya basahon ang kasuguan sang Dios.—Salmo 1:1-3.

Kamusta naman ang mga pinalangga naton nga napatay? May paglaum pa bala sila? Nagpromisa si Jehova nga buligan man niya ang mga ara sa lulubngan. Sa tapos magsiling si propeta Isaias nga wala gid sing mahimo ang mga patay, talupangda kon ano pa gid ang ginhambal niya: “Ang imo mga patay magakabuhi. . . . Pagmata kag mag-amba, kamo nga nagapuyo sa yab-ok!” Nagsiling pa gid sia nga ang “mga patay” magakabuhi liwat.—Isaias 26:19

Hunahunaa bala! Ang binilyon nga yara sa lulubngan pagabanhawon! Ang Biblia nagsiling nga “handum gid” ni Jehova nga banhawon ang mga patay. (Job 14:14, 15) Sigurado bala kita sa sini? Bisan si Jesucristo sigurado gid sini amo nga nakasiling sia nga para kay Jehova, buhi ang mga patay.—Lucas 20:37, 38.

Gusto mo bala nga may amo ka man sini nga paglaum? * Padayon nga magkuha sing sibu nga ihibalo sa Biblia. Sa imo pagtuon, makumbinsi ka nga makabulig si Jehova sa mga buhi kag mga patay kag ang iya mga promisa “masaligan kag matuod.”—Bugna 21:4, 5.

[Mga Nota]

[Blurb sa pahina 19]

Natural lang nga mahidlaw ka sa imo mga pinalangga nga napatay

[Retrato sa pahina 20]

Nagpakita gid man bala ang patay nga si propeta Samuel kag nag-istorya kay Hari Saul?