Ika-127 nga Gradwasyon sa Gilead

Ginpadala ang mga Misyonero “sa Bug-os nga Kalibutan”

GINSUGO ni Jesus ang iya mga disipulo nga magwali “sa bug-os nga kalibutan.” (Binuhatan 1:8, MB) Ini nga sugo ginasunod gid sang mga Saksi ni Jehova.

Sang nagligad nga 65 ka tuig, daku ang nabulig sang mga misyonero nga ginhanas sa Watchtower Bible School of Gilead sa pagwali nga hilikuton sa sobra 200 ka kadutaan. Sang Sabado, Septiembre 12, 2009, pagkatapos sang lima ka bulan nga pagtuon, 56 ka ministro ang naggradweyt sa eskwelahan sang mga misyonero sa Patterson, New York, U.S.A.

Ang Ikasarang sang Imahinasyon

Si Stephen Lett, nga miembro sang Nagadumala nga Hubon sang mga Saksi ni Jehova kag tsirman sang programa, nagpamulongpulong sa tema nga “Gamita sing Maalamon ang Inyo Imahinasyon.” Ginsilingan niya ang mga naggradweyt nga indi nila paggamiton ang ila imahinasyon sa apat ka malain nga paagi. Ang tatlo sini amo: (1) Indi pagpamensara nga ang materyal nga mga butang makahatag sing dayon nga proteksion; (2) likawi ang pagpamensar sang imoral nga mga butang; kag (3) indi magsige ka pamensar kon ano ang matabo buas. (Hulubaton 18:11; Mateo 5:28; 6:34) Sa ikatlo nga punto, nagsiling sia nga ang tawo nga sobra magpalibog nagapanumdom sang iya mga problema sang una, subong, kag bisan pa ang sa palaabuton. “Makapoy gid ini,” siling ni Brother Lett. Ano ang ikap-at nga punto? Ginsilingan niya ang mga naggradweyt nga para mangin malipayon sa ila bag-o nga asaynment, indi nila pagpanumdumon nga mas maayo anay ang ila kabuhi antes sila nangin misyonero.

Pagkatapos sini, ginpalig-on sila ni Brother Lett nga gamiton ang ila imahinasyon sa apat ka maayo nga paagi. Sia nagsiling: (1) Dapat pamensaron mo na nga daan ang mga butang nga mahimo makahalit sa imo sa pisikal kag sa espirituwal para malikawan mo ini; (2) samtang ginabasa mo ang Biblia, pamensara ang nagakatabo kag panumduma nga daw ato ka didto; (3) pamensara nga ang kada tawo nga imo maistorya sa bag-o mo nga asaynment mahimo man mangin sumilimba ni Jehova; kag (4) magpakita sing empatiya sa imo ginatudluan ukon pamensara ang imo kaugalingon nga ara sa iya lugar.—Hulubaton 22:3.

Kon Ngaa Dapat Hanason ang Iban

Si David Splane, nga miembro sang Nagadumala nga Hubon, nagpamulongpulong sa tema nga “Itugyan Ini nga mga Butang sa Matutom nga mga Lalaki,” base sa 2 Timoteo 2:2. Ginsilingan ni apostol Pablo si Timoteo nga hanason ang matutom nga mga lalaki. Luyag niya nga tudluan sila ni Timoteo indi lamang sang mga kamatuoran kundi palig-unon man sila nga hanason ang iban. Nagsiling ang ispeker nga kinahanglanon gid ang mga lalaki sa pagpanguna sa Cristianong mga hilikuton. San-o kag paano sila hanason? Ginpalig-on ni Brother Splane ang mga naggradweyt nga sugdan nila ang paghanas sa sining mga lalaki sa una pa lang nila nga pagtuon sa Biblia.

Paano ini mahimo sang mga misyonero? Naghatag ang ispeker sang pila ka paagi. Dapat hanason sang mga misyonero ang ila mga estudyante nga magpreparar sing maayo para sa ila personal nga pagtuon sa Biblia. Dayon, kon naga-attend na sila sa mga miting sa kongregasyon, dapat tudluan sila sang mga misyonero nga abanse nga tun-an ang mga publikasyon nga ginagamit sa mga miting. “Kon ang isa wala nagatuon sa Biblia,” siling sang ispeker, “indi gid sia makatudlo sa iban.” Nagsiling pa gid si Brother Splane nga ang maayo nga halimbawa sang mga misyonero amo ang pinakamaayo nga paagi sa  pagtudlo sa mga estudyante nga mag-abot sing temprano, maghatag sing pinansial nga bulig sa pagwali nga hilikuton, kag magsunod sa mga nagapanguna.

Ang Pribilehiyo nga Mangin Saksi

Si Guy Pierce, nga miembro man sang Nagadumala nga Hubon, nagpamulongpulong base sa ginsiling ni Jesus sa Binuhatan 1:8, “Mangin Saksi Ko Kamo.” Ginpahanumdom niya ang mga naggradweyt nga sang unang siglo C.E., nadula sang pungsod sang Israel ang ila pribilehiyo nga mangin saksi ni Jehova. Ina nga pribilehiyo ginhatag sa pungsod nga nagapatubas sang bunga sang Ginharian. (Mateo 21:43) Ginpamatud-an sang kongregasyon sang hinaplas nga mga Cristiano nga sila ina nga pungsod. Nagsiling ang ispeker nga si apostol Pedro naghambal nga ang “balaan nga pungsod” sang hinaplas nga mga Cristiano amo ang ‘magawali’ sang pagkahalangdon ni Jehova. (1 Pedro 2:6-9, Biblia sang Katilingban sang mga Kristiano) Gani, gusto ipaintiende ni Jesus nga ang mga Cristiano indi lamang manaksi para sa iya kundi para man kay Jehova. Isa pa, ginatawag si Jesus nga “Matutom nga Saksi.” (Bugna 1:5; 3:14) Sia ang pinakamatutom nga Saksi ni Jehova kag modelo nga ginasunod naton.—1 Pedro 2:21.

Nagsiling ang ispeker nga ang mga pulong ni Jesus sa Binuhatan 1:8 may daku pa nga kahulugan sa aton karon. Ngaa? Ang isa sa pinakaimportante nga tagna nga narekord sa Bugna 11:15 natuman na! Nagasugod na sa paggahom ang Mesianikong Ginharian sang Dios. Ginawali na subong ang maayong balita “sa bug-os nga kalibutan.” (Binuhatan 1:8, MB) Ginpadaku ni Brother Pierce nga kon nagawali ang mga misyonero, dapat ang ila mensahe nasentro kay Jehova kag sa iya Ginharian indi sa ila kaugalingon, sa ila pagkabuhi sang una, sa ila kultura, ukon ginhalinan nga pungsod. Ginpalig-on niya ang mga misyonero nga tudluan “ang mas madamo nga tawo kay malip-ot na lang ang tion.”

Iban Pa nga Bahin sang Programa

Si Alex Reinmueller, nga nagabulig sa Publishing Committee, nagpamulongpulong sa tema nga “Hatagan Ka ni Jehova sing Kaisog.” Nagsiling sia nga kon magsalig ang mga misyonero sa gahom ni Jehova, buligan Niya sila nga makita ang ila maayo nga mga kinaiya, batunon ang ila mga kaluyahon, atubangon ang ila ginakahadlukan, kag mahatag ang ila pinakamaayo kay Jehova.

Ang duha ka instruktor sa Theocratic Schools Department, nga sanday Sam Roberson kag William Samuelson, may mensahe man para sa mga estudyante. Ang tema ni Brother Roberson nga “Kaupod Mo Ako,” ginbase sa Isaias 41:10 (APD). Nagsiling sia nga madamo sing rason nga magkalipay ang mga misyonero. Pero magaatubang man sila sing mga problema. Masarangan nila ini kon sundon nila si Hari David nga nangayo sing bulig sa iya mahigugmaon nga Amay paagi sa pangamuyo. (Salmo 34:4, 6, 17, 19) Nagsiling naman si Brother Samuelson nga kinahanglan padayon nila nga gamiton ang ila ikasarang sa panghunahuna. Ang mga misyonero nga nagahimo sini, wala dayon nagasunggod ukon nagapangakig kon hambalan sing masakit.—Hulubaton 2:10, 11.

Gin-interbyu ni Jim Mantz nga nagabulig sa Writing Committee, ang duha ka Branch Committee. Ang isa halin sa Republika sang Georgia kag ang isa halin sa Honduras. Gin-interbyu man niya ang isa ka miembro sang Country Committee sa Republika sang Tajikistan. Ang mga gin-interbyu naghatag sing panugda kon paano mangin abyan sang mga misyonero ang mga tawo nga mahimo indi interesado. Mahimo nila ini kon ‘daugon nila ang malaut paagi sa maayo.’ (Roma 12:21) Masinadyahon naman nga ginsaysay sang isa pa ka instruktor nga si Mark Noumair ang mga eksperiensia sang mga estudyante sa pagwali samtang nagaeskwela sila. Ini nga bahin may tema nga “Ano ang Mabulig Ko?”

Gintakpan sang tsirman ang programa paagi sa paggamit sang liriko sang bag-o nga ambahanon, “Handurawa nga Bag-o Na ang Tanan.” Napalig-on gid ang 6,509 nga nagtambong nga ipakilala si Jehova kag ang iya Anak sa “bug-os nga kalibutan.”

 [Tsart/Mapa sa pahina 31]

ESTADISTIKA SANG KLASE

8 ka pungsod ang ila ginhalinan

56 ka estudyante

28 ka mag-asawa

33.6 aberids nga edad

18.3 aberids nga tuig sa kamatuoran

13.6 aberids nga tuig sa bug-os tion nga ministeryo

[Mapa]

Para sa aktual nga pormat, tan-awa ang publikasyon

Ang mga misyonero ginpadala sa 22 ka pungsod nga makita sa idalo

MGA PUNGSOD NGA GINPADAL-AN SA MGA MISYONERO

JAMAICA

HAITI

NICARAGUA

COSTA RICA

PANAMA

CURAÇAO

GUYANA

PERU

BOLIVIA

PARAGUAY

CHILE

MOLDOVA

SERBIA

ALBANIA

CÔTE D’IVOIRE

CONGO, DEM. REP.

UGANDA

BURUNDI

TANZANIA

MOZAMBIQUE

NEPAL

CAMBODIA

[Retrato sa pahina 31]

Ika-127 nga Gradwasyon sang Watchtower Bible School of Gilead

Ang mga raya nanumeruhan halin sa atubangan pakadto sa likod, kag ang mga ngalan nalista halin sa wala patuo sa tagsa ka raya.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, Jm.; Bonilla, Om.