Mangin suod sa Dios

‘Nagatan-aw Sia sa Tagipusuon’

1 SAMUEL 16:1-12, APD

ANG panggua nga katahom makapatalang. Ang katahom sang isa ka tawo wala nagapakita kon ano gid ang sa sulod sang iya tagipusuon. Kita nga mga tawo masami nga nagabase lang sa kon ano ang aton makita. Pero si Jehova, wala lang nagatan-aw sa panggua nga katahom. Amo ini ang ginapakita sang mga pinamulong nga narekord sa 1 Samuel 16:1-12.

Handurawa ini nga hitabo: Manugpili na si Jehova sang bag-o nga hari sa pungsod sang Israel. Nagsiling ang Dios kay propeta Samuel: “Pakadtuon ko ikaw kay Jesse sa Betlehem. Ginpili ko na ang isa sang iya mga anak nga mangin hari.” (Bersikulo 1) Wala sing ngalan nga ginhatag si Jehova, kundi nagsiling lang sia nga isa sa mga anak ni Jesse ang pilion nga mangin hari. Samtang nagapakadto si Samuel sa Betlehem, mahimo nagapalibog sia: ‘Paano ko mahibaluan kon sin-o sa mga anak ni Jesse ang ginpili ni Jehova?’

Pag-abot ni Samuel sa Betlehem, gin-agda niya si Jesse kag ang iya mga kabataan para sa isa ka sinalusalo sa paghalad. Sang nakita ni Samuel ang kamagulangan nga si Eliab, natalupangdan niya dayon nga guapo ini. Naghunahuna si Samuel nga bagay gid si Eliab nga mangin hari, amo nga nagsiling sia: “Sigurado nga amo ini sia ang ginpili sang GINOO nga mangin hari.”—Bersikulo 6.

Pero, lain ang ginabasihan ni Jehova. Nagsiling sia kay Samuel: “Indi pagbasihi ang iya hitsura ukon ang iya kataason, Ang matuod, wala ko sia ginpili.” (Bersikulo 7 Wala nanamian si Jehova sa kaguapuhon ukon sa kataason ni Eliab. Makita sang mga mata ni Jehova ang nasulod nga pagkatawo sang isa, nga amo ang matuod niya nga katahom.

Ginsilingan ni Jehova si Samuel: “Kay ang akon pagtan-aw indi pareho sa pagtan-aw sang tawo. Ang tawo nagatan-aw lang sa hitsura, pero ako iya nagatan-aw sa tagipusuon.” (Bersikulo 7) Para kay Jehova, mas importante ang tagipusuon—ang aton nasulod nga pagkatawo, hunahuna, batasan, kag ginabatyag. Ang “nagatilaw sang mga tagiposoon” wala nagbaton kay Eliab, kag sa anom pa ka kabataan ni Jesse nga nagpalapit kay Samuel.—Hulubaton 17:3.

May isa pa ka bata si Jesse, ang kamanghuran nga si David pero “nagabantay siya sang mga karnero.” (Bersikulo 11) Gani ginpatawag si David kag nagkadto sia kay Samuel. Dayon, nagsiling si Jehova kay Samuel: “Haplasi siya sang lana kay siya ang akon napilian.” (Bersikulo 12) Matuod, si David “guwapo [man], manami ang iya mata, kag mapulapula ang iya guya.” Pero, ang iya tagipusuon amo gid ang nanamian ni Jehova.—1 Samuel 13:14.

Sa kalibutan, mas importante ang panggua nga katahom. Pero maayo lang kay indi amo sini si Jehova, wala niya ginatan-aw ang panggua nga katahom. Indi importante sa iya kon mataas ka kag kon guapo ukon guapa. Ang importante kay Jehova amo ang aton pagkatawo kag ang aton tagipusuon. Gani, gusto mo man bala nga manamian sa imo si Jehova? Kon amo, ipakita ang mga kinaiya nga matahom sa iya mga mata.