INING mga pinamulong ni Pablo nagapakita kon daw ano ka importante ang Biblia. Ang Kasulatan nga ginapatuhuyan niya diri amo lang ang bahin sang Biblia nga matigayon nila sadto nga ginatawag sang iban nga Daan nga Testamento. Pero, ang mga prinsipio sang mga pinamulong ni Pablo maaplikar gihapon sa bug-os nga 66 ka tulun-an sang Biblia pati na ang ginsulat sang matutom nga mga disipulo ni Jesus sang unang siglo C.E.

Kaangay ni Pablo, ginapabaloran mo man bala ang Biblia? Nagapati ang mga Cristiano sang unang siglo nga gingiyahan gid sang Dios ang mga manunulat sang Biblia. Amo man bala sini ang imo pagpati? Wala gid nagbag-o ang pagpati sang mga Cristiano sang unang siglo. Halimbawa, ang Ingles nga klerigo sang ika-14 nga siglo nga si John Wycliffe nagapati nga ang Biblia “masaligan gid nga kamatuoran.” Ang mga pinamulong ni Pablo ginkomentuhan sang The New Bible Dictionary nga nagasiling: “Kamatuoran ang tanan nga ginasiling sang Biblia kay gingiyahan ini” sang Dios.

Sining karon lang, amat-amat nga nadula ang pagsalig sang mga tawo sa Biblia. “Ang tanan nga Cristiano nagapati [gihapon] nga makabulig ang Biblia sa ila mga desisyon kag ginahimo nila ini nga basihan sang ila mga pagpati,” siling  sang libro nga The World’s Religions. Pero ang matuod, wala nila ini ginasunod. Madamo subong ang nadulaan sing pagsalig sa Biblia kay para sa ila ang mga nasulat diri “indi masaligan nga mga tradisyon kag ideya sang mga tawo.” Ginabaton nila nga ang mga manunulat sang Biblia may mapag-on nga pagtuo pero mga makasasala. Para sa ila, ini nga mga tawo nagatinguha sa pagpaathag sa madalom nga mga kamatuoran parte sa Dios pero kulang sing kaalam kag paghangop nga matigayon naton subong.

Ang matuod, pila lang gid subong ang nagasunod sa Biblia. Halimbawa, nakabati ka na bala nga nagasiling ang mga tawo nga ang talaksan sang Biblia sa moral dinumaan kag indi na praktikal? Madamo nga tawo ang wala nagasapak sa mga kasuguan kag mga prinsipio sang Biblia. Ang iban naman, wala nagasunod sa mga sugo nga mabudlay tumanon. Pero, ang pila ka “nagapangangkon nga mga Cristiano” hungod nga wala nagasunod sa sugo sang Biblia parte sa pagpakighilawas, pagpakighilahi, pagdinaya, kag pagpahubog.—1 Corinto 6:9, 10.

Ngaa? Sang maaga nga bahin sang ika-20 nga siglo, naghatag sing isa ka rason ang arkeologo nga si Sir Charles Marston sa iya libro nga The Bible Is True. Suno sa iya, ang mga tawo “nagapati lang dayon sa mga ispekulasyon sang moderno nga mga manunulat” nga nagapakalain sa Biblia. Amo man bala sini gihapon ang mga tawo subong? Ano ang masiling mo sa mga opinyon kag teoriya sang mga iskolar nga nagapangangkon nga indi masaligan ang Biblia? Binagbinaga ang masunod nga artikulo.