Ang Tawo nga Nagbag-o sang Kalibutan

Binilyon ka tawo ang nagkabuhi diri sa duta. Ang kalabanan napatay lang kag nalipatan na. Pero may pila nga indi gid malipatan bangod asta subong, nagabenepisyo kita sa ila hinimuan.

PAGBUGTAW mo sa aga, ginpasiga mo ang suga kay mahimos ka pakadto sa imo ulubrahan. Nagkuha ka sing libro ukon magasin para may basahon ka sa salakyan. Nagapagua ka na, pero nadumduman mo nga mainom ka gali sing antibiotic nga ginreseta sa imo. Temprano pa, pero nakabenepisyo ka na sa mga hinimuan sang pila ka kilala nga tawo.

Michael Faraday Ining Ingles nga physicist natawo sang 1791. Sia ang nag-imbento sang electric motor kag dynamo. Bangod sini, madamo nga tawo ang nakabenepisyo sa koryente.

Ts’ai Lun Ining opisyal sa panimalay sang emperador sang China amo ang nakaimbento sang isa ka proseso sang paghimo sang papel sang mga 105 C.E. Bangod sini, nangin madasig ang paghimo sang papel.

Johannes Gutenberg Sia ang German nga imbentor sang movable type nga pang-imprinta sang mga 1450. Bangod sa iya imbension, nagbarato ang pagpaimprinta. Gani, madamo na nga tawo ang makabasa sing impormasyon parte sa lainlain nga topiko.

Alexander Fleming Ining taga-Scotland nga researcher amo ang nakadiskobre sang antibiotic nga penicillin sang 1928. Madamo na karon ang nagagamit sang antibiotic para bulngon ang mga impeksion.

Tuman kadamo nga tawo ang nabuligan sining mga imbentor. Bangod sa ila mga hinimuan kag imbension, nangin masulhay ang aton pagkabuhi kag nangin mas maayo ang aton panglawas.

Pero, may isa ka tawo nga mas maayo sa ila tanan. Wala sia nakilal-an bangod sa iya mga imbension ukon mga nadiskobrehan. Ini nga tawo ordinaryo lang. Napatay sia mga 2,000 na ka tuig ang nagligad. Pero, nagbilin sia sing isa ka importante nga mensahe nga nagahatag sing paglaum kag kalipay. Bangod daku ang nabulig sang iya mensahe sa mga tawo sa bug-os nga duta, masiling naton nga ginbag-o niya ang kalibutan.

Ini nga tawo amo si Jesucristo. Ano nga mensahe ang iya ginwali? Kag ano ang epekto sini sa imo?