Iluga ang Ila Pagtuo

Natun-an Niya sa Iya Agalon nga Mangin Mapinatawaron

INDI gid malipatan ni Pedro ang tion sang nagtulukay sila ni Jesus. Naakig bala si Jesus sa iya? Indi kita sigurado kay ang Biblia nagsiling lang nga “nagbalikid ang Ginuo kag nagtulok kay Pedro.” (Lucas 22:61) Pero sadto nga tion, narealisar niya kon daw ano kadaku ang nahimo niya nga sala. Ang butang nga ginsumpa ni Pedro nga indi gid niya paghimuon, ginhimo niya. Ginpanghiwala niya ang iya pinalangga nga Agalon subong sang ginsiling ni Jesus. Amo ini ang pinakamalain nga nahimo ni Pedro sa bilog niya nga kabuhi.

Pero indi pa ulihi ang tanan. Mabakod ang pagtuo ni Pedro, gani may tsansa pa sia nga maghinulsol sa iya mga sala. Mahimo man sia makatuon sa isa sa pinakaimportante nga leksion nga gintudlo ni Jesus—ang pagpatawad. Tan-awon naton kon paano ini natun-an ni Pedro. Tanan kita makabenepisyo man sa sini.

Madamo Sia sing Dapat Matun-an

Mga anom ka bulan antes sini, si Jesus ara sa Capernaum, ang banwa nga gindak-an ni Pedro. Didto, ginpalapitan sia ni Pedro kag ginpamangkot: “Ginuo, pila ka beses makasala ang akon utod sa akon kag patawaron ko sia? Tubtob bala sa pito ka beses?” Abi ni Pedro mapinatawaron na gid sia kay ginatudlo sang mga lider sang relihion sadto nga magpatawad lang sing tatlo ka beses! Pero si Jesus nagsiling: ‘Indi lang pito ka beses, kundi tubtob sa kapituan kag pito ka beses.’—Mateo 18:21, 22.

Buot bala silingon ni Jesus nga listahon gid ni Pedro ang mga sala nga nahimo sa iya? Indi. Sang magsiling si Jesus nga magpatawad sing 77 ka beses sa baylo nga 7 lang, buot niya silingon nga indi naton pag-isipon kon kapila na kita magpatawad. Ginpakita man ni Jesus nga naimpluwensiahan si Pedro sang madamo nga tawo sa palibot niya nga indi mapinatawaron. Ini nga mga tawo daw nagahimo sing listahan kon pila ka beses na sila nga nahimuan sing sala. Pero indi amo sini ang Dios. Wala sia nagaisip kon kapila na niya kita ginpatawad.

Wala na nagbais si Pedro kay Jesus. Pero, may natun-an gid bala sia sa ginsiling ni Jesus? Kon kaisa, maintiendihan lang naton kon ano gid ang buot silingon sang pagpatawad kon kita na mismo ang nakasala kag kinahanglan nga patawaron. Gani, balikan naton ang mga hitabo antes mapatay si Jesus. Sadto nga tion, madamo nga beses nga kinahanglan ni Pedro ang pagpatawad sang iya Agalon.

Kinahanglan Gid Niya ang Pagpatawad

Isa ini ka importante nga gab-i. Amo ini ang katapusan nga gab-i sang kabuhi ni Jesus diri sa duta. Pero madamo pa sia sing dapat nga itudlo sa iya mga apostoles ilabi na parte sa pagkamapainubuson. Ginhinawan niya ang tiil sang iya mga apostoles. Maayo gid ini nga halimbawa sang pagkamapainubuson kay ginahimo lang ini sang pinakamanubo nga suluguon. Sang primero, daw indi pa magpasugot si Pedro nga hugasan ni Jesus ang iya tiil. Pero sang ulihi, nagsiling sia nga hugasan pati ang iya kamot kag ulo! Wala naubos ang pasensia ni Jesus kay Pedro  kundi ginpaathag niya kon ano ang buot silingon sang iya ginhimo.—Juan 13:1-17.

Pagkatapos sadto, nagbinaisay naman ang mga apostoles kon sin-o ang pinakadaku sa ila. Sigurado gid nga nag-entra didto si Pedro. Pero wala sila gin-akigan ni Jesus kundi gintadlong lang sila. Gindayaw pa gani sila ni Jesus sa katutom nga ginpakita nila sa iya. Pero nagsiling man si Jesus nga sa ulihi, tanan sila magabiya sa iya. Nagsabat si Pedro nga indi gid niya pagbayaan si Jesus bisan patyon pa sia. Nagsiling si Jesus nga ipanghiwala ni Pedro ang iya Agalon sing tatlo ka beses sina mismo nga gab-i antes magpamalo ang manok sing duha ka beses. Pero nangrason si Pedro nga bisan bayaan si Jesus sang tanan niya nga apostoles, indi gid sia magbiya!—Mateo 26:31-35; Marcos 14:27-31; Lucas 22:24-28.

Naubos bala ang pasensia ni Jesus kay Pedro? Wala. Kay bisan amo na sini ang natabo, ginatan-aw gihapon ni Jesus ang maayo nga kinaiya sang iya makasasala nga mga apostoles. Bisan nahibaluan na ni Jesus nga paslawon sia ni Pedro, nagsiling sia: “Nagpangamuyo ako para sa imo agod indi madula ang imo pagtuo; kag kon makapanumbalik ka na, pabakura ang imo mga kauturan.” (Lucas 22:32) Nagapati gid si Jesus nga makabalik si Pedro kag mangin matutom liwat. Indi bala nga mapinatawaron gid si Jesus?

Wala magdugay, sa hardin sang Getsemane, nakasala naman si Pedro. Ginsilingan ni Jesus sanday Pedro, Santiago, kag Juan nga magbantay samtang nagapangamuyo Sia. Grabe gid ang kasubo ni Jesus sa sini nga tion, amo nga dapat tani unungan nila sia. Pero pila ka beses nga naabtan sila ni Jesus nga nagakatulog. Mapinatawaron gid si Jesus kag naintiendihan niya sila kay nagsiling sia: “Ang espiritu handa, apang ang unod maluya.”—Marcos 14:32-38.

Dugaydugay, nag-abot ang isa ka guban nga may mga sulo, espada, kag inuglampos. Amo na ini ang tion nga dapat gid maghalong. Pero hinali lang nga gingabot ni Pedro ang iya espada kag ginlabo si Malco. Nautod gid ang dulunggan sining ulipon sang mataas nga saserdote. Kalmado nga ginsaway ni Jesus si Pedro. Dayon, gin-ayo niya si Malco kag ginpaathag nga indi sila dapat mangin bayolente. Ini nga prinsipio ginasunod gihapon sang iya mga sumulunod asta subong. (Mateo 26:47-55; Lucas 22:47-51; Juan 18:10, 11) Madamo sing nahimo nga sala si Pedro nga kinahanglan patawaron sang iya Agalon. Ginapahanumdom kita sini nga “kita tanan nagakasandad sing madamong beses.” (Santiago 3:2) Sin-o bala sa aton ang wala nagakinahanglan sing pagpatawad sang Dios kada adlaw? Pero, may mas malala pa gid nga nahimo si Pedro sa sina nga gab-i.

Ang Pinakamalala nga Nahimo ni Pedro

Ginsilingan ni Jesus ang guban nga palakton ang iya mga apostoles kay sia man lang ang ila kinahanglan. Wala sing mahimo si Pedro samtang ginatan-aw niya si Jesus nga ginagapos. Dayon, nalagyo sia kag ang iban nga apostoles.

Mahimo nakadulog sanday Pedro kag Juan sa balay nayon sang Mataas anay nga Saserdote nga si Anas. Didto una nga gindala si Jesus para interogahon. Sang ginsaylo si Jesus, nagsunod sanday Pedro kag Juan pero ara lang sila “sa malayo.” (Mateo 26:58; Juan 18:12, 13) Maisog si Pedro kay kon talawan sia, wala na niya tani ginsundan si Jesus. May mga armas ang guban, kag napilasan ni Pedro ang isa sa ila. Pero bisan amo na sini ang iya ginhimo, wala ini nagapakita nga handa gid sia mapatay para sa iya Agalon subong sang ginsiling niya.—Marcos 14:31.

Pareho kay Pedro, madamo man subong ang nagasunod kay Cristo galing “sa malayo” lang. Ngaa? Para indi sila matalupangdan sang iban. Pero si Pedro mismo nagsulat sang ulihi nga masunod lamang naton sing maayo si Cristo kon  magpalapit gid kita sa iya. Mahimo naton ini kon ilugon naton si Cristo sa tanan nga tion, ano man ang matabo.—1 Pedro 2:21.

Sang ulihi, nakalab-ot si Pedro sa geyt sang isa sa pinakadaku nga mansion sa Jerusalem. Amo ini ang balay ni Caifas, ang manggaranon kag impluwensiado nga mataas nga saserdote. Ini nga klase sang balay masami nga ginapatindog sa maligwa nga lugar, kag may geyt sa atubang. Sang didto na si Pedro sa geyt, wala sia ginpasulod sang manugbantay. Si Juan naman nakauna sa iya kag ato na sa sulod. Ginsilingan niya ang manugbantay nga pasudlon si Pedro. Pero, mahimo nga nagbulag si Pedro kay Juan. Wala man sia nangita sing paagi nga makasulod sa balay para unungan ang iya Agalon. Didto lang sia nagtener sa gua upod sa pila ka suluguon nga nagapainit-init sa kalayo. Nagatan-aw lang sia samtang nagagua-sulod ang butig nga mga saksi sa balay diin ginainterogar si Jesus.—Marcos 14:54-57; Juan 18:15, 16, 18.

Bangod masanag ang kalayo, nakilal-an si Pedro sang babayi nga nagpasulod sa iya. Nagsiling sia: “Ikaw man kaupod ni Jesus nga taga-Galilea!” Bangod wala sia nakapangaman, ginpanghiwala ni Pedro nga kilala niya si Jesus kag nagpaaboabo nga wala sia kabalo sang ginapanghambal sang babayi. Dayon, nagtindog sia malapit sa geyt para indi sia matalupangdan. Pero nakita naman sia sang isa ka babayi nga nagsiling: “Ini nga tawo kaupod ni Jesus nga Nazaretnon.” Pero, si Pedro nanumpa: ‘Indi ko sia kilala!’ (Mateo 26:69-72) Pagkatapos sini, mahimo nga nabatian ni Pedro nga namalo ang manok. Pero bangod madamo sia sing ginapamensar, nalipatan niya ang ginsiling ni Jesus kaina.

Dugaydugay, nagpalipodlipod naman si Pedro para indi sia matalupangdan. Pero, ginpalapitan sia sang isa ka grupo. Ang isa sa ila paryente ni Malco, ang tawo nga ginlabo niya. Ginsilingan niya si Pedro: “Indi bala nakita ko ikaw sa hardin” kaupod ni Jesus? Gusto gid sila kumbinsihon ni Pedro nga nagsala sila. Gani, nanumpa sia nga nagasugid sia sing matuod kag kon nagabinutig gid man sia, sumpaon sia sang Dios. Pagkatapos gid lang nga nahambal ini ni Pedro, nabatian niya nga namalo liwat ang manok.—Juan 18:26, 27; Marcos 14:71, 72.

Bag-o lang nagua si Jesus sa balkonahe nga kitaon sa ginatindugan ni Pedro. Amo ini ang tion nga ginsambit kaina sa umpisa nga nagtulukay sila nga duha. Didto lang kag nakamarasmas si Pedro kon daw ano kadaku nga sala ang nahimo niya sa iya Agalon. Daw malupok ang dughan ni Pedro samtang nagapagua kay ginakonsiensia gid sia. Nagatululo ang iya luha samtang nagaduroy sia sa dalan. Indi na sia makapugong amo nga naghilibion gid sia.—Marcos 14:72; Lucas 22:61, 62.

Sa amo sini nga kahimtangan, mahimo dayon pensaron sang isa nga indi na gid sia  mapatawad. Mahimo amo man sini ang ginpamensar ni Pedro. Mapatawad pa bala sia ni Jesus?

Mapatawad Pa Bala si Pedro?

Mahimo nga grabe gid nga kasakit ang nabatyagan ni Pedro samtang nagapamanagbanag na. Siguro ginbasol gid niya ang iya kaugalingon sang ginpaantos si Jesus kag ginpatay sina nga hapon! Mahimo nga nagalalain gid sia kada madumduman niya nga gindugangan niya ang sakit nga nabatyagan sang iya Agalon sa katapusan nga adlaw sang Iya kabuhi diri sa duta. Pero bisan grabe ang iya kasubo, wala sia nagpadaug. Paano naton nahibaluan? Ang rekord nagsiling nga nakig-upod sia liwat sa iya mga kauturan. (Lucas 24:33) Sigurado nga naghinulsol ang mga apostoles sa ila ginhimo sadto nga gab-i, amo nga nagpalig-unanay sila.

Sa pihak nga bahin, makita naton diri ang isa ka maayo nga kinaiya ni Pedro. Kon makasala ang alagad sang Dios, indi importante kon daw ano ka grabe ang iya nahimo, kundi ang iya determinasyon nga tadlungon ang iya sala. (Hulubaton 24:16) Ginpakita ni Pedro nga mabakod gid ang iya pagtuo kay nagpakig-upod sia liwat sa iya mga kauturan bisan pa nga nasubuan sia. Kon ginabug-atan kita ukon ginasubuan, mas gusto naton nga mag-isahanon na lang. Pero indi ini maayo. (Hulubaton 18:1) Dapat makig-upod kita pirme sa aton mga kauturan para mapalig-on nila kita nga magpadayon sa pag-alagad sa Dios.—Hebreo 10:24, 25.

Bangod kaupod ni Pedro ang iya mga kauturan, nabatian niya ang balita nga wala na si Jesus sa iya lulubngan. Gani, nagdalagan sila dayon ni Juan pakadto sa lulubngan ni Jesus. Mahimo nga nakauna si Juan kay mas bataon sia. Pero wala sia dayon magsulod sang nakita niya nga bukas ang lulubngan. Si Pedro ya, nagsulod dayon bisan nagahapohapo pa sia. Pero, wala na didto si Jesus!—Juan 20:3-9.

Nagpati bala si Pedro nga ginbanhaw si Jesus? Sang primero, wala sia nagpati bisan pa nagsiling ang matutom nga mga babayi nga nagpakita sa ila ang mga anghel kag ginbalita  nga ginbanhaw si Jesus. (Lucas 23:55–24:11) Pero pagkahapon, nadula na ang tanan nga kasubo kag pagpangduhaduha ni Pedro. Buhi si Jesus! Kag isa na sia karon ka gamhanan nga espiritu. Nagpakita sia sa tanan niya nga apostoles. Pero kay Pedro gid sia una nga nagpakita. Sina nga adlaw, ang mga apostoles nagsiling: “Matuod gid nga nabanhaw ang Ginuo kag nagpakita sia kay Simon!” (Lucas 24:34) Nagsulat man si apostol Pablo sang ulihi parte sa pinasahi nga adlaw nga “nagpakita [si Jesus] kay Cefas, dayon sa napulog-duha.” (1 Corinto 15:5) Ang Cefas kag Simon amo ang iban pa nga ngalan ni Pedro. Nagpakita si Jesus sa iya sa sina nga adlaw, kag mahimo sang nagaisahanon lang si Pedro.

Wala ginasugid sang Biblia kon ano gid ang natabo pagkitaay nila. Mahimo nga nalipay gid si Pedro sang makita niya nga buhi ang iya pinalangga nga Ginuo. Amo na ini ang kahigayunan nga makapangayo sia sing kapatawaran kag mapakita niya nga naghinulsol gid sia. Wala na sia sing pangayuon pa, kundi nga patawaron lang sia. Sigurado gid nga ginpatawad sia ni Jesus bisan pa madamo nga beses sia nga nakasala. Dapat dumdumon sang mga Cristiano nga nakasala ang natabo kay Pedro. Indi kita maghunahuna nga indi na gid mapatawad ang aton nahimo nga sala. Ginasunod gid ni Jesus ang iya Amay nga ‘nagapatawad sing bugana.’—Isaias 55:7.

Dugang Pa nga Pamatuod sang Pagpatawad

Ginpakadto ni Jesus ang iya mga apostoles sa Galilea para magkitaay sila liwat. Pag-abot nila didto, nangisda si Pedro sa Dagat sang Galilea. May pila nga nag-upod sa iya. Ang huni sang sakayan, ang dapya sang balod, kag ang mga pukot nagpahanumdom sa iya sang kabuhi niya sang una. Nagpalibog bala sia sa sina nga gab-i kon ano na ang iya himuon kay wala na si Jesus? Namensar bala sia nga magbalik sa pagpangisda? Wala kita makahibalo. Pero sa sina nga gab-i, wala gid sila sing may nakuha nga isda.—Mateo 26:32; Juan 21:1-3.

Sang kaagahon na, may isa ka tawo nga nagtawag sa ila halin sa hunasan. Ginsugo sila nga iladlad ang ila pukot sa pihak sang sakayan. Ginsunod nila sia kag nakakuha sila sing 153 ka dalagku nga isda! Bangod sini, nakilal-an dayon ni Pedro kon sin-o ato. Gani, naglumpat sia dayon kag naglangoy pakadto sa higad. Didto, ginpakaon sila ni Jesus sing sinugba nga isda. Si Pedro gid ang iya gin-istorya.

Ginpamangkot ni Jesus si Pedro kon bala ginahigugma niya ang iya Ginuo “sing labi sa sini.” Ang ginatumod ni Jesus amo ang ila nakuha nga isda. Mas importante pa bala kay Pedro ang pagpangisda sangsa kay Jesus? Ginpanghiwala ni Pedro ang iya Ginuo sing tatlo ka beses amo nga ginhatagan sia ni Jesus sing tatlo ka kahigayunan para mapamatud-an ang iya gugma sa atubangan sang iban. Sang nagsiling si Pedro nga ginahigugma gid niya ang iya Agalon, gintudluan sia ni Jesus kon paano ini ipakita. Dapat unahon niya ang pag-alagad sa Dios sangsa bisan ano nga butang. Mahimo niya ini paagi sa pag-atipan sa matutom nga mga sumulunod ni Cristo.—Juan 21:4-17.

Ginpabatyag ni Jesus si Pedro nga importante sia gihapon sa iya kag kay Jehova. May daku sia nga papel sa kongregasyon nga ginaatipan ni Cristo. Isa gid ini ka pamatuod nga ginpatawad  sia ni Jesus! Sigurado nga indi gid ini malipatan ni Pedro.

Matutom nga gintuman ni Pedro ang iya asaynment sa madamo nga tinuig. Ginpalig-on niya ang iya mga kauturan suno sa ginsugo sa iya ni Jesus sang gab-i antes Sia ginpatay. Nangin mainayuhon kag mapinasensiahon man si Pedro sa pag-atipan sa mga sumulunod ni Cristo. Ang tawo nga ginatawag Simon nangin mabakod, masaligan, kag makapalig-on nga utod sa kongregasyon. Nagkabuhi gid sia suno sa ngalan nga ginhatag sa iya ni Jesus—Pedro ukon Igang. Napamatud-an gid ini sang duha ka sulat ni Pedro nga nangin importante nga tulun-an sa Biblia. Ini nga mga sulat nagapakita nga wala gid nalipatan ni Pedro ang leksion nga natun-an niya kay Jesus parte sa pagpatawad.—1 Pedro 3:8, 9; 4:8.

Kabay pa nga nakatuon man kita sing leksion sa sini. Adlaw-adlaw bala kita nga nagapangayo sing kapatawaran sa Dios sa aton mga sala? Nagapati bala kita nga mapatawad kag matinluan kita sa aton mga sala? Ginapatawad man bala naton ang mga nakasala sa aton? Kon ginahimo naton ini, masunod naton ang pagtuo ni Pedro kag ang pagkamapinatawaron sang iya Agalon.

[Blurb sa pahina 22]

Madamo nga beses nga kinahanglan ni Pedro ang pagpatawad sang iya Agalon, pero sin-o bala sa aton ang wala nagakinahanglan sing pagpatawad kada adlaw?

[Retrato sa pahina 23]

“Nagbalikid ang Ginuo kag nagtulok kay Pedro”

[Retrato sa pahina 24]

‘Ang Ginuo nagpakita kay Simon!’