Ang Kamatuoran Parte sa Sala

MAPAMATUD-AN bala sang isa ka tawo nga may sakit nga wala sia sing hilanat paagi sa pagguba sang thermometer? Indi gid! Sing kaanggid, indi masiling nga wala nagaluntad ang sala bangod madamo ang wala nagasapak sa pagtamod sang Dios sa sala. Madamo ang ginasiling sang Iya Pulong, ang Biblia, parte sa sini. Ano gid bala ang ginatudlo sini parte sa sala?

Ang Tanan Nakasala

Sang nagligad nga duha ka libo ka tuig, nasubuan si apostol Pablo bangod ‘ang maayo nga luyag niya himuon wala niya nahimo, kundi ang malain nga indi niya luyag amo ang iya ginahimo.’ (Roma 7:19) Kon tampad kita, batunon naton nga pareho man kita sa iya. Ayhan gusto man naton sundon ang Napulo ka Sugo ukon ang iban nga maayong pamatasan. Pero, sa gusto man naton ukon indi, kita tanan mahimo makasala. Wala naton ginahungod nga supakon ang isa ka sugo, kundi maluya lamang kita. Ano ang buot silingon sini? Si Pablo naghatag sing sabat: “Karon, kon ang indi ko luyag amo ang ginahimo ko, ang nagahimo sini indi na ako, kundi ang sala nga nagapuyo sa akon.”—Roma 7:20.

Pareho kay Pablo, ang tanan nga tawo may mga kaluyahon—pamatuod nga indi kita perpekto kag may napanubli nga sala. “Ang tanan nakasala kag wala makalab-ot sa himaya sang Dios,” siling sang apostol. Ano ang kabangdanan sini? Sia nagpadayon: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.”—Roma 3:23; 5:12.

Madamo ang nagasikway sa ideya nga nahamulag kita sa Dios kag nangin indi perpekto bangod nakasala ang aton una nga mga ginikanan, pero amo gid ini ang ginatudlo sang Biblia. Paagi sa pagkutlo sa una nga kapitulo sang Genesis, ginpakita ni Jesus nga nagapati sia sa kasaysayan parte kay Adan kag Eva.—Genesis 1:27; 2:24; 5:2; Mateo 19:1-5.

Ang isa sa importante nga mensahe sang Biblia amo nga si Jesus nagkari sa duta para gawaron ang sala sang mga nagatuo sa iya. (Juan 3:16) Ang aton paglaum nga kabuhi nagadepende sa pagbaton naton sa pamaagi ni Jehova para luwason ang mabinatunon nga mga tawo sa isa ka mabudlay nga sitwasyon nga wala sila sing mahimo. Pero kon wala naton nahangpan kon ano ang pagtamod sang Dios parte sa sala, indi man naton mahangpan ang iya pamaagi para luwason kita gikan sa sala.

Ang Halad ni Jesus kag Kon Ngaa Kinahanglan Ini

Ginhatagan ni Jehova ang una nga tawo sing kahigayunan nga mabuhi sing walay katapusan. Madula lamang ini ni Adan kon magrebelde sia sa Dios. Nagrebelde sia, kag nangin makasasala. (Genesis 2:15-17; 3:6) Wala ginsunod ni Adan ang kabubut-on sang Dios, nakasala sia, kag naguba ang iya maayo nga relasyon sa Dios. Sang nakasala sia paagi sa paglapas sa kasuguan sang Dios, nagtigulang sia kag napatay. Sing makapasubo, ang tanan nga kaliwatan ni Adan, lakip kita, nabun-ag nga may sala, amo nga nagakapatay kita. Ngaa?

Simple lang ang rason. Ang makasasala nga mga ginikanan indi makapatubas sing kabataan nga wala sing sala. Ang tanan nga kaliwatan ni Adan nabun-ag nga makasasala, kag subong sang ginsulat ni apostol Pablo, “ang bayad nga ginabayad sang sala amo ang kamatayon.” (Roma 6:23) Pero, ang ikaduha nga bahin sina nga bersikulo nagahatag sa aton sing paglaum: “Apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.” Buot silingon, paagi sa  kamatayon ni Jesus subong halad, nangin posible para sa matinumanon kag mainapresyahon nga katawhan nga matinluan sa mga epekto sang sala nga nahimo ni Adan. * (Mateo 20:28; 1 Pedro 1:18, 19) Ano ang dapat mo himuon bangod sini?

‘Ang Gugma ni Cristo Nagapahulag sa Aton’

Ginsabat sang Dios ang nasambit nga pamangkot paagi kay apostol Pablo. Sia nagsulat: “Ang gugma ni Cristo nagapahulag sa amon, bangod amo ini ang amon ginhinakop, nga ang isa ka tawo napatay para sa tanan; . . . kag napatay sia para sa tanan agod ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Corinto 5:14, 15) Kon batunon sang isa ka tawo nga ang halad ni Jesus makaluwas sa iya sa epekto sang sala—kag luyag niya nga pasalamatan ini nga probisyon—dapat niya sundon ang kabubut-on sang Dios. Nagalakip ini sa paghibalo sang mga ginapangabay sang Dios, paghanas sang iya konsiensia base sa mga talaksan sang Biblia, kag pag-aplikar sa sini.—Juan 17:3, 17.

Ang paghimo sing sala makaguba sang aton relasyon kay Jehova nga Dios. Sang narealisar ni Hari David nga mabug-at gid nga sala ang iya pagpakighilahi kay Batseba kag pagpapatay sa iya bana, nagbatyag sia sing daku nga kahuya. Pero nabalaka gid sia kay napaakig niya ang Dios. Gani, nag-aku sia kay Jehova: “Batok sa imo, sa imo lamang, nakasala ako, kag nakahimo sang malaut sa imo itololok.” (Salmo 51:4) Pareho man sini ang natabo kay Jose sang ginsulay sia nga makighilahi, pero ang iya konsiensia nagtiklod sa iya para mamangkot: “Paano bala niyan nga makahimo ako sining daku nga pagkamalaut, kag magpakasala batok sa Dios?”—Genesis 39:9.

Gani, kon nakahimo kita sing sala, wala lamang ini nagadalahig sang pagbatyag sing kahuya bangod nadakpan kita. Indi lamang kita manabat sa mga tawo bangod mahimo nalapas naton ang pila ka sugo. Ang paglapas sa kasuguan sang Dios parte sa pagpakigsekso, pagkabunayag, pagtahod, pagsimba kag sa iban pa, makaguba sang aton suod nga kaangtanan sa Iya.  Kon hungod kita nga nagapakasala, ginahimo naton ang aton kaugalingon nga kaaway sang Dios. Amo nga dapat gid naton ini binagbinagon sing serioso.—1 Juan 3:4, 8.

Gani, ano na ang natabo sa sala? Ang matuod, wala sing natabo sa sini. Ginabag-o lang sang mga tawo ang pagtawag sa sala para mangin indi ini tanto ka serioso. Ang konsiensia sang madamo nga tawo nakibulan na ukon wala na nila ini ginasapak. Ini nga huyog dapat gid isikway sang tanan nga luyag magpahamuot sa Dios. Subong sang aton nabinagbinag, ang bayad sa sala indi lamang ang pagbatyag sing kahuya kundi kamatayon. Mahimo gid kita mapatay bangod sa sala.

Pero, kon sinsero kita nga maghinulsol sa aton mga sala kag indi na ini pagliwaton, patawaron gid ini paagi sa halad-gawad ni Jesus. “Malipayon ang mga ginpasaylo sa ila malinapason nga mga buhat kag gintabunan ang ila mga sala,” sulat ni Pablo. “Malipayon ang tawo nga ang iya sala indi na pag-isipon ni Jehova.”—Roma 4:7, 8.

[Nota]

[Retrato sa pahina 10]

Ang Daku nga Pagbag-o sa Panudlo sang Relihion

Para sa kalabanan nga mga Katoliko, ang ideya parte sa Limbo mabudlay intiendihon. Sa sini lang nga mga dekada, amat-amat ini nga gindula sa panudlo sang mga Katoliko. Sang 2007, opisyal nga gindula sang Katoliko nga Simbahan ang panudlo parte sa Limbo sa isa ka dokumento nga nagasugid nga “may relihioso nga mga rason para maglaum nga ang mga lapsag nga napatay nga wala mabunyagan mahimo maluwas kag mangin malipayon sing dayon.”—International Theological Commission.

Ngaa masiling nga isa ini ka daku nga pagbag-o sa panudlo sang relihion? Bangod nahilway sini ang simbahan gikan sa ginasiling sang kolumnista nga Pranses nga si Henri Tincq nga “isa ka makapabug-at nga palanublion, nga ginpangapinan sugod pa sang mga ika-15 nga siglo asta ika-20 nga siglo sang mapahituon nga Simbahan, nga nagpahog sa mga ginikanan nga kon indi nila pagpabunyagan gilayon ang ila kabataan, magakadto ini sa Limbo.” Pero ang pagbag-o sa panudlo parte sa Limbo nagapautwas man sang iban pa nga isyu.

Tradisyon Ukon Kasulatan? Base sa kasaysayan, ang ideya parte sa Limbo naimbento gikan sa debate sang mga relihion parte sa purgatoryo sang ika-12 nga siglo. Gintudlo sang Katoliko nga Simbahan nga ang kalag indi mapatay, amo nga dapat may iban nga kadtuan ang kalag sang mga lapsag nga indi makasaka sa langit bangod wala sila nabunyagan pero indi man sila nagakabagay nga silutan sa impierno. Gani naimbento ang ideya parte sa Limbo.

Pero, wala ginatudlo sang Biblia nga ang kalag indi mapatay. Sa baylo, nagasiling ini nga ang tawhanon nga kalag nga nagapakasala mahimo “laglagon” ukon “mapatay.” (Binuhatan 3:23; Ezequiel 18:4) Bangod ang kalag mapatay, imposible gid nga may Limbo. Dugang pa, ginasiling sang Biblia nga ang patay wala sing pangalibutan, pareho sang nagakatulog.—Manugwali 9:5, 10; Juan 11:11-14.

Ginapakita sang Biblia nga ginakabig sang Dios nga balaan ang magagmay nga kabataan sang Cristianong mga ginikanan. (1 Corinto 7:14) Ini nga pinamulong wala sing pulos kon kinahanglan pa nga pabunyagan ang mga lapsag para maluwas.

Insulto gid sa Dios ang panudlo parte sa Limbo, bangod ginalaragway sia sini subong isa ka mapintas nga diktador nga nagasilot sa mga inosente, imbes nga makatarunganon kag mahigugmaon nga Amay. (Deuteronomio 32:4; Mateo 5:45; 1 Juan 4:8) Gani, wala sing duhaduha nga indi gid mahangpan sang sinsero nga mga Cristiano ini nga ideya bangod wala ini ginatudlo sang Biblia!

[Mga Retrato sa pahina 9]

Ang pagkabuhi suno sa Pulong sang Dios nagaresulta sing maayo nga relasyon sa Dios kag sa mga tawo