Wala Na Bala Naton Ginasapak ang Sala?

SANG mga nagliligad, pirme pa mabatian sang mga nagasimba ang mga manugwali nga nagasermon sa pulpito parte sa ginatawag nga “pito ka mabug-at nga sala”—ang kaibog, kahakog, kakagod, katamad, kaakig, kahisa, kag bugal. Masami nga ginalaragway sang manugwali ang malain nga resulta sang sala kag ginapalig-on ang mga tagpalamati nga maghinulsol. “Karon,” siling sang isa ka manunulat, “wala na ginahambal sang mga manugwali ang mga topiko nga indi mauyunan sang ila tagpalamati, sa baylo ginawali nila kon ano ang nanamian sang mga tagpalamati.”

Amo man sini ang naobserbahan sang mga kolumnista sang pamantalaan. Ang masunod amo ang pila sa ila mga komento:

▪ “Ang pagpati sang una sa sala, paghinulsol kag paggawad wala na karon ginasapak, kag nangin uso na ang mga sermon kon paano pabakuron ang kompiansa kag paghigugma sa kaugalingon.”—Star Beacon, Ashtabula, Ohio.

▪ “Wala na nagakabalaka ang mga tawo sa ila mga sala.”—Newsweek.

▪ “Wala na kita nagapamangkot sang, ‘Ano ang ginapangabay sang Dios sa akon,’ kundi, ‘Ano ang mahimo sang Dios para sa akon?’”—Chicago Sun-Times.

Ang tawo karon wala na nagahambal kon ano ang husto kag sayop bangod nagapuyo kita sa isa ka katilingban nga ginahuman sang mga tawo nga naghalin sa lainlain nga relihion, rasa, kag pulitikal nga pagpati. Indi maayo nga hukman ang iban nga nakasala sila. Ang pinakadaku kuno nga sala amo ang paghukom sa iban. Gani nangin lapnag ang panghunahuna nga: ‘Maayo lang para sa imo ang imo ginapatihan, pero indi mo ini dapat ipilit sa iban. Sa karon, nagakabuhi ang mga tawo base sa lainlain nga pagsulundan sang pamatasan. Indi lang ikaw ang nakahibalo kon ano ang husto. Pareho sa imo, husto man ang pagsulundan sang iban nga tawo.’

Nagbag-o ang pagtamod sang mga tawo bangod sini nga pangatarungan. Sa karon, ang tinaga nga “sala” wala na ginahambalan sing serioso. Para sa madamo, ginahimo nila ini nga topiko sa ila linahog. Wala na nagasiling ang mga tawo nga “sala ang pagpuyopuyo” kundi “nagaupdanay lang kuno sila.” Indi na sila “makihilawason,” kundi “nagalipaylipay” lang. Indi na sila “homoseksuwal,” kundi nagpili lang sing “lain nga sahi sang pagkabuhi.”

Ginapakita sini nga ang ginakondenar sang una normal na lang subong. Pero, ngaa nagbag-o ang ila pagtamod? Ano na ang natabo sa sala? Kag importante bala kon ano ang imo pagtamod sa sini?