NANAMIAN ka bala kon nagabasa kamo parte kay Jesus?— * Ang iban nga tawo nakibot sang mahibaluan nila nga si Jesus wala sing sinulatan sa Biblia. Pero, madamo sing ginsulat parte sa iya ang walo ka manunulat sang Biblia. Nagkabuhi sila tanan sa panahon ni Jesus, kag ginasugid nila sa aton ang iya gintudlo. Kabalo ka bala kon sin-o ining walo?— Sila amo sanday Mateo, Marcos, Lucas, kag Juan. Ang apat pa amo sanday Pedro, Santiago, Judas, kag Pablo. May nahibaluan ka bala parte sa ila?—

Istoryahan anay naton ang tatlo ka manunulat nga nalakip sa 12 ka apostoles ni Jesus. Kilala mo bala sila?— Sila amo sanday Pedro, Juan kag Mateo. Duha ka sulat ang ginhimo ni Pedro para sa mga Cristiano. Ginsugid niya sa ila ang mga butang nga nahibaluan niya nga ginhimo kag ginsiling ni Jesus. Kon buksan naton ang Biblia sa 2 Pedro 1:16-18, mabasa naton dira nga ginsugid ni Pedro nga nabatian niya nga nakig-istorya si Jehova nga Dios kay Jesus halin sa langit.—Mateo 17:5.

Lima ka tulun-an naman sa Biblia ang ginsulat ni apostol Juan. Ara sia sa tupad ni Jesus sa katapusan nga pagkaon sang mga disipulo upod sa ila Agalon. Ara man si Juan sang napatay si Jesus. (Juan 13:23-26; 19:26) Si Juan ang nagsulat sang isa sa apat ka kasaysayan sa Biblia parte sa kabuhi ni Jesus nga ginatawag mga Ebanghelyo. Sia man ang nagsulat sang Bugna nga ginhatag ni Jesus sa iya kag sang tatlo ka sulat sa Biblia nga ginhingalan sa iya. (Bugna 1:1) Ang ikatlo nga manunulat sang Biblia nga apostol ni Jesus amo si Mateo. Manugsukot sia sing buhis sang una.

Duha pa ka manunulat sang Biblia ang nakakilala gid kay Jesus. Ini amo ang iya mga manghod, mga bata man nanday Jose kag Maria. (Mateo 13:55) Sang primero, indi pa sila mga disipulo ni Jesus. Abi pa gani nila kon nagbuang na si Jesus bangod sang iya kapisan sa pagbantala. (Marcos 3:21) Sin-o ining mga manghod ni Jesus?— Ang isa amo si Santiago. Sia amo ang nagsulat sang tulun-an sa Biblia nga Santiago. Ang isa pa amo si Judas. Sia naman ang nagsulat sang tulun-an sa Biblia nga Judas.—Judas 1.

Ang duha pa nga nagsulat parte sa kabuhi ni Jesus amo sanday Marcos kag Lucas. Ang nanay ni Marcos nga si Maria may daku nga balay sa Jerusalem, nga ginatipunan nanday apostol Pedro kag sang mga Cristiano sang una. (Binuhatan 12:11, 12) Sang gab-i nga nagsaulog si Jesus sing Paskua upod sa iya mga apostoles, mahimo nagsunod sa ila si Marcos sang nagkadto sila sa hardin sang Getsemane. Sa tion nga gin-aresto si Jesus, gindakop sang mga soldado si Marcos, pero nakapalagyo sia nga wala sing bayo.—Marcos 14:51, 52.

Si Lucas naman isa ka edukado nga doktor nga mahimo nangin disipulo pagkatapos sang kamatayon ni Jesus. Gintun-an niya sing maayo ang kabuhi ni Jesus kag nagsulat sing maathag kag sibu nga kasaysayan parte sini. Sang ulihi, nangin kaupod sia ni apostol Pablo sa paglakbay kag sia ang  nagsulat sang tulun-an sa Biblia nga Binuhatan.—Lucas 1:1-3; Binuhatan 1:1.

Si Pablo amo ang ikawalo nga nagsulat parte kay Jesus. Nagtuon sia sa kilala nga abogado nga si Gamaliel. Bangod ginpadaku kag gintudluan sang mga Fariseo, si Pablo, nga gintawag anay nga Saulo, naakig sa mga disipulo ni Jesus kag nadalahig sia sa pagpatay sa ila. (Binuhatan 7:58–8:3; 22:1-5; 26:4, 5) Kabalo ka bala kon paano si Pablo nakatuon sang kamatuoran parte kay Jesus?—

Ti, pakadto sadto si Pablo sa Damasco para dakpon ang mga disipulo ni Jesus sang hinali lang nga nabulag sia sang isa ka kasanag halin sa langit. Nabatian niya ang tingog nga nagapamangkot: “Saulo, Saulo, ngaa ginahingabot mo ako?” Si Jesus ang nagahambal! Ginsilingan niya si Pablo nga masulod sa Damasco. Pagkatapos, gingiyahan ni Jesus ang iya disipulo nga si Ananias sa pagpakig-istorya kay Pablo, kag nangin disipulo sia ni Jesus. (Binuhatan 9:1-18) Katorse ka tulun-an sa Biblia ang ginsulat ni Pablo, sugod sa Roma asta sa Hebreo.

Nabasa mo na bala ang mga tulun-an sa Biblia parte kay Jesus ukon ginbasa na ini sang iban sa imo?— Ang isa sa pinakamaayo nga himuon mo subong amo ang pagtuon sa ginasiling sang Biblia parte kay Jesus samtang bata ka pa.