Nahibaluan Mo Bala?

Nagatipon gid man bala ang mga subay sing pagkaon kon tig-ilinit kag tig-alani?

▪ Ang Hulubaton 6:6-8 (APD) nagasiling: “Kamo nga mga matamad, tan-awa ninyo kag tun-i kon paano magkabuhi ang mga subay, agod mangin maalamon kamo. Bisan wala sing pangulo ukon manugdumala nga nagasugo sa ila, nagatipon sila sang ila pagkaon kon tig-ilinit kag kon tig-alani.”

May mga subay gid man nga nagatipon sing pagkaon. Mahimo ang ginapatuhuyan diri ni Solomon amo ang subay nga mangangani (Messor semirufus). Madamo sing amo sini nga subay sa Israel subong.

Suno sa isa ka reperensia, “ginabayaan sang mangangani nga subay ang ila balaybalay kon maayo ang tiempo para mangita sing pagkaon . . . [kag] nagatipon sila sang mga liso kon tig-ilinit.” Ini nga mga liso halin sa mga tanom ukon sa duta. Nagahimo sila sing balaybalay sa idalom duta malapit sa uma, bodega, ukon mga linasan diin makakuha sila sing pagkaon.

Sa ila balaybalay, ginatipon sang mga subay ang pagkaon sa matapan nga mga kulukuarto nga konektado sang mga ulualagyan. Mga 12 sentimetros ang kalaparon sini kag 1 ka sentimetro ang kataason. Ang mga balay nila nga puno sing pagkaon makasustiner sa ila sing “sobra apat ka bulan bisan indi na sila magua.”

Ano ang mga responsibilidad sang manugtagay sang hari?

▪ Si Nehemias manugtagay ni Hari Artajerjes sang Persia. (Nehemias 1:11) Sa mga palasyo sa Middle East sang una, indi ordinaryo nga suluguon ang manugtagay sang hari. Isa sia ka mataas nga opisyal. Base sa mga larawan kag mga balasahon sang una parte sa mga manugtagay, mabal-an naton kon ano ang papel ni Nehemias sa palasyo sang Persia.

Ang manugtagay ginasaligan gid sang hari. Sia ang nagatilaw sa alak sini para masiguro nga wala ini sing hilo. “Kinahanglan gid sadto ang masaligan nga mga suluguon sa palasyo sang Achaemenid [Persia] kay madamo ang nagaplano sa pagpatay sa hari,” siling sang iskolar nga si Edwin M. Yamauchi. Mahimo nga paborito gid nga opisyal sang hari ang manugtagay kag puede niya impluwensiahan ang desisyon sini. Bangod suod sila nga duha, mahimo nga ang manugtagay ang nagadesisyon kon sin-o ang puede makapalapit sa hari.

Amo ini ang rason kon ngaa ginpasugtan sang hari si Nehemias nga magbalik sa Jerusalem kag patindugon ang pader sini. Mahimo nga palangga gid sang hari si Nehemias. Suno sa The Anchor Bible Dictionary: “Ang ginsabat gid lang sang hari ‘San-o ka bala mabalik?’”—Nehemias 2:1-6.

[Diagram/Retrato sa pahina 9]

Iskultura sa palasyo sang Persia sa Persepolis

[Diagram]

(Para sa aktual nga pormat, tan-awa ang publikasyon)

Ang Manugtagay

Si Prinsipe Jerjes

Si Dario nga Daku

[Credit Line]

© The Bridgeman Art Library International