Pamangkot sang mga Bumalasa . . .

Diin Ginkuha ni Cain ang Iya Asawa?

▪ “Kon sanday Adan kag Eva may duha ka bata nga lalaki, nga sanday Cain kag Abel, diin naghalin ang asawa ni Cain?” Pirme ini ginapamangkot sang mga nagapangduhaduha sa Biblia. Pero may mga detalye sa Biblia nga nagasabat sa sini.

Sa Genesis kapitulo 3 kag 4, mabasa ini nga mga impormasyon: (1) Si Eva ‘iloy sang tanan nga nagakabuhi.’ (2) Malawig na nga panahon ang nagligad sang naghatag si Cain sing halad nga wala ginbaton sang Dios. (3) Sang gintabog sia kag nangin ‘laaslaas,’ nahadlok si Cain kay basi may “bisan sin-o nga makadakup” kag magpatay sa iya. (4) Nagbutang ang Dios sing tanda para proteksionan si Cain, nga nagapakita nga may mga utod sia ukon mga paryente nga mahimo magpatay sa iya. (5) Sang ulihi, naghulid si Cain sa iya asawa “sa duta sang Nod.”—Genesis 3:20; 4:3, 12, 14-17.

Ginapakita sini nga mga impormasyon nga ang asawa ni Cain kaliwat gihapon ni Eva, pero wala lang mahibaluan kon san-o natawo. Sa Genesis 5:4, mabasa nga sa sulod sang 930 ka tuig nga pagkabuhi ni Adan, “nanginamay sia sang mga anak nga lalaki kag mga anak nga babayi.” Siempre, wala man ginasiling sang Biblia nga ang asawa ni Cain anak gid ni Eva. Ang matuod, ginsambit lang sia sang gintabog na si Cain. Ginapakita sini nga malawig na nga panahon ang nagligad kag puede nga isa sia sa mga apo nanday Adan kag Eva. Gani suno sa The Amplified Old Testament, ang asawa ni Cain “isa sa mga kaanakan ni Adan.”

Suno sa isa ka komentarista sa Biblia sang ika-19 nga siglo nga si Adam Clarke, may rason ang pagbutang sang Dios sing tanda kay Cain. Mahimo nga nahadlok si Cain bangod madamo na ang kaliwatan ni Adan nga nagakabuhi sadto, kag puede nga “may ara na pila ka komunidad.”

Daw indi gid mabaton sang iban subong nga ginpangasawa ni Cain ang iya utod ukon ang isa ka babayi nga kaliwat ni Adan nga anak sang iya nag-asawahay nga kabataan. Sa masami, wala ini ginatugutan sang sosiedad ukon nahadlok sila kay basi mag-abnormal ang bata. Pero si F. LaGard Smith nagkomento sa The Narrated Bible in Chronological Order: “Mahimo gid nga ining una nga mga mag-ulutod nag-alasawahay, bisan pa nga daw indi gid ini mabaton sang ulihi nga mga henerasyon.” Isa pa, ang pagdumili sa pag-asawahay sang malapit nga magparyentehanay nagsugod lang sang nabaton ni Moises ang kasuguan sang Dios para sa pungsod sang Israel sang 1513 B.C.E.—Levitico 18:9, 17, 24.

Subong, linibo na ka tuig ang nagligad halin sang panahon nga perpekto pa ang aton una nga mga ginikanan. Mahimo nga sang una indi sila apektado sang abnormalidad ukon mga depekto sa lawas nga mapanubli sa mga ginikanan. Isa pa, ginapakita sang mga pagtuon sining karon lang, pareho sang ginbalhag sa Journal of Genetic Counseling nga kon mag-asawahay ang magpakaisa, mas manubo ang posibilidad nga makabata sila sing may diperensia sangsa ginapatihan sang kalabanan. Gani, ini nga mga isyu indi isa ka serioso nga problema sang panahon ni Adan ukon antes sang panahon ni Noe. Amo nga makasiling kita nga ang asawa ni Cain paryente niya.