Ang Isa nga “Nagapamati sang Pangamuyo”
Mangin Suod sa Dios
Ang Isa nga “Nagapamati sang Pangamuyo”
GINASABAT gid bala ni Jehova nga Dios ang sinsero nga pangamuyo sang iya mga sumilimba? Ang rekord sang Biblia parte sa indi tanto kilala nga si Jabes nagapamatuod nga si Jehova “nagapamati sang pangamuyo.” (Salmo 65:2) Daw katingalahan nga ang malip-ot nga impormasyon parte sa iya nalakip sa listahan sang mga kaliwatan sa libro sang Nahaunang mga Cronica. Usisaon naton ang 1 Cronica 4:9, 10.
Ining duha lang ka bersikulo ang nagsambit parte kay Jabes. Suno sa bersikulo 9, “ginhingalanan sia sang iya iloy si Jabes, nga nagasiling, ‘Bangud nga gin-anak ko sia sa kasubo.’” * Ngaa amo sini ang ginngalan niya sa iya bata? Grabe gid bala ang iya pagpasakit? Balo bala sia nga nagapanalabiton kay wala na ang iya bana pagbata niya? Wala sing ginsiling ang Biblia. Pero sang ulihi, nangin bugal gid sini nga iloy ang iya bata. Mahimo nga matarong nga mga lalaki ang mga utod ni Jabes. Pero si “Jabes labi ka dungganon sa iya mga utud.”
Si Jabes pirme nagapangamuyo. Gin-umpisahan niya ang iya pangamuyo paagi sa pagpangayo sing pagpakamaayo sang Dios. Dayon, may tatlo sia ka pangabay nga nagapakita nga mabakod ang iya pagtuo.
Una, si Jabes nangabay sa Dios: “Palaparon ang akon ginsakpan.” (Bersikulo 10) Ining dungganon nga tawo wala gapang-agaw sang duta sang iban. Ang iya sinsero nga pangabay mahimo nga indi lamang parte sa duta kundi parte sa mga tawo. Mahimo nangabay sia nga palaparon ang iya teritoryo sa malinong nga paagi para magamit ini sang madamo pa nga sumilimba sang matuod nga Dios. *
Ikaduha, nangabay si Jabes nga buligan sia sang “kamut” sang Dios. Ang kamot sang Dios nagasimbulo sa iya gahom sa pagbulig sa iya mga sumilimba. (1 Cronica 29:12) Para mabaton ang iya ginapangayo, nagsalig si Jabes nga indi malip-ot ang kamot sang Dios sa mga matutom.—Isaias 59:1.
Ikatlo, nangamuyo si Jabes: “Bantayan mo ako gikan sa malaut agud nga ini indi magpasubo sa akon!” Ang ekspresyon nga “agud nga ini indi magpasubo sa akon” nagapakita nga mahimo nangamuyo sia para masarangan niya ang kasubo kag kalautan, imbes nga ilikaw sia sa sini.
Ginapakita sang pangamuyo ni Jabes ang iya pagtuo kag pagsalig sa nagapamati sang pangamuyo kag importante sa iya ang matuod nga pagsimba. Ginsabat bala sia ni Jehova? Ang malip-ot nga rekord naghinakop: “Gintugut sang Dios sa iya ang iya ginpangayo.”
Ang nagapamati sang pangamuyo wala nagbag-o. Nalipay sia sa mga pangamuyo sang iya mga sumilimba. Ang mga nagatuo kag nagasalig sa iya makasiling: “Bisan ano ang pangayuon naton suno sa iya kabubut-on, nagapamati sia sa aton.”—1 Juan 5:14.
[Mga Nota]
^ par. 2 Ang ngalan nga Jabes naghalin sa tinaga nga mahimo nagakahulugan sing “kasakit.”
^ par. 4 Sa Targum, nga paraphrase sang Balaan nga Kasulatan sang mga Judiyo, ang ginsiling ni Jabes gin-translate nga: “Bugayi ako sing mga kabataan, kag padamua ang akon mga disipulo sa akon mga teritoryo.”
