Pamangkot sang mga Bumalasa . . .

May “Faith Healing” Bala ang mga Saksi ni Jehova?

▪ Wala gid ini ginahimo sang mga Saksi ni Jehova. Pareho kay Jesus, naintiendihan nila nga ang ila misyon amo ang pagwali sang maayong balita parte sa Ginharian sang Dios. Nagapati man sila nga makilala ang matuod nga mga Cristiano indi sa faith healing, kundi sa isa ka mas importante nga butang.

Ang mahigugmaon nga pagpang-ayo ni Jesucristo sa mga nagabalatian sang unang siglo C.E. importante gid para sa aton. Nagagarantiya ini nga sa iya paghari sa Ginharian sang Dios, “ang pumuluyo indi magsiling, ‘Nagamasakit ako.’”—Isaias 33:24.

Kamusta naman subong? Ang mga faith healer sang mga relihion nga nagakilala kag wala nagakilala kay Jesus nagasiling nga nagapang-ayo sila paagi sa milagro. Pero, may paandam si Jesus sa mga nagasiling nga ‘naghimo sila sang madamo nga mga milagro’ sa iya ngalan. Silingan niya sila: “Wala ako makakilala sa inyo. Palayo kamo sa akon, kamo nga manugbuhat sang malaot!” (Mateo 7:22, 23, Ang Pulong sang Dios, APD) Gani, ang ginasiling bala nga mga milagro sang mga faith healer subong pamatuod nga suportado ini kag ginapakamaayo sang Dios?

Binagbinaga ang ginasiling sang Biblia parte sa pagpang-ayo ni Jesus. Kon ikomparar naton ini sa ginahimo sang mga faith healer, mahibaluan naton kon bala ang mga pagpang-ayo subong halin gid man sa Dios.

Wala nagpang-ayo si Jesus para magdamo ang iya sumulunod. Wala man niya ini ginpakitakita. Pirme niya ginasilingan ang iya mga ginpang-ayo nga indi magpanugid.—Lucas 5:13, 14.

Wala man nagpabayad si Jesus sa iya mga milagro. (Mateo 10:8) Kag tuodtuod ang iya mga milagro. Ang tanan nga balatianon nga magkadto sa iya nagaayo gid kag indi ini depende sa ila pagtuo. (Lucas 6:19; Juan 5:5-9, 13) Ginbanhaw pa gani niya ang mga patay!—Lucas 7:11-17; 8:40-56; Juan 11:38-44.

Bisan pa nagahimo sing milagro si Jesus, indi sentro sang iya pagwali ang pagpangumbertir paagi sa mga milagro kag pagpahibihibi sa mga tawo. Ang pinakaimportante sa iya amo ang pagwali sang maayong balita parte sa Ginharian sang Dios. Gin-organisar ni Jesus ang iya mga sumulunod para maghimo sing mga disipulo, nga magawali sang paglaum nga wala na sing magabalatian kon mag-abot na ang Ginharian sang Dios.—Mateo 28:19, 20.

Matuod, ang iban nga mga sumulunod ni Jesus sang unang siglo may gahom sa pagpang-ayo, pero nag-untat na ato. (1 Corinto 12:29, 30; 13:8, 13) Ang matuod nga mga Cristiano subong kilala indi sa pagpang-ayo, kundi sa ila nagasakripisyo nga gugma. (Juan 13:35) Subong, ang faith healing wala makapatubas sang isa ka pamilya sang mga Cristiano nga may gugma sa isa kag isa bisan pa lainlain ang ila rasa kag gindak-an.

Pero, may isa ka grupo sang mga Cristiano nga nahiusa sang mabakod nga gugma. Wala nila ginahalitan ang isa kag isa ukon ang iban bisan sa panahon sang grabe nga mga inaway. Sin-o sila? Ang mga Saksi ni Jehova. Sa bilog nga kalibutan, kilala sila sa pag-ilog sa gugma ni Cristo. Isa gid ka milagro nga mahiusa ang mga tawo nga lainlain sing rasa, pungsod, kag kultura, nga nangin posible lamang paagi sa balaan nga espiritu sang Dios. Ngaa indi mo pagtestingan tambong sa ila pagtilipon para mapamatud-an mo ini?

[Retrato sa pahina 13]

Ginasuportahan bala sang Dios ang mga faith healer (sa tuo) subong?