Sekreto 5

Busga ang Imo Espirituwal nga Kinahanglanon

ANO ANG GINATUDLO SANG BIBLIA? “Malipayon ang mga mahunahunaon sang ila espirituwal nga kinahanglanon.”—Mateo 5:3.

NGAA MABUDLAY INI HIMUON? May linibo ka relihion, kag kalabanan sa ila nagasumpakilay ang ginatudlo kon paano mabusog ang espirituwal nga kinahanglanon. Paano mo mabal-an kon sin-o ang nagatudlo sing kamatuoran kag nagapahamuot sa Dios? Suno sa pila ka awtor, ang pagpati sa Dios kag ang debosyon sa iya wala sing basihan, kag makahalalit pa gani. Ginsumaryo sang magasin nga Maclean’s ang ginhambal sang isa ka kilala nga ateista: “Ini nga pagpati sang mga Cristiano, nga may labaw pa sa mapaathag sang siensia kag sa aton makita, mabatian, kag mabatyagan . . . nagapakanubo sang aton kabuhi kag ginabangdan sang kapintas.”

ANO ANG PUEDE MO HIMUON? Usisaa ang mga ebidensia nga may Dios. (Roma 1:20; Hebreo 3:4) Indi pagtuguti ang bisan sin-o nga pauntaton ka sa pagpangita sing mga sabat sa importante nga mga pamangkot, pareho sang: Ngaa ari kita diri? May kabuhi pa bala sa tapos sang kamatayon? Ngaa sobra gid ang pag-antos? Ano ang ginapatuman sang Dios sa akon? Importante gid nga masabat ini kay makabulig ini sa imo nga mangin kontento.

Pero, indi dayon pagpatihi ang ginahambal sang iban. Suno sa Biblia, dapat mo gamiton ang imo “ikasarang sa pagpangatarungan” para mapamatud-an mo mismo kon ano ang nahamut-an sang Dios. (Roma 12:1, 2) Maayo gid ang resulta sini. Kon tun-an mo ang Biblia kag sundon ang laygay sini, malikawan mo ang mga problema, mabuhinan ang imo kabalaka, kag mangin mas malipayon ka. Masaligan mo gid ini nga promisa. Minilyon na sa bilog nga kalibutan ang nakabenepisyo sang natun-an nila ang kamatuoran parte sa Dios kag sa iya mga katuyuan. Halimbawa, basaha ang matuod nga mga eksperiensia sa pahina 18 asta 21 sini nga magasin.

Kon mabatyagan mo ang kaayuhan sang pagsunod sa mga laygay sang Biblia, magabakod pa gid ang imo debosyon sa Dios. Ngaa indi mo pagtun-an ang Biblia upod sa mga Saksi ni Jehova? Kon himuon mo ini, mahimo magaugyon ka sa ginsulat ni apostol Pablo: “Isa ini ka paagi nga makaganar sing daku, ining diosnon nga debosyon nga may pagkakontento.”—1 Timoteo 6:6.

[Retrato sa pahina 8]

Pamatud-i sa imo kaugalingon kon ano ang nahamut-an sang Dios