Sekreto 1

Higugmaa ang mga Tawo, Indi ang Kuarta kag Pagkabutang

ANO ANG GINATUDLO SANG BIBLIA? “Ang gugma sa kuarta amo ang gamot sang tanan nga sahi sang makahalalit nga mga butang.”—1 Timoteo 6:10.

NGAA MABUDLAY INI HIMUON? Ginapabatyag sang mga advertisement nga may kulang sa aton kabuhi. Gusto sini nga magbakabaka kita obra para may igasto sa mas bag-o, mas maayo, kag mas dalagku nga mga butang. Kabalo gid mangganyat ang kuarta kag madali kita sini madala. Pero, nagpaandam ang Biblia nga ang nagahigugma sa manggad indi gid mangin kontento. “Ang nagahigugma sang pilak indi mabusug sing pilak; bisan ang nagahigugma sang kabuganaan, sing patubas,” sulat ni Hari Solomon.—Manugwali 5:10.

ANO ANG PUEDE MO HIMUON? Iluga si Jesus, kag tun-i nga higugmaon ang mga tawo sangsa mga butang. Handa si Jesus nga ihatag ang tanan, bisan ang iya kabuhi, bangod ginahigugma niya ang mga tawo. (Juan 15:13) Sia nagsiling: “May kapin nga kalipay sa paghatag sangsa pagbaton.” (Binuhatan 20:35) Kon pirme naton ginahatag ang aton tion, ikasarang, kag materyal nga mga butang sa iban, himuon man nila ini sa aton. “Ugalia ang paghatag,” siling ni Jesus, “kag ang mga tawo magahatag sa inyo.” (Lucas 6:38) Ginasakit lang kag ginapaantos sang mga determinado nga magmanggaranon ang ila kaugalingon. (1 Timoteo 6:9, 10) Pero kon ginahigugma naton ang iban kag ginahigugma nila kita, matuod kita nga mangin kontento.

Mapasimple mo bala ang imo kabuhi? Mabuhinan mo bala ang imo mga pagkabutang kag ang mga gusto mo pa baklon? Kon himuon mo ini, mas may tion ka kag kusog para sa mas importante nga mga butang sa kabuhi—ang pagbulig sa iban kag ang pag-alagad sa Dios, nga amo ang naghatag sang tanan nga ara sa imo.—Mateo 6:24; Binuhatan 17:28.

[Retrato sa pahina 4]

“Ugalia ang paghatag, kag ang mga tawo magahatag sa inyo”