Sekreto 4

Pilia sing Maayo ang Imo mga Abyan

ANO ANG GINATUDLO SANG BIBLIA? “Maglakat upud sa maalam nga mga tawo kag manginmaalam ka.”—Hulubaton 13:20.

NGAA MABUDLAY INI HIMUON? Ang aton mga abyan mahimo makabulig sa aton nga mangin kontento ukon indi. Ang ila paggawi kag mga ginahambal makaapektar sa aton pagtan-aw sa kabuhi.—1 Corinto 15:33.

Halimbawa, binagbinaga ang rekord sang Biblia parte sa 12 ka lalaki nga espiya nga nagbalik halin sa Canaan. Ang kalabanan sa ila nagdala “sing malaut nga sugid sa katawohan sang Israel nahanungud sang duta nga ila nalampitawan.” Sa pihak nga bahin, ang duha sining mga espiya may maayo nga ginhambal parte sa Canaan, kag gintawag nila ini nga “tama gid kaayo nga duta.” Pero, nalatnan ang mga tawo sang pagkanegatibo sang napulo ka espiya. “Ang bug-os nga katilingban nagbayaw sang ila tingug,” siling sang rekord, “kag nagkumud . . . ang tanan nga katawohan sang Israel.”—Numeros 13:30–14:9.

Subong, madamo man ang “mga palakumod, mga reklamador tuhoy sa ila kahimtangan sa kabuhi.” (Judas 16) Mabudlay mangin kontento kon amo sini ang imo mga abyan.

ANO ANG PUEDE MO HIMUON? Pamensara kon ano ang ginaistoryahan ninyo nga mag-abyan. Pirme bala nila ginapabugal ang mga butang nga ara sa ila, ukon pirme sila nagareklamo sang mga butang nga wala sa ila? Ano ka nga klase sang abyan para sa ila? Ginapahisa mo bala sila, ukon ginabuligan mo sila nga mangin kontento?

Binagbinaga ang halimbawa ni David sang malapit na lang sia maghari, kag ni Jonatan, nga anak ni Hari Saul. Nangin laaslaas sadto si David sa kamingawan. Nahadlok si Hari Saul nga agawon ni David ang iya pagkahari, gani gusto niya nga patyon si David. Bisan pa si Jonatan na tani ang masunod nga hari, nangin suod sia nga abyan ni David. Nahibaluan ni Jonatan nga si David ang ginpili sang Dios nga mangin hari kag kontento sia nga suportahan ang iya abyan.—1 Samuel 19:1, 2; 20:30-33; 23:14-18.

Amo man sini nga klase sang mga abyan ang kinahanglan mo. Sila ang mga abyan nga nagatinguha nga mangin kontento kag nagapensar sang imo kaayuhan. (Hulubaton 17:17) Siempre, para makakita ka sing amo sini nga mga abyan, dapat nga amo ka man sina.—Filipos 2:3, 4.

[Retrato sa pahina 7]

Ginabuligan ka bala sang imo mga abyan nga mangin kontento?