Ang Tuman ka Importante nga Tagna
Ang Tuman ka Importante nga Tagna
“Iwali ining maayong balita sang ginharian sa bug-os nga kalibutan, subong nga saksi sa tanan nga kapungsuran; kag ugaling magaabut ang katapusan.”—MATEO 24:14. *
NAGAUGYON ang mga iskolar sa Biblia nga importante gid ini nga bersikulo. Importante ini bangod himuon ini sa bilog nga kalibutan. Ginapakita man sini ang obligasyon sang mga Cristiano, ang pagwali nga himuon anay para ipahibalo ang tuman kadaku nga hitabo nga gintawag ni Jesus nga “katapusan.”
Ini nga tagna nagakatuman na subong. Nadalahig ikaw sa sini bangod ang maayong balita isa ka pangagda kag paandam. Ginapapili ikaw: Batunon mo ang Ginharian sang Dios ukon pamatukan ini. Ang imo desisyon magaapektar sa imo kabuhi.
Binagbinaga ang sitwasyon sang ginhambal ini ni Jesus. Pila ka adlaw antes sia ginlansang, ginpamangkot sia sang iya mga disipulo parte sa palaabuton. Gusto gid nila mabal-an kon san-o matukod ang Ginharian sang Dios, nga pirme ginahambal ni Jesus. Gusto man nila mabal-an ang parte sa “katapusan sang sistema sang mga butang,” ukon sa iban nga translation, ang “katapusan sang kalibutan.”—Mateo 24:3, Ang Pulong sang Dios, APD.
Bilang sabat, gintagna ni Jesus nga may mga inaway, gutom, peste, kag mga linog bisan diin. Nagsiling man sia nga magalapnag ang pagkamalinapason, patalangon sang butig nga mga manunudlo sang relihion ang madamo nga tawo, kag dumtan kag hingabuton ang matuod nga mga Cristiano. Ini tanan malain nga balita.—Mateo 24:4-13; Lucas 21:11.
Pero may maayo man nga balita. Ginhambal dayon ni Jesus ang mga tinaga nga makita sa ibabaw, nga nagpalibog kag naghatag sing paglaum sa mga tawo sa sulod sang mga siglo. Nagaugyunay ang mga tawo nga importante ang ginsiling ni Jesus, pero ginabaisan nila ang kahulugan sini. Ano gid bala ang maayong balita? Ano ang Ginharian? San-o ini matuman? Sin-o ang magatuman sini? Kag ano ang “katapusan”? Binagbinagon naton ini tanan.
[Nota]
^ par. 2 Sa sini nga mga artikulo, ang Mateo 24:14 naghalin sa Ang Biblia, Philippine Bible Society.
[Retrato sa pahina 2, 3]
Ang kopya sang Washington Manuscript sang Apat ka Ebanghelyo. Gindukot ang Mateo 24:14
[Credit Line]
From the book Facsimile of the Washington Manuscript of the Four Gospels in the Freer Collection 1912
