4. Wala sing Pagpalangga

“Ang mga tawo . . . madulaan sing pagpalangga sa ila kapamilya.” —2 TIMOTEO 3:1-3, God’s Word Bible

● Si Chris nagatrabaho sa isa ka grupo nga nagabulig sa mga ginsakit sang ila kapamilya sa North Wales. “Isa ka bes, nagpalapit sa amon ang isa ka babayi nga ginkastigo. Halos indi ko na sia makilala sangsa nakita ko sia sadto,” siling ni Chris. “Nahalitan man ang emosyon sang iban nga babayi, amo nga daw nahuya na sila magtulok sa mga tawo.”

ANO ANG GINAPAKITA SANG MGA REPORT? Sa isa ka pungsod sa Aprika, ginbulubanta nga 1 sa kada 3 ka babayi ang gin-abusuhan sa sekso sang bata pa sila. Ginapakita man sang surbe sa sina nga pungsod nga sobra sa 30 porsiento sang mga lalaki ang nagsiling nga indi malain kon sakiton nila ang ila asawa. Pero, indi lang mga babayi ang ginasakit. Halimbawa, sa Canada, mga 3 sa 10 ka lalaki ang ginasakit ukon ginaabusuhan sang ila asawa.

ANO ANG PILA KA PAGPATI? Halin sang una, may mga tawo nga ginasakit sang ila kapamilya. Subong lang ini ginahatagan sing daku nga atension.

HUSTO BALA INA NGA PAGPATI? Sang nagligad nga mga dekada, may ginhimo nga mga pamaagi para matapna ini nga problema. Pero nabuhinan bala sini ang mga ginasakit sang ila kapamilya? Wala. Labi pa nga nagdamo ang mga tawo nga wala sing pagpalangga sa ila kapamilya.

ANO SA BANTA MO? Nagakatuman bala ang 2 Timoteo 3:1-3? Madamo gid bala ang nagakadulaan sing pagpalangga sa ila kapamilya?

Ang ikalima nga tagna nga nagakatuman subong may kaangtanan sa aton puluy-an, ang duta. Binagbinaga ang ginasiling sang Biblia parte sini.

[Blurb sa pahina 7]

“Ang pagsakit sa kapamilya isa sa pinakagrabe nga krimen nga wala ginareport. Ginabulubanta nga ang isa ka babayi ginasakit anay sing 35 ka beses sang iya bana antes ini magreport sa pulis.”—HUMALAMBAL SANG WALES DOMESTIC ABUSE HELPLINE.