Ang Biblia Nagapabag-o sang Kabuhi

NGAA ginbiyaan sang bantog nga singer ang pagkanta para mangin bug-os tion nga ministro sang relihion? Kag ano ang nakabulig sa isa ka kriminal nga mangin maayo nga pumuluyo bisan pa nagsiling ang judge nga wala na sia sing tsansa nga magbag-o? Basaha ang ila mga eksperiensia.

“Wala sing Makapaulipon sa Duha ka Agalon.”—ANTOLINA ORDEN CASTILLO

NATAWO: 1962

PUNGSOD: SPAIN

KABUHI SANG UNA: ARTISTA KAG SINGER

ANG AKON NAGLIGAD: Natawo ako sa Tresjuncos, isa ka gamay nga lugar sa rehiyon nga ginatawag La Mancha. Mga mangunguma ang amon pamilya. Katoliko si Nanay kag Protestante si Tatay. Gintudluan ako ni Tatay nga tahuron ang Biblia kag nakita ko nga pirme niya ini ginabasa. Pero ginpadaku ako ni Nanay nga Katoliko kag ginaupod niya ako sa Misa kada Domingo.

Sang 15 anyos ako, naghalin ako sa amon lugar kag nag-istar sa Madrid upod sa akon magulang nga babayi. Nahidlaw gid ako sa akon mga ginikanan pero sang ulihi naanad na ako sa kabuhi sa siudad. Sang 17 anyos ako, nakatrabaho ako sing pila ka bulan sa zarzuela, nga isa ka opera sa Spain. Nanamian gid ako diri kag gusto ko mangin artista. Nag-untat ako sa pag-eskwela kag nangin singer sa lainlain nga kompanya sang zarzuela. Nangin nobyo ko ang magulang sang isa ko ka amiga. Pamatyag ko ginbugayan ako sing maayo nga trabaho, kuarta, kag kahagugma.

Naglakbay ako upod sa lainlain nga kompanya sang zarzuela sa bilog nga Spain kag sa iban pa nga pungsod, pareho sang Colombia, Costa Rica, Ecuador, kag Venezuela. Nagkanta man ako upod sa lainlain nga grupo nga bahin sang bantog nga organisasyon sa Madrid nga ginatawag “La movida madrileña.” Ang isa sa mga grupo nga ako ang lead singer nangin madinalag-on gid.

Nanamian ako sang akon obra pero indi ko gusto ang imoral nga ginahimo sang akon kaupdanan. Nabalaka man ako sa akon hitsura kag gusto ko nga maayo pirme ang pagtan-aw sang mga tawo sa akon. Bangod sa sobra nga pagdieta, nagbalatian ako sang anorexia kag bulimia.

Gusto ko gihapon nga mangin artista. Sang ulihi, nabaton ako sa Madrid School of Dramatic Arts. Gintudluan kami nga sa pag-arte, dapat hunahunaon sing maayo sang isa ka artista ang ginabatyag sang karakter. Sang ginsunod ko ini, narealisar ko nga nagapakunokuno  lang ako kag ginauna ko lang ang akon kaugalingon.

KON PAANO GINBAG-O SANG BIBLIA ANG AKON KABUHI: Kinahanglan ko manikasog para mangin maayo ang akon mga kinaiya. Pero indi ako kahibalo kon diin maumpisa. Gani, nagkadto ako sa isa ka simbahan sa Madrid nga ginakadtuan namon sadto sang akon mga ginikanan. Nangamuyo man ako sa Dios nga nagagamit sang iya ngalan nga Jehova.

Wala madugay, nagkadto sa amon balay ang duha ka Saksi ni Jehova. Nanamian ako makighambal sa ila parte sa Biblia, pero madamo man ako sing wala ginaugyunan sa ila mga panudlo. Si Esther, ang Saksi nga nagatudlo sa akon sa Biblia, mapinasensiahon gid. Palangga gid niya ako kag sang iya pamilya. Nagtambong ako sa mga pagtilipon sang mga Saksi kag narealisar ko nga nakita ko na ang kamatuoran.

Sang nakatapos ako sang dramatic arts, gintanyagan ako sing madamo nga oportunidad. Ginpili ako nga mangin bahin sang isa ka palaguaon sa bantog nga teatro sang Madrid. Pero narealisar ko nga para mangin madinalag-on nga artista, dapat isentro ko diri ang akon kabuhi. Gani nagpangita ako sang trabaho nga indi makasablag sa akon pag-alagad sa Dios. Matuod gid ang ginsiling ni Jesus: “Wala sing makapaulipon sa duha ka agalon; kay dumtan niya ang isa kag higugmaon ang isa, ukon unungan niya ang isa kag tamayon ang isa. Indi kamo makapaulipon sa Dios kag sa Manggad.” (Mateo 6:24) Ang akon nobyo sa sulod sang walo ka tuig indi interesado sa akon ginapatihan, gani ginbulagan ko sia. Tanan ini indi gid mahapos himuon.

MGA BENEPISYO: Subong, nagatrabaho ako sing part-time sa pagbulig sa mga tigulang. Paagi sini, madamo ako sing tion sa pagtudlo sang Biblia sa mga tawo nga nagahambal sing Arabic sa amon lugar. Bisan kinahanglan ko manikasog sa pagtuon sini nga lenguahe, nalipay ako sa pagsugid sang akon mga natun-an sa mga tawo nga gusto magtuon parte sa Dios.

Indi pareho sang una sang nagaeskwela pa lang ako para mangin artista, may katuyuan na subong ang akon kabuhi. Ginbuligan gid ako ni Jehova nga mangin mas maayo kag mas malipayon.

“Napamatud-an Ko nga Sala ang Judge.”—PAUL KEVIN RUBERY

NATAWO: 1954

PUNGSOD: ENGLAND

KABUHI SANG UNA: KRIMINAL

ANG AKON NAGLIGAD: Natawo ako sa Dudley, isa ka daku kag mainuswagon nga banwa sa West Midlands. Ginpadaku ako ni Tatay nga mangin mahuyugon sa pagbasa. Ginsilingan man niya ako nga apresyahon ang mga butang sa palibot, pero nagapati sia nga bangod ini sa ebolusyon. Gintudluan niya ako nga wala sing Dios. Bisan pa sini, ginapatambong ako sang akon mga ginikanan sa Sunday school sang mga Metodista sa amon lugar.

 Sang otso anyos ako, nakita ko nga ginasunog sang pila ka bata nga lalaki sa amon lugar ang baruto sa dulungkaan. Nag-abot ang mga pulis, pero nahadlok ako manugid kay ginpahog ako sang mga bata. Ako ang ginpasibangdan kag naakig gid ako. Bangod sini, naghimo ako sing bandalismo sa mga eskwelahan, simbahan, kag mga pabrika, nga nagresulta sa linibo ka dolyar nga kahalitan. Sang dies anyos ako, nagpangawat ako sa mga balay kag mga balaligyaan. Madamo man ako sing ginpangsunog. Sa eskwelahan, nagsiling ang akon mga manunudlo nga kadungol gid sa akon.

Sang 12 anyos ako, nabasa ko ang isa ka libro parte sa espiritismo kag naghimo ako sang Ouija board. Bangod wala nagapati sa Dios ang akon mga ginikanan, abi nila indi malain ang espiritismo kag makabulig ini sa akon nga malikawan ang gamo. Pero sang nag-untat ako sa pag-eskwela, madamo nga beses nga nag-atubang ako sa juvenile court. Nag-entra ako sa mapintas nga grupo nga ginatawag skinheads. Labaha kag kadena sang bisikleta ang akon armas. Nakakita ako sing obra pero wala man ako nagdugay kay napriso ako. Sang ginhilway ako, nanghalit naman ako sa mga propiedad amo nga gindakop ako kag ginpriso sing duha ka tuig. Nagsiling ang judge nga makatalagam ako kag wala na sing tsansa nga magbag-o.

Sang ginpagua ako, nakigkita ako sa akon nobya sadto nga si Anita. Nagpakasal kami, kag gin-untatan ko ang pagpangawat kag pagpanggamo. Pero pagligad sang pila ka tuig, naghimo naman ako sing krimen. Nagpangawat ako sa mga balaligyaan, nagdroga, nagpahubog, kag naghupot sing pusil. Gindakop naman ako kag ginpriso.

Bangod sa akon ginpanghimo, grabe gid ang stress ni Anita. Ginresetahan sia sang doktor sang tranquilizer pero ginsilingan sia nga magaayo lang sia kon bulagan niya ako. Maayo lang kay wala niya ako ginbulagan.

KON PAANO GINBAG-O SANG BIBLIA ANG AKON KABUHI: Sang bag-o pa lang kami nakasal, nagtuon si Anita sing Biblia sa mga Saksi ni Jehova pero nauntat ini. Sang malapit na lang matapos ang akon sentensia, naistorya sia liwat sang mga Saksi. Natabuan man nga sina mismo nga adlaw, nangamuyo ako sa Dios, “Kon matuod nga nagaluntad ka, pamatud-i ini sa akon.”

Pila ka bulan sang ulihi, ginhilway ako kag gin-istorya ko ang pari sa amon lugar. Ginpangabay ko sia nga tudluan kami ni Anita sa Biblia. Pero nagsiling sia nga tudluan lang niya kami sang mga kredo kag isa ka pangamuyo.

Sang ulihi, ginbasa ko ang Biblia. Nakibot gid ako sang natun-an ko nga ginapakamalaut sang Biblia ang espiritismo. (Deuteronomio 18:10-12) Nabasa ko man ang kopya sang Ang Lalantawan nga ginbilin sang mga Saksi kay Anita sang adlaw nga nangamuyo ako sa Dios nga buligan Niya ako. Bangod sini, ginkontak ko ang mga Saksi.

Wala nalipay ang amon pamilya, mga abyan, kag mga upod ko nga kriminal sa amon pagtuon sang Biblia sa mga Saksi ni Jehova. Siling sang iban, na-brainwash ako. Pero ang matuod, kinahanglan gid man matinluan ang akon hunahuna. Madamo ako sing malain nga batasan kag kabalan pa. Magluwas sa iban ko nga bisyo, maubos ko ang 60 ka sigarilyo kada adlaw. Mapinasensiahon gid kag mainayuhon ang mga Saksi nga nagbulig sa amon sa pagtuon sang Biblia kag ang iban pa nga Saksi sa kongregasyon. Sang ulihi, nadula ko gid man ang akon malain nga mga batasan.—2 Corinto 7:1.

MGA BENEPISYO: Subong, 35 ka tuig na kami ni Anita nga mag-asawa. Ang amon bata nga babayi kag duha ka apo nagaalagad man kay Jehova. Sining karon lang, mas daku na ang amon tion ni Anita sa pagbulig sa iban nga makatuon parte sa Biblia.

Ang pag-alagad kay Jehova nga Dios naghatag sing matuod nga kahulugan kag katuyuan sa amon kabuhi. Sadtong 1970, nagsiling ang judge nga wala na ako sing tsansa nga magbag-o. Pero sa bulig sang Dios kag sang Biblia, napamatud-an ko nga sala ang judge.