Pagtudlo sa Kabataan Parte sa Dios—Ano nga Pamaagi ang Pinakaepektibo?

“Ining mga pulong nga ginasugo ko sa imo karon nga adlaw mangin yara sa imo tagipusuon; kag ipatudok mo ini sa imo anak kag ihambal mo ini kon nagapungko ka sa imo balay kag kon nagalakat ka sa dalan kag kon nagahigda ka kag kon nagabangon ka.”—DEUTERONOMIO 6:6, 7, NW.

ANG mga ginikanan nabudlayan kon kaisa magtudlo sa ila kabataan. Kon mangayo sila sing laygay, mahimo maligban pa gid sila sa kadamo sang panugda nga ila mabatian ukon mabasahan. Sa masami, nagahatag gilayon sing laygay ang ila mga paryente kag mga abyan. Makita man sa mga libro, magasin, kag Internet ang mga laygay nga wala nagaugyunay.

Pero lain gid ang Biblia. Wala lamang ini nagahatag sa mga ginikanan sing masaligan nga laygay kon ano ang itudlo sa ila kabataan kundi sing praktikal man nga instruksion kon paano sila tudluan. Ginapakita sang bersikulo sa ibabaw nga dapat mangita sing paagi ang mga ginikanan nga tudluan ang ila kabataan parte sa Dios kada adlaw. Binagbinagon naton ang apat ka panugda sang Biblia nga nakabulig sa madamo nga ginikanan sa pagtudlo sa ila kabataan parte sa Dios.

1. Magtuon sa mga tinuga. Si apostol Pablo nagsulat nga ‘ang di-makita nga mga kinaiya sang Dios, bisan ang iya dayon nga gahom kag pagka-Dios, maathag nga makita kutob sang pagtuga sa kalibutan, bangod mahantop ini sa mga butang nga gintuga.’ (Roma 1:20) Kon ginatudlo sang mga ginikanan sa ila kabataan ang mga kinaiya sang Dios nga makita sa mga tinuga, mangin suod ang ila kabataan sa Dios.

Gingamit ni Jesus ini nga pamaagi sang gintudluan niya ang iya mga disipulo. Halimbawa, nagsiling sia: “Tan-awa sing maayo ang mga pispis sa langit, kay wala sila nagasab-ug sang binhi ukon nagaani ukon nagatipon sa mga tambubo; apang ginapakaon sila sang inyo langitnon nga Amay. Indi bala mas importante pa kamo sangsa ila?” (Mateo 6:26) Ginpakita diri ni Jesus sa iya mga disipulo nga si Jehova nga Dios mahigugmaon kag maluluy-on. Gintudlo man niya sa ila kon paano ginpakita sang Dios ini nga mga kinaiya sa iya mga anak.

Gintudlo ni Hari Solomon ang leksion parte sa kaalam nga ginhatag sang Dios sa mga subay. “Kadto sa subay, ikaw nga matamad,” siling niya, “patugsilingi ang iya mga dalanon, kag magmaalam. Sa wala sing pangolo,  manugtatap, ukon manuggahum, nagatigana sia sang iya tinapay sa tingadlaw, kag nagatipon sang iya kalan-on sa tig-alani.” (Hulubaton 6:6-8) Epektibo gid ini nga pamaagi para itudlo nga importante ang pagplano sing mapuslanon nga mga hilikuton kag lab-uton ini sa bulig sang ikasarang nga ginhatag sang Dios!

Mailog sang mga ginikanan ang epektibo nga panudlo ni Jesus kag ni Solomon paagi sa (1) pagpamangkot sa ila kabataan kon ano nga mga tanom kag kasapatan ang nanamian nila, (2) pagtuon sa sini nga mga tanom kag kasapatan, kag (3) paghibalo kon ano ang ginatudlo sini parte sa Dios.

2. Iluga ang pagpakig-angot ni Jesus sa iya mga gintudluan. Mas madamo sing nahibaluan si Jesus sangsa iban nga tawo. Pero pirme sia nagapamangkot kay interesado sia sa ginahunahuna kag ginabatyag sang iya mga ginatudluan. (Mateo 17:24, 25; Marcos 8:27-29) Madamo man sing importante nga leksion nga matudlo ang mga ginikanan sa ila kabataan. Pero para mangin epektibo, dapat nila ilugon si Jesus kag pahambalon ang ila kabataan kon ano ang ila ginabatyag.

Paano kon salawayon ang kabataan ukon indi dayon makaintiende sang ginatudlo? Binagbinaga ang pagpakig-angot ni Jesus sa iya mga apostoles, nga nagbaisay sing pila ka beses kag wala dayon makarealisar nga dapat sila magpaubos. Nangin mapinasensiahon si Jesus kag sulitsulit sila nga gintudluan nga magpaubos. (Marcos 9:33, 34; Lucas 9:46-48; 22:24, 25) Ginailog sang mga ginikanan si Jesus kon mapinasensiahon nila nga ginatadlong ang ila kabataan, kag sulitsulit sila nga ginatudluan asta makaintiende. *

3. Magtudlo paagi sa halimbawa. Makatuon ang mga ginikanan sa laygay ni apostol Pablo sa mga Cristiano sa Roma. Nagsiling sia: “Apang, ikaw nga nagatudlo sa iban, wala ka bala nagatudlo sa imo kaugalingon? Ikaw nga nagabantala nga ‘Indi magpangawat,’ nagapangawat ka bala?”—Roma 2:21.

Nagakaigo gid ini nga laygay kay mas madumduman sang kabataan, indi ang ginahambal, kundi ang ginahimo sang ila ginikanan. Ang matuod, kon ginahimo sang mga ginikanan ang ila ginatudlo, mangin mas matinumanon ang ila kabataan.

4. Tudlui samtang bata pa. Si Timoteo nga kaupod ni apostol Pablo sa pagmisyonero may maayo nga reputasyon. (Binuhatan 16:1, 2) “Kutob sa pagkalapsag” gintudluan sia sang “balaan nga mga sinulatan.” Wala lamang sia ginbasahan sang Kasulatan sang iya iloy kag lola kundi ginpaintiende man sa iya ang mga kamatuoran sa sini.—2 Timoteo 1:5; 3:14, 15.

Ano ang Makabulig?

Ang mga Saksi ni Jehova nagahimo sang mga publikasyon nga makabulig sa mga ginikanan sa pagtudlo sa ila kabataan sing kamatuoran parte sa Dios. Ang iban sini ginhimo para sa magagmay nga kabataan. Ang iban naman makabulig sa mga ginikanan kag sa ila tin-edyer nga mangin maayo ang ila komunikasyon. *

Siempre, antes magtudlo ang mga ginikanan parte sa Dios, dapat nila mahibaluan ang mga sabat sa mabudlay nga mga pamangkot sang ila kabataan. Halimbawa: Ngaa ginatugutan sang Dios ang pag-antos? Ano ang katuyuan sang Dios sa duta? Diin ang mga patay? Nalipay gid ang mga Saksi ni Jehova nga isugid sa imo ang mga sabat sa sini kag sa iban pa nga pamangkot. Makabulig ini sa imo kag sa imo pamilya nga mangin suod sa Dios.—Santiago 4:8.

[Mga Nota]