Pamangkot sang mga Bumalasa . . .

Ano ang Armagedon?

▪ Para sa madamo, ang tinaga nga “Armagedon” nagapatuhoy sa daku nga kalaglagan, pareho sang nuklear nga inaway, mga kalamidad, ukon pagkaguba sang palibot bangod sa pag-init sang globo. Pero indi amo sini ang kahulugan sang Armagedon sa Biblia. Kon amo, ano ang Armagedon suno sa Biblia?

Ang tinaga nga “Armagedon” (“Har–Magedon”) makita sa tulun-an sang Bugna. Nagapatuhoy ini sa pinasahi nga inaway, ang “inaway sang daku nga adlaw sang Dios nga Labing Gamhanan,” diin ang “mga hari sang bug-os napuy-an nga duta” nagahanda para sa katapusan nga inaway batok sa Dios. Ini nga sahi sang inaway mabasa man sa iban nga bersikulo.—Bugna 16:14-16; Ezequiel 38:22, 23; Joel 3:12-14; Lucas 21:34, 35; 2 Pedro 3:11, 12.

Ano ang resulta sini nga inaway? Ang tulun-an sang Bugna malaragwayon nga nagasiling: “Ang mga hari sang duta kag ang ila mga kasuldadusan . . . nagtipon agod magpakig-away sa isa nga nagasakay sa kabayo kag sa iya kasuldadusan.” Ang “isa nga nagasakay sa kabayo” amo ang Anak sang Dios, si Jesucristo, nga ginpili sang Dios para pangunahan ang tuman kadamo nga anghel sa paglaglag sa mga kaaway sang Dios. (Bugna 19:11-16, 19-21) Ginapakita sang Jeremias 25:33 kon daw ano kadamo nga malauton ang malaglag: “Ang pinatay sang GINOO sa sadto nga adlaw manginkutub sa isa ka ukbung sang duta tubtub gid sa isa ka ukbung sang duta.”

Ngaa kinahanglan ang Armagedon? Bangod wala ginkilala sang mga pungsod ang pagkasoberano sang Dios, sa baylo ginpakilala nila ang ila paggahom. (Salmo 24:1) Ginapakita ini sang Salmo 2:2: “Ang mga hari sang duta nagapahamtang sang ila kaugalingon, kag ang mga manuggahum nagahilisapul sing tingub, batok sa GINOO kag sa iya hinaplas.”

Ginapahangop sini nga daw gin-angkon kag ginhalitan sining mga rebelde ang propiedad nga indi ila. Subong, wala lang ginaguba sang mga pungsod ang duta kundi ginahigkuan pa ini. Gintagna sang Biblia ining makapasubo nga kahimtangan: “Nagsingkal ang mga pungsod, kag nag-abot ang [iya sang Dios] nga kasingkal.” Dayon, ‘laglagon sang Dios ang mga nagalaglag sang duta.’ (Bugna 11:18) Gani, ang Armagedon amo ang paagi sang Dios para masolbar ang isyu kon sin-o ang may kinamatarong sa paggahom sa katawhan.—Salmo 83:18.

San-o mahanabo ang Armagedon? Ang Anak sang Dios nagsiling: “Tuhoy sa amo nga adlaw kag oras wala sing nakahibalo, bisan pa ang mga anghel sa langit ukon ang Anak, kundi ang Amay lamang.” (Mateo 24:36) Pero parte sa Armagedon, ang Hari nga si Jesucristo nagpaandam: “Yari karon! Magaabot ako subong sang kawatan. Malipayon ang isa nga nagapabilin nga nagamata.” (Bugna 16:15) Gani, ining inaway sa bilog nga kalibutan naangot sa mga hitabo sa pagkari sang Cristo, nga nagakatuman na subong suno sa gintagna sang Biblia.

Ang mga hungod lamang nga nagahimo sing malain ang laglagon sa Armagedon. Pero, may “isa ka dakung kadam-an” nga maluwas. (Bugna 7:9-14) Maeksperiensiahan nila ang ginasiling sang Salmo 37:10, 11: “Sa diotay pa nga tion, kag ang malauton wala na; bisan talupangdon mo sing makugihon ang iya duug, wala na sia didto. Apang ang mapainubuson magapanubli sang duta, kag magakalipay sila sa kabuganaan sang paghidait.”

[Blurb sa pahina 10]

“Ang mapainubuson magapanubli sang duta, kag magakalipay sila sa kabuganaan sang paghidait”