Ngaa Dapat Sundon ang mga Prinsipio sang Biblia?

ANG pagtamod bala sang Biblia parte sa sex indi na uso kag sobra ka estrikto? Indi. Sa baylo, makabulig ini sa aton nga malikawan ang:

▪ Mga balatian nga nagalaton paagi sa pag-sex

▪ Pagbusong nga indi kasal

▪ Pagkaguba sang pag-asawahay

▪ Pagtublag sang konsiensia

▪ Pagkangil-ad sa kaugalingon

Gusto sang aton Manunuga, si Jehova nga Dios, * nga makabenepisyo kita sa iya mga regalo. Ang Dios amo ang “nagatudlo sa imo sa kapuslanan.” (Isaias 48:17) Kon sundon sang isa ang mga prinsipio sang Biblia parte sa sex, matigayon niya ang:

▪ Kahamuot sang Dios

▪ Kalinong

▪ Mabakod nga pamilya

▪ Maayo nga reputasyon

▪ Respeto sa kaugalingon

Pero paano kon wala mo pa ginasunod ang mga prinsipio sang Biblia? Posible bala nga mabag-o mo ang imo kabuhi? Dumdumon pa bala sang Dios ang imo mga sala sang una?

Binagbinaga: Ang pila ka miembro sang Cristianong kongregasyon sang unang siglo mga makihilawason, makihilahion, kag homoseksuwal. Pero ginbag-o nila ang ila kabuhi, kag nakabenepisyo sila sa sini. (1 Corinto 6:9-11)  Subong, linibo man sa bilog nga kalibutan ang nagbiya sang ila imoral nga pagkabuhi kag naeksperiensiahan nila ang mga benepisyo sang ginsunod nila ang mga prinsipio sang Biblia. Ang isa ka halimbawa amo si Sarah, nga ginsambit sa una nga artikulo.

“Nalugpayan Dayon Ako”

Narealisar ni Sarah nga indi mahatag sang iya imoral nga pagkabuhi ang kahilwayan kag kalipay nga iya ginahandum. “Daw nakibulan na ang akon konsiensia,” siling niya. “Nahuya ako kag nahadlok kay basi magbusong ako ukon matapikan sang balatian. Nagapati gihapon ako nga may Dios, kag nahibaluan ko nga nasakitan sia sa akon ginahimo. Kahigko sa akon kag daw wala na sing pulos.”

Sang ulihi, nangin determinado si Sarah nga magbag-o. Nangayo sia sing bulig sa iya mga ginikanan nga mga Saksi ni Jehova. Nangayo man sia sing bulig sa Cristiano nga mga gulang ukon manugdumala sa ila kongregasyon. “Nalipay gid ako sa kaayo kag pagpalangga sang akon mga ginikanan kag sang mga gulang,” siling ni Sarah. “Nalugpayan dayon ako.”

Subong, si Sarah may duha na ka bata. “Ginasugid ko sa akon kabataan,” siling ni Sarah, “ang mga ginhimo ko sadto. Ginapaintiende ko sa ila nga malain gid ang resulta kon balewalaon ang mga prinsipio sang Dios. Gusto ko nga maapresyar nila ang pisikal, mental, kag emosyonal nga mga benepisyo sang pagsunod sa mga prinsipio sang Dios parte sa sex. Nagapati ako nga ginahatagan kita sang Dios sang mga prinsipio sa moral bangod indi niya gusto nga mahalitan kita.”

Makabenepisyo ka man kon sundon mo ang Dios. Ang Biblia nagapromisa: “Ang mga pagtolon-an sang GINOO matarung, nga nagapasadya sa tagiposoon; ang sogo sang GINOO putli, nga nagapasanag sang mga mata. . . . Sa pagbantay sa ila may dakung balus.”—Salmo 19:8, 11. *

[Mga Nota]

[Blurb sa pahina 8]

Ang pagbalewala sa mga prinsipio sang Biblia masami nagaresulta sa kasakit sang balatyagon

[Blurb sa pahina 9]

Ang mga nagasunod sa mga prinsipio sang Biblia may matinlo nga konsiensia kag mabakod nga pamilya