Magtuon sa Pulong sang Dios

Paano Kita Makabenepisyo sa mga Kasuguan sang Dios?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ngaa dapat naton tumanon ang Dios?

Dapat naton tumanon ang Dios kay sia ang nagtuga sa aton. Bisan gani si Jesus pirme nagatuman sa Dios. (Juan 6:38; Bugna 4:11) Ginahigugma naton ang Dios kon ginatuman naton ang iya kasuguan.—Basaha ang 1 Juan 5:3.

Ang tanan nga kasuguan ni Jehova nga Dios para sa aton kaayuhan. Nagatudlo ini sa aton sang pinakamaayo nga pagkabuhi subong kag kon paano matigayon ang wala katapusan nga mga pagpakamaayo sa palaabuton.—Basaha ang Salmo 19:7, 11; Isaias 48:17, 18.

2. Paano ang kasuguan sang Dios makabulig sa aton ikaayong lawas?

Ang kasuguan sang Dios nga nagadumili sa pagpahubog makaamlig sa aton sa makamamatay nga balatian kag sa mga aksidente. Ang sobra nga pag-inom makaaladik kag nagaresulta sa paghimo sing malain. (Hulubaton 23:20, 29, 30) Pero, ang haganhagan nga pag-inom ginatugutan ni Jehova.—Basaha ang Salmo 104:15; 1 Corinto 6:10.

Ginapaandaman man kita ni Jehova batok sa kahisa, grabe nga kaakig, kag iban pa nga malain nga batasan. Mangin maayo ang aton panglawas kon sundon naton ang iya laygay.—Basaha ang Hulubaton 14:30; 22:24, 25.

3. Paano ang kasuguan sang Dios makaamlig sa aton?

Ginadumilian sang kasuguan sang Dios ang pag-sex sang indi mag-asawa. (Hebreo 13:4) Mas maayo ang pag-updanay sang mga mag-asawa nga nagatuman sini kag maatipan nila sing maayo ang ila kabataan. Pero ang paglapas sini nagaresulta sa balatian, pagbulagay, pag-antos, kasakit sa emosyon, kag mga pamilya nga may nagasolo nga ginikanan.—Basaha ang Hulubaton 5:1-9.

Kon ginalikawan naton ang mga tentasyon, ginaamligan naton ang aton kaangtanan sa Dios. Ginalikawan man naton nga mahalitan ang iban.—Basaha ang 1 Tesalonica 4:3-6.

 4. Ano ang mga benepisyo kon ginarespeto naton ang kabuhi?

Ang mga tawo nga nagarespeto sa regalo sang Dios nga kabuhi may maayo nga panglawas kon untatan nila ang pagpanigarilyo kag iban pa nga bisyo. (2 Corinto 7:1) Ginapabaloran sang Dios bisan ang kabuhi sang wala pa matawo nga lapsag. (Exodo 21:22, 23) Gani indi ini dapat pag-ipahulog. Ginahalungan man sang mga tawo ang kabuhi kon luwas sa katalagman ang ila ulubrahan, puluy-an, kag salakyan. (Deuteronomio 22:8) Wala man nila ginarisgo ang ila kabuhi sa mga sport, kay ang kabuhi regalo sang Dios.—Basaha ang Salmo 36:9.

5. Ano ang mga benepisyo kon tamdon naton nga sagrado ang dugo?

Ang dugo sagrado kay nagsiling ang Dios nga nagarepresentar ini sa kabuhi, ukon kalag, sang isa ka tinuga. (Genesis 9:3, 4) Sa kasuguan sang Dios, pareho ang balor sang dugo kag kabuhi, kag makabenepisyo kita sa sini. Paano? Paagi sini, mapatawad sang Dios ang aton mga sala.—Basaha ang Levitico 17:11-13; Hebreo 9:22.

Ang dugo ni Jesus may daku gid nga balor bangod perpekto sia. Ginhalad niya sa Dios ang iya dugo, nga nagarepresentar sa iya kabuhi. (Hebreo 9:12) Paagi sa iya dugo, mahimo naton matigayon ang kabuhi nga wala sing katapusan.—Basaha ang Mateo 26:28; Juan 3:16.

Para sa dugang nga impormasyon, basaha ang kapitulo 12 kag 13 sini nga libro, Ano Gid ang Ginatudlo Sang Biblia?, nga ginhimo sang mga Saksi ni Jehova.