“Ang mahalongon nga tawo nakakita sang malaut kag nagapanago sia; apang ang kulangkulang nagapadayon, kag nagaantus tungud sini,” siling sang Biblia. (Hulubaton 22:3) Ini nga laygay makabulig kon may kalamidad. Kon may paandam nga magalupok ang bulkan, magabaha, ukon may maabot nga bagyo, maalamon nga magsaylo dayon sa lugar nga luwas sa katalagman. Mas importante ang kabuhi sangsa balay ukon iban pa nga pagkabutang.

Ang iban wala nag-istar sa lugar nga pirme may kalamidad. Ang isa ka awtoridad nagsiling: “Ang daku nga halit sang kalamidad nagadepende sa lokasyon. Ang pila ka bahin sang Duta delikado istaran kag kalabanan sang dalagku nga mga kalamidad matabo sa sini nga mga lugar.” Ang halimbawa sini amo ang manubo nga mga lugar nga malapit sa baybay ukon mga lugar nga ginaagyan sang linog. Para indi ka gawa mahalitan sang mga kalamidad, mas maayo nga likawan mo ang pag-istar sa sini nga mga lugar.

Bisan pa nagahalong ka, posible nga mangin biktima ka gihapon sang wala ginapaabot nga kalamidad. Mas mahapos ang pag-atubang sini kon nagplano ka sing abanse. Nagasanto ini sa laygay kaina sang Hulubaton 22:3. Nakahanda ka na bala sang puede dalhon kon may emerhensia? Ginarekomendar sang publikasyon nga 1-2-3 of Disaster Education ang mga masunod: Mga suplay para sa first-aid, tubig, indi mapan-os nga mga pagkaon, kag importante nga mga dokumento. Maayo man nga istoryahan sang inyo pamilya ang mga kalamidad nga mahimo matabo kag kon ano ang dapat himuon.

Makabulig ini sa tanan nga tion. Ginalaragway sang Biblia ang Dios bilang “Amay nga may mapinalanggaon nga kaluoy kag ang Dios nga may bug-os nga paglugpay, nga nagalugpay sa aton sa tanan naton nga kapipit-an.” Suno sa isa pa ka bersikulo, sia ang Dios “nga nagalugpay sa mga napung-awan.”—2 Corinto 1:3, 4; 7:6.

Nahibaluan sang Dios ang kahimtangan sang mga nagasalig sa iya. Mahigugmaon sia kag nagalugpay sa madamo nga paagi. (1 Juan 4:8) Ang pagpangamuyo, indi sang milagro kundi sang balaan nga espiritu sang Dios, makabulig gid. Paagi sa balaan nga espiritu,  madumduman sang isa ang lugpay sang Biblia sa mga nagaatubang sang kabudlayan. Mabatyagan man sang matutom nga mga alagad sang Dios ang ginsiling ni Hari David sang Israel sang una: “Bisan nagalatas ako sang nalupyakan sang landong sang kamatayon, wala ako sing kahadlukan nga malaut; kay ikaw kaupud nakon; ang imo sungkud kag ang imo itulukud, nagalipay sila sa akon.”—Salmo 23:4.

Sang unang siglo, ang Cristiano nga propeta nga si Agabo nagsiling nga “malapit na mag-abot ang daku nga tiggulutom sa bug-os napuy-an nga duta; nga natabo gid man sa tion ni Claudio.” Grabe gid ang epekto sini nga tiggulutom sa madamo nga disipulo ni Jesus sa Judea. Ano ang ginhimo sang iban nga disipulo sang nabalitaan nila ang kabudlayan sang pareho nila nga mga Cristiano? Nagpadala sila sing bulig. Aton mabasa: “Namat-od ang mga disipulo nga ang tagsatagsa sa ila suno sa iya masarangan, mag-alagad paagi sa pagpadala sing bulig sa mga kauturan nga nagapuyo sa Judea.”—Binuhatan 11:28, 29.

Subong, ginahimo man ini sang mga alagad sang Dios kon may mga kalamidad. Kilala ang mga Saksi ni Jehova sa pagbulig sa pareho nila nga mga Saksi. Halimbawa, sang gintay-ug sang mabaskog nga linog ang Chile sang Pebrero 27, 2010, ginbuligan dayon sang mga Saksi ni Jehova ang mga biktima. Si Karla, nga nadulaan sang balay bangod sa tsunami, nagsiling: “Nalipay gid ako kay pagkaaga nag-abot dayon [ang pareho ko nga mga Saksi] halin sa iban nga lugar para buligan kami. Ginlugpayan kami ni Jehova paagi sa ila kaayo. Nabatyagan ko ang pagpalangga kag pag-ulikid ni Jehova.” Ang iya lolo nga indi Saksi nakanutar kon paano sila ginbuligan. Nagsiling sia: “Wala ko gid ini makita sa amon relihion.” Bangod sini, nagtuon sia sing Biblia sa mga Saksi ni Jehova.

Kon may mga kabudlayan, makabulig gid ang pagpakig-upod sa mga nagahigugma sa Dios. Pero maabot pa bala ang tion nga madula na ang mga kalamidad? Hibaluon naton ang ginasiling sang Biblia.