San-o Maabot ang Inaway sa Armagedon?

“Nagtulok ako, kag, yari karon! isa ka dakung kadam-an, nga wala sing tawo nga makaisip, gikan sa tanan nga pungsod kag tribo kag katawhan kag hambal . . . naggua gikan sa dakung kapipit-an.”—BUGNA 7:9, 14.

MALAPIT na lang mag-abot ang inaway sa Armagedon. Paano?

Sa bilog nga kalibutan, may mga tawo na nga nagaalagad kay Jehova kag nagasunod sa mga prinsipio sang Biblia sa moral. Sa bulig sang Dios, minilyon ka tawo halin sa lainlain nga pungsod, tribo, kag lenguahe ang nahiusa bilang mga mag-ulutod. Ini nga paghiusa makita sa mga Saksi ni Jehova.—Juan 13:35.

Sa indi madugay, tipunon ni Satanas ang iya mga sakop para himuon ang iya pinakamabaskog nga pagsalakay sa sining mahidaiton kag daw wala sing depensa nga mga tawo. (Ezequiel 38:8-12; Bugna 16:13, 14, 16) Paano mo mapat-od ini? Ginasugid sang Biblia ang mga hitabo nga makabulig sa aton nga mahibaluan kon san-o maabot ang inaway sa Armagedon. Madamo sini ang nagakatuman na subong.

Mga Hitabo nga Nagakatuman Na

Ginpamangkot si Jesus sang iya mga disipulo kon paano mahibaluan sang mga tawo nga malapit na ang “katapusan sang sistema sang mga butang.” (Mateo 24:3) Ginsugid ni Jesus ang panahon diin “ang pungsod magatindog batok sa pungsod kag ang ginharian batok sa ginharian, kag may kakulang sa kalan-on kag mga linog sa nagkalainlain nga duog.” Nagsiling pa sia: “Ini tanan nga butang pamuno sang pagpasakit.” (Mateo 24:7, 8) Ginlaragway ni apostol Pablo ini nga panahon subong “katapusan nga mga adlaw” nga ‘makahalanguyos kag mabudlay atubangon.’ (2 Timoteo 3:1) Indi bala nga nagakatabo na ini subong?

Ngaa mabudlay gid ini nga panahon? Ginsugid ni apostol Juan ang rason. Gintagna niya nga ‘malip-ot lamang ang tion’ ni Satanas kag sang iya mga demonyo sa paghimo  sang ila hilikuton sa duta. Sini nga tion, ‘daku ang kaakig’ ni Satanas. (Bugna 12:7-12) Natalupangdan mo bala nga maakigon man kag mapintas ang mga tawo subong, indi lamang sa isa ka lugar kundi sa bilog nga kalibutan?

Nagsiling man si Jesus nga himuon sa sining mabudlay nga panahon ang isa ka pinasahi nga hilikuton. “Ining maayong balita sang ginharian [sang Dios],” siling niya, “ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mateo 24:14) Subong, sa sobra 235 ka kadutaan, ginawali sang mga Saksi ni Jehova ang maayong balita sang Ginharian sang Dios sa sobra 500 ka lenguahe. Ang duha nila ka balasahon nga nabase sa Biblia, ang Lalantawan kag Magmata!, amo ang pinakalapnag nga magasin nga ginapanagtag sa bilog nga kalibutan. Gin-translate man sang mga Saksi ang Biblia sa mga 100 ka lenguahe. Ang ila hilikuton ginahimo sang mga boluntaryo kag ginasuportahan sang boluntaryo nga mga donasyon. Indi ayhan nga ining daku nga hilikuton sa pagwali katumanan sang tagna ni Jesus?

Ginapakita man sang Biblia ang mga hitabo nga nagadul-ong sa inaway ni Jehova nga Dios kag sang mga nagapamatok sa iya. Binagbinaga ang tatlo sini nga mga tagna.

Mga Hitabo nga Matuman sa Indi Madugay

Tagna 1. Suno sa Biblia, ang mga pungsod magapagua sang importante nga deklarasyon sang “paghidait kag kalig-unan.” Mahimo nagadumdom sila nga malapit na nila masolbar ang panguna nga mga problema sang kalibutan. Pero ginapakita sang masunod nga mga hitabo nga indi nila mapaluntad ang paghidait.—1 Tesalonica 5:1-3.

Tagna 2. Dayon, salakayon sang mga gobierno ang mga relihion sa kalibutan. Sa Biblia, ini nga mga gobierno ginasimbuluhan sang mabangis nga sapat; kag ang butig nga mga relihion ginasimbuluhan sang babayi nga nagasakay sa sapat. (Bugna 17:3, 15-18) Wala hinalung-ong ang sapat nga ginahimo na sini ang gusto sang Dios nga himuon sini—ang paglaglag sa mga relihion nga nagapangangkon nga nagarepresentar sa Dios.

Si apostol Juan nagsiling: “Ang napulo ka sungay nga nakita mo, kag ang mabangis nga sapat, ini magadumot sa makihilawason nga babayi kag magahapay kag magapahubo sa iya, kag magakaon sang iya unod kag magasunog sa iya sing bug-os sa kalayo. Kay ginbutang sang Dios sa ila tagipusuon ang paghimo sang iya hunahuna.”—Bugna 17:16, 17.

Tagna 3. Pagkatapos sining madinalag-on nga pagsalakay sa butig nga mga relihion, tipunon ni Satanas ang mga pungsod para salakayon ang mga sumilimba ni Jehova nga Dios.—Bugna 7:14; Mateo 24:21.

Paano Ini Makaapektar sa Imo?

Kon wala mo pa matun-an sing maayo ang Biblia, mahimo indi ka magpati nga matabo ini nga mga butang. Pero makasalig ka nga ini nga mga hitabo malapit na matuman. Ginapamatud-an ini sang madamo nga tagna sa Biblia nga natuman na. *

Mahimo mo pamangkuton ang mga Saksi ni Jehova kon ngaa kumbinsido sila nga ang “inaway sang daku nga adlaw sang Dios nga Labing Gamhanan” malapit na kag kon ngaa indi ka dapat mahadlok sa sini. Pangabaya sila nga ipaathag sa imo ang ginasiling sang Biblia nga himuon mo para malakip sa mga tawo nga proteksionan ni Jehova nga Dios. (Bugna 16:14) Ang imo matun-an makapabag-o sang imo pagtamod sa palaabuton.

[Nota]

[Blurb sa pahina 8]

Katumanan bala sang tagna sa Biblia ang hilikuton sang mga Saksi ni Jehova?