▪ Madamo sing paathag parte sa doktrina nga Trinidad. Ari ang isa sa sini: “Tatlo ka balaan nga Persona (ang Amay, ang Anak, ang Espiritu Santo), ang kada isa wala sing katapusan, ang kada isa labing gamhanan, ang kada isa tupong, ang kada isa Dios, apang sila tanan isa lang ka Dios.” Ginatudlo bala ini sang Biblia?

Ginagamit sa masami ang Mateo 28:19 para pamatud-an ini nga doktrina. Amo sini ang pagbadbad sang Biblia nga Ang Pulong sang Dios sa ginsiling ni Jesus: “Gani kadtui ninyo ang mga tawo sa tanan nga nasyon. . . . Bautisohan ninyo sila sa ngalan sang Amay, sang Anak, kag sang Espiritu Santo.” Matuod, ginsambit sa sini nga bersikulo ang Amay, ang Anak, kag ang espiritu santo (balaan nga espiritu). Pero wala ginsiling nga isa sila. Ginsugo diri ni Jesus ang iya Judiyo nga mga sumulunod nga tudluan kag bawtismuhan ang mga tawo sa ngalan sang Amay, sang Anak, kag sang balaan nga espiritu. Ano ang ginapatihan sang mga Judiyo bilang isa ka pungsod?

Sang ginbaton sang pungsod sang Israel ang Kasuguan nga katipan, nga nangin bahin sang Biblia, ginsugo sila: “Dili ka maghuput sing iban nga mga dios sa atubangan ko.” (Deuteronomio 5:7) Pila ka persona ang nagahambal diri? Ang Deuteronomio 6:4 maathag nga nagasiling: “Pamatii, O Israel: ang GINOO nga aton Dios, isa ka GINOO lamang”—kag indi Dios nga may tatlo ka persona. Bag-o lang nahilway ang Israel sa Egipto, diin ang isa sa trinidad nga mga dios nga sanday Osiris, Isis, kag Horus (makita sa wala) ginasimba didto. Gani, ginsugo ang Israel nga magsimba sa isa lamang ka Dios. Ngaa importante gid nga mahangpan sang mga tawo ini nga sugo? Ang rabbi nga si Dr. J. H. Hertz nagsiling: “Ining maathag nga pagsambit sang pagsimba sa isa lamang ka dios isa ka deklarasyon sang inaway batok sa tanan nga pagsimba sa madamo nga dios . . . Wala ginlakip sa Shema ang trinidad nga doktrina sang mga Cristiano kay supak ini sa panudlo nga isa lamang ang Dios.” *

Bangod Judiyo si Jesus, gintudluan sia nga tumanon ini nga sugo. Sang ginsulay sia sang Yawa sa tapos sia mabawtismuhan, nagsiling sia: “Palayo ka, Satanas! Kay nasulat na, ‘Si Jehova nga imo Dios ang dapat mo simbahon, kag sa iya ka lamang dapat maghimo sang sagrado nga pag-alagad.’” (Mateo 4:10; Deuteronomio 6:13) May matun-an kita sa sini nga hitabo. Una, gintinguhaan ni Satanas nga sulayon si Jesus nga magsimba sa iban luwas kay Jehova, nga mangin kaladlawan kon si Jesus amo man ang Dios. Ikaduha, paagi sa pagsiling nga sa ‘iya lamang,’ gin-athag ni Jesus nga may isa lamang ka Dios nga dapat simbahon. Wala sia nagsiling nga sa “amon,” nga mahimo ginsambit niya kon bahin sia sang Trinidad.

Kon matun-an sang mga tawo ang sibu nga ihibalo parte sa Dios kag mag-alagad sa iya, ginabawtismuhan sila “sa ngalan sang Amay kag sang Anak kag sang balaan nga espiritu.” (Mateo 28:19) Naintiendihan nila kag ginabaton ang awtoridad ni Jehova kag ang papel ni Jesucristo sa katumanan sang katuyuan ni Jehova. (Salmo 83:18; Mateo 28:18) Nahangpan man nila ang papel sang balaan nga espiritu sang Dios, nga amo ang iya aktibo nga puersa.—Genesis 1:2; Galacia 5:22, 23; 2 Pedro 1:21.

Ang doktrina nga Trinidad madugay na nga nagapalibog sa mga tawo. Pero ang mga sumulunod ni Jesus naathagan kay gintudluan niya sila nga may isa ‘lamang ka matuod nga Dios,’ si Jehova.—Juan 17:3.

[Nota]

[Picture Credit Line sa pahina 23]

Musée du Louvre, Paris