“Maghigugmaanay Kamo”

“Nagahatag ako sa inyo sang isa ka bag-o nga sugo, nga maghigugmaanay kamo; subong nga ako nagahigugma sa inyo, maghigugmaanay man kamo. Paagi sa sini ang tanan makahibalo nga kamo mga disipulo ko, kon nagahigugmaanay kamo.”—JUAN 13:34, 35.

Ano ang Buot Silingon Sini? Ginsilingan ni Jesus ang iya mga sumulunod nga maghigugmaanay pareho sa paghigugma niya sa ila. Paano sila ginhigugma ni Jesus? Indi pareho sa mga tawo sang iya panahon, wala niya ginpakanubo ang iban nga rasa kag ang mga babayi. (Juan 4:7-10) Ginsakripisyo niya ang iya tion, kusog, kag kasulhayan para buligan ang iban. (Marcos 6:30-34) Ginpakita man niya ang iya pinakadaku nga gugma. “Ako ang maayo nga manugbantay,” siling niya. “Ginahatag sang maayo nga manugbantay ang iya kalag para sa mga karnero.”—Juan 10:11.

Paano Ini Ginpakita sang mga Cristiano sang Una? Sang unang siglo, gintawag sang mga Cristiano ang isa kag isa nga “utod.” (Filemon 1, 2) Ang mga tawo sa tanan nga pungsod ginbaton sa Cristiano nga kongregasyon, kay nagapati sila nga “wala sing kinatuhayan sa ulot sang Judiyo kag sang Griego, kay may isa lamang ka Ginuo sa tanan.” (Roma 10:11, 12) Pagkatapos sang Pentecostes 33 C.E., “ginpamaligya [sang mga disipulo sa Jerusalem] ang ila duta kag mga pagkabutang kag ginpanagtag ang bili sa tanan, suno sa kinahanglan sang tagsatagsa.” Ngaa? Para ang mga bag-o nabawtismuhan makapabilin sa Jerusalem kag makapadayon “sa paghugod sa panudlo sang mga apostoles.” (Binuhatan 2:41-45) Ano ang nagpahulag sa ila nga himuon ini? Mga 200 ka tuig sa tapos napatay ang mga apostoles, ginsambit ni Tertullian ang ginsiling sang iban parte sa mga Cristiano: “Ginhigugma gid nila ang isa kag isa . . . kag handa sila mapatay para sa tagsatagsa.”

Sin-o ang Nagapakita Sini Subong? Ang libro nga The History of the Decline and Fall of the Roman Empire (1837) nagsiling nga sa sulod sang ginatos ka tuig, ang nagapangangkon nga mga Cristiano “nakaeksperiensia sing grabe nga kapintas halin sa isa kag isa, sangsa indi nila karelihion.” Nadiskobrehan man sa isa ka pagtuon sa Estados Unidos sining karon lang nga madamo nga relihioso—kalabanan nagapangangkon nga Cristiano—ang nagapakanubo sa iban nga rasa. Ang mga tumuluo sa isa ka lugar masami nga wala sing labot sa ila karelihion sa iban nga lugar kag wala nagabuligay kon may mga problema.

Sang 2004, sa tapos ginlaslas sang apat ka bagyo ang Florida sa sulod sang duha ka bulan, gin-usisa sang tsirman sang Emergency Operations Committee sang Florida kon nagamit sing maayo ang ila mga suplay. Suno sa iya, wala sing iban nga grupo nga pareho ka organisado sa mga Saksi ni Jehova, kag nagtanyag sia sang suplay nga kinahanglanon sang mga Saksi. Sang 1997, ang isa ka grupo sang mga Saksi ni Jehova nga may dala nga mga bulong, pagkaon, kag mga bayo nagkadto sa Democratic Republic of Congo para buligan ang ila Cristiano nga mga kauturan kag ang iban pa. Ang mga Saksi sa Europa nagdonar man sang mga suplay nga nagabalor sing isa ka milyon ka dolyar.