“Magpabilin Kamo sa Akon Pulong”

“Kon magpabilin kamo sa akon pulong, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.”—JUAN 8:31, 32.

Ano ang Buot Silingon Sini? Ang “pulong” ni Jesus nagakahulugan sang iya mga panudlo, nga naghalin sa isa nga mas mataas sa iya. “Ang Amay nga nagpadala sa akon nagsugo sa akon kon ano ang isiling kag kon ano ang ihambal,” siling ni Jesus. (Juan 12:49) Sang nangamuyo sia sa iya Amay sa langit, nga si Jehova nga Dios, si Jesus nagsiling: “Ang imo pulong kamatuoran.” Ginabase pirme ni Jesus ang iya mga panudlo sa Pulong sang Dios. (Juan 17:17; Mateo 4:4, 7, 10) Gani ang matuod nga mga Cristiano ‘nagapabilin sa iya pulong,’ ukon nagabaton sa Pulong sang Dios, ang Biblia, subong “kamatuoran,” nga amo lamang ang basihan sang ila mga pagpati kag ginahimo.

Paano Ini Ginpakita sang mga Cristiano sang Una? Pareho kay Jesus, ginarespeto man sang Cristiano nga manunulat sang Biblia nga si apostol Pablo ang Pulong sang Dios. Nagsulat sia: “Ang pagsulat sa bug-os nga Kasulatan gintuytuyan sang Dios kag mapuslanon.” (2 Timoteo 3:16) Ginsugo ang mga lalaki nga nagatudlo sa pareho nila nga mga Cristiano nga ‘huptan sing maayo ang matuod kag masaligan nga mga pulong.’ (Tito 1:7, 9, Ang Pulong sang Dios, APD) Ginlaygayan ang mga Cristiano sang una nga isikway ang “pilosopiya kag wala pulos nga daya suno sa tradisyon sang mga tawo, suno sa nahauna nga mga butang sang kalibutan kag indi suno kay Cristo.”—Colosas 2:8.

Sin-o ang Nagapakita Sini Subong? Ang Dogmatic Constitution on Divine Revelation sang Vatican, nga gingamit sang 1965 kag ginsambit sa Catechism of the Catholic Church, nagsiling: “Indi lang ang Sagrado nga Kasulatan ang ginbasihan sang [Katoliko nga] Simbahan sang tanan nga butang nga ginpahayag. Gani ang sagrado nga tradisyon kag Sagrado nga Kasulatan pareho nga ginabaton kag ginarespeto.” Ginsambit sa isa ka artikulo sang magasin nga Maclean’s ang pamangkot sang isa ka ministro sa Toronto, Canada: “Ngaa mapagiya pa kita sa mga sinulatan sang nagligad nga duha ka milenyo? May maayo kita nga mga ideya, pero wala nagauswag kay ginasunod naton ang ginasiling ni Jesus kag sang Kasulatan.”

Parte sa mga Saksi ni Jehova, ang New Catholic Encyclopedia nagsiling: “Ginabase gid nila sa Biblia ang ila mga pagpati kag mga prinsipio.” Sining karon lang, sa Canada, samtang nagapakilala ang isa ka Saksi ni Jehova sa isa ka tawo, ang tawo nagsiling: “Kilala ko na ikaw, kay nagagamit ka sang Biblia.”