Malain Bala ang Espiritismo?

Pamatan-on pa lang si Barbara, * nakakita na sia sing mga palanan-awon, nakabati sang mga tingog, kag nagapati nga naistorya niya ang ila mga minatay. Nagabasa sila sang iya bana nga si Joachim sang mga libro parte sa espiritismo kag nangin eksperto sa pagbasa sang mga baraha. Ginpakita sang mga baraha nga makaganar sila sing daku nga kuarta, kag natabo ini sang nagnegosyo sila. Isa ka adlaw, ginpaandaman sila sini nga may malain nga mga tawo nga makadto sa ila balay kag ginsugid man sini ang ila himuon para makapangapin.

BISAN pa ang pagpati sa espiritismo daw dinumaan na, madamo gihapon ang interesado sa sini. Nagagamit sila sang mga anting-anting kag mga Ouija board, kag nagakadto sa mga espiritista para hibaluon ang ila kapalaran ukon para maproteksionan sila sa mga malain. Sa artikulo nga “Laptop kag Lucifer,” ang German nga magasin nga Focus nagsiling: “Ginapukaw pa gid sang Internet ang interes sang mga tawo sa espiritismo.”

Nahibaluan mo bala nga may ginasiling ang Biblia parte sa espiritismo? Mahimo makibot ka sa ginasiling sini.

Ang Ginasiling sang Biblia Parte sa Espiritismo

Ang kasuguan nga ginhatag sang Dios sa iya katawhan sa dumaan nga Israel nagasiling: “Manginwalay makita sa imo nga . . . bisan sin-o nga nagagamit sing pagpamakot, ang manuglagpat, ukon manugbabaylan, ukon diwatahan, ukon manugtiwtiw, ukon manugpagowa sa mga espiritu, ukon salamangkero, ukon manugpamangkot sa mga napatay. Kay ang bisan sin-o nga nagahimo sining mga butang kangil-aran sa GINOO.” (Deuteronomio 18:10-12) Ngaa ginapakamalaut sang kasuguan sang Dios ang espiritismo?

Pareho sa eksperiensia nga ginsambit sa umpisa, madamo ang nagapati nga puede maistorya ang mga patay kag puede sila makuhaan sing impormasyon paagi sa espiritismo. Ini nga pagpati naghalin sa panudlo sang madamo nga relihion, nga ang patay padayon nga nagakabuhi sa lugar sang mga espiritu. Pero supak ini sa maathag nga ginasiling sang Biblia: “Ang patay wala makahibalo sang bisan ano.” (Manugwali 9:5) Nagsiling man ini nga ang patay daw nagatulog sing mahamuok, nga wala gid nakahibalo  sang nagakatabo sa iya palibot. * (Mateo 9:18, 24; Juan 11:11-14) Pero mahimo mamangkot ka, Ti ngaa may mga tawo nga nakaistorya sa mga espiritu? Ano ang rason sina?

Pagpakig-istorya sa mga Espiritu

Ginapakita sang Ebanghelyo nga sang diri si Jesus sa duta, naistorya niya ang mga espiritu. Ginsugid sang Marcos 1:23, 24 nga ang “di-matinlo nga espiritu” nagsiling kay Jesus: “Nakahibalo gid ako kon sin-o ka.” Nahibaluan man sang mga espiritu kon sin-o ka. Pero nahibaluan mo bala kon sin-o sila?

Antes gintuga sang Dios ang mga tawo, nagtuga sia sang madamo nga espiritu nga anak, ukon mga anghel. (Job 38:4-7) Ang mga anghel mga persona nga labaw sa mga tawo. (Hebreo 2:6, 7) Gamhanan sila kag maalam katama, kag gintuga sila para himuon ang kabubut-on sang Dios. Ang salmista nagkanta: “Dayawa ninyo ang GINOO, kamo nga gamhanan niya nga mga anghel nga . . . nagatuman sang iya mga pulong.”—Salmo 103:20, APD.

Ginapakita sang Biblia nga may mga anghel nga nakig-istorya sa mga tawo bisan wala sila ginsugo sang Dios. Ngaa ginhimo nila ini? Ang una nga naghimo sini nagdaya sa una nga mga tawo nga sanday Adan kag Eva para ipahilayo sila sa ila Dios kag Manunuga. Bangod sini, gintawag sia nga Satanas nga Yawa, ang manugpasipala kag manugpamatok sa Dios.—Genesis 3:1-6.

Sang ulihi, ang iban nga anghel “wala magpabilin sa ila orihinal nga kahimtangan” sa langit. Nagpakatawo sila kag nagpuyo upod sa matahom nga mga babayi sa duta. (Judas 6; Genesis 6:1, 2) Mapintas gid ining rebelde nga mga anghel kag ang ila higante nga mga anak, gani ang “kalautan naglapta sa kalibutan.” Mahimo nahibaluan mo ang kasaysayan sa Biblia kon paano ginlaglag sang Dios ang mapintas kag malaut nga henerasyon paagi sa Anaw sang panahon ni Noe.—Genesis 6:3, 4, 11-13, APD.

Bangod sa baha, napilitan ang mga anghel nga ubahon ang ila tawhanon nga lawas kag nangin espiritu liwat. Pero wala sila gintugutan sang Manunuga nga magbalik sa ila orihinal nga “kahimtangan.” Kundi ginbutang sila sa miserable nga kahimtangan nga mapaanggid sa “mga buho sang mangitungito nga kadudulman.” (2 Pedro 2:4, 5) Ining rebelde nga mga anghel gintawag sang Biblia nga “mga demonyo.” (Santiago 2:19) Sila ang sa likod sang espiritismo.

Ang Gusto sang mga Demonyo

Ang una nga katuyuan sang malaut nga mga espiritu sa pagpakig-istorya sa mga tawo amo nga ilikaw sila sa pagsimba sa matuod nga Dios, si Jehova. Ang ikasarang ukon gahom nga ginapangangkon sang mga espiritista magapugong lamang sa mga tawo sa pagkuha sang sibu nga ihibalo parte sa Dios kag magsuod sa iya.

Ang ikaduha nila nga katuyuan makita sang si Jesus ginsulay sang lider sang mga demonyo nga si Satanas. Gintanyag ni Satanas kay Jesus “ang tanan nga ginharian sang kalibutan kag ang ila himaya.” Ano ang gusto ni Satanas nga kabaylo sini? “Magyaub ka kag maghimo sang isa ka buhat sang pagsimba sa akon,” siling niya. Gusto ni Satanas kag sang mga demonyo nga simbahon sila. Pero wala gintalikdan ni Jesus ang Dios kag ang matuod nga pagsimba.—Mateo 4:8-10.

 Subong, ang malaut nga mga espiritu talagsa na lang nagapakig-istorya sing direkta sa mga tawo. Sa baylo ginadaya nila ang mga inosente paagi sa mga butang nga daw kalingawan lang, pareho sang paggamit sang mga bola nga kristal, dahon-dahon, baraha, pendulum, kag mga horoscope. Indi magpadaya sa sini! Ini nga mga buhat indi lamang mga paagi para makontak ang mga espiritu. Ginagamit man ini sang malaut nga mga espiritu para ganyaton kag siuron ang mga tawo, kay gusto nila nga mapahilayo sila sa pagsimba kay Jehova. Kon indi sila magmadinalag-on, ginasakit nila kag ginapabudlayan ang ila nabiktima. Kon amo sini ang imo kahimtangan, ano ang himuon mo para makapalagyo sa ila impluwensia?

Kon Paano Makapalagyo sa Espiritismo

Tandai gid nga ang mga espiritu nga nagapakig-istorya sa mga tawo mga kaaway sang Dios nga malapit na laglagon. (Judas 6) Mga manugpatalang sila kag butigon, nga nagapakunokuno nga sila ang napatay. Ano ang batyagon mo kon ang abi mo nga abyan isa gali ka manugtonto nga indi interesado sa imo kaayuhan? Ano ang reaksion mo kon nadiskobrehan mo nga ang tawo nga imo nakilala sa Internet nagapanghimulos sa sekso? Mas makahalalit pa sa sini ang ginahimo sang mga demonyo kon masiod ka nila. Kinahanglan mo himuon ang imo masarangan para mag-untat sila. Paano?

Sa tapos matun-an ang ginasiling sang Kasulatan parte sa espiritismo, narealisar sang pila ka pumuluyo sa Efeso sang una nga kinahanglan nila gub-on ang ila mga libro parte sa mga madyik, bisan pa mahal ini katama. “Ginsunog [nila] ini sa atubangan sang tanan.” (Binuhatan 19:19, 20) Subong, luwas sa mga libro, anting-anting, Ouija board, kag iban pa, ginagamit man sa espiritismo ang moderno nga teknolohiya. Likawi ang tanan nga butang nga mahimo may labot sa espiritismo.

Balikan naton ang mag-asawa nga ginsambit sa umpisa. Nabasa nila sa mga baraha nga may makatalagam nga mga tawo nga makadto sa ila balay kag indi sila dapat mamati sa ila ukon magbaton sang ila ihatag. Pero pag-abot sang mga Saksi ni Jehova nga sanday Connie kag Gudrun sa ila balay kag nagsiling nga nagawali sila sang maayong balita parte sa Dios, namati sanday Joachim kag Barbara. Sang ulihi naistoryahan nila ang parte sa espiritismo, kag ginpakita sa ila nanday Connie kag Gudrun ang ginasiling sang Biblia parte sini. Nasugdan ang regular nga pagtuon sa Biblia.

Sang ulihi, gin-untatan nanday Joachim kag Barbara ang pagpakig-angot sa mga demonyo. Ginpaathag sang mga Saksi nga mahimo maakig sa sini ang malaut nga mga espiritu. Ginbudlayan matuod sanday Joachim kag Barbara kag nag-antos sila sa pag-atake sang mga demonyo. Ginakulbaan sila kada gab-i kag naghaganhagan lang ini sang nagsaylo sila sing balay. Sa pihak sini tanan, nagsalig sila sa ginasiling sang Filipos 4:13: “Sa tanan nga butang may kusog ako paagi sa iya nga nagapabakod sa akon.” Ginpakamaayo ni Jehova ang ila determinasyon kag gin-untatan na sila sang mga demonyo. Subong, sanday Joachim kag Barbara malipayon na nga mga sumilimba sang matuod nga Dios, si Jehova.

Ginsilingan sang Biblia ang tanan nga luyag pakamaayuhon ni Jehova: “Magpasakop kamo sa Dios; apang pamatuki ang Yawa, kag magapalagyo sia sa inyo. Magpalapit kamo sa Dios, kag magapalapit sia sa inyo.” (Santiago 4:7, 8) Si Jehova makasarang kag handa magbulig sa imo nga makapalagyo sa impluwensia sang demonyo, kon luyag mo. Kon madumduman nanday Joachim kag Barbara kon paano sila nahilway sa espiritismo, nagaugyon gid sila sa ginasiling sang Salmo 121:2 (NW): “Ang akon bulig nagahalin kay Jehova.”

[Mga Nota]

[Blurb sa pahina 21]

Ang espiritismo nagapugong sa mga tawo nga matigayon ang maayo nga relasyon sa Dios

[Blurb sa pahina 22]

“Magpalapit kamo sa Dios, kag magapalapit sia sa inyo.”—SANTIAGO 4:8