Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Paano dapat dumdumon ang kamatayon ni Jesus?

Ginsilingan ni Jesus ang iya mga sumulunod nga dumdumon ang iya kamatayon paagi sa isa ka panihapon, nga nagagamit sang tinapay kag alak. Ang tinapay nagarepresentar sa lawas ni Jesus, kag ang alak sa iya dugo.—Basaha ang Lucas 22:19, 20.

Ang tinapay nga gingamit ni Jesus wala sing pangpakumbo, ukon lebadura. Sa Biblia, ang lebadura masami nagarepresentar sa sala. Gani ang tinapay nagakaigo gid nga simbulo sa perpekto nga lawas ni Jesus. Paagi sa paghalad sang iya lawas, nauntat na ang paghalad sang mga sapat nga ginapatuman sang Mosaikong Kasuguan ukon kasuguan nga ginhatag sang Dios kay Moises. (Hebreo 10:5, 9, 10) Ang alak nagarepresentar sa hamili nga dugo ni Jesus nga ginhalad para sa aton mga sala.—Basaha ang 1 Pedro 1:19; 2:24; 3:18.

2. San-o naton dapat saulugon ang kamatayon ni Jesus?

Napatay si Jesus sang Paskua sang Nisan 14. Ang adlaw sang mga Judiyo nagasugod sa pagtunod sang adlaw. Sang gab-i antes napatay si Jesus, nagkaon sia upod sa iya mga apostoles sang panihapon sang Paskua kag dayon ginsugdan niya ang isa ka bag-o nga panihapon nga mangin sulundan sa pagsaulog sang iya kamatayon.—Basaha ang Lucas 22:14, 15.

Ginasaulog sang katawhan sang Dios karon ang gin-aman sang Dios paagi kay Jesus para mahilway ang mga tawo sa sala kag kamatayon. (Exodo 12:5-7, 13, 17) Subong nga ang Paskua ginaselebrar sing makaisa kada tuig, ang anibersaryo sang kamatayon ni Jesus ginaselebrar man sing makaisa kada tuig sa pagtunod sang adlaw sa Nisan 14 suno sa lunar nga kalendaryo sang Biblia.—Basaha ang Juan 1:29.

 3. Sin-o ang dapat magkaon sang tinapay kag mag-inom sang alak?

Sang ginpasa ni Jesus ang alak sa iya mga sumulunod, nagsiling sia: “Ini nga kopa nagakahulugan sang bag-o nga katipan.” (1 Corinto 11:25) Ang bag-o nga katipan nagbulos sa Mosaikong Kasuguan, diin nagpromisa ang Dios sa mga Israelinhon nga mangin katawhan niya sila kon tumanon nila sia. (Exodo 19:5, 6) Pero wala gintuman sang mga Israelinhon ang Dios. Gani nag-aman si Jehova sang bag-o nga katipan.—Basaha ang Jeremias 31:31.

Pakamaayuhon ni Jehova ang madamo paagi sa pila ka indibiduwal nga sakop sang bag-o nga katipan, nga may kabilugan nga 144,000. Paagi sa ila, matigayon sang minilyon gikan sa tanan nga pungsod ang kabuhi nga wala sing katapusan sa paraiso sa duta. Ang pila nga sakop sang bag-o nga katipan nagaalagad subong kay Jehova diri sa duta. Sila lamang ang magakaon sang tinapay kag magainom sang alak bangod ang kopa “nagakahulugan sang bag-o nga katipan.”—Basaha ang Lucas 12:32; Bugna 14:1, 3.

4. Paano kita makabenepisyo sa anibersaryo sang kamatayon ni Jesus?

Paagi sa anibersaryo sang kamatayon ni Jesus, maapresyar pa gid naton ang daku nga gugma ni Jehova. Ginpadala niya ang iya Anak agod mapatay para sa aton mga sala. Gani kon magtambong kita sa sini nga selebrasyon, dapat naton pamalandungan ang balor sang kamatayon ni Jesus para sa aton. Dapat man naton binagbinagon kon paano mapakita ang aton apresasyon sa ginhimo ni Jehova kag ni Jesus para sa aton.—Basaha ang Juan 3:16; 2 Corinto 5:14, 15.

Para sa dugang nga impormasyon, basaha ang pahina 206-208 sini nga libro, Ano Gid ang Ginatudlo Sang Biblia? nga ginhimo sang mga Saksi ni Jehova.