Pag-istoryahanay Parte sa Biblia—Si Jesus Bala ang Dios?

ANG mga Saksi ni Jehova nanamian gid mag-istorya sa iban parte sa Biblia. May mga pamangkot ka man bala parte sa Biblia? Gusto mo bala mabal-an ang mga pagpati sang mga Saksi ni Jehova kag kon paano sila nagasimba? Kon amo, indi ka mahuya nga ipamangkot ini sa ila kon magkadto sila sa inyo. Nalipay gid sila nga ipaathag ini sa imo.

Ang masunod amo ang kinaandan nga pagpakig-istorya sang mga Saksi ni Jehova. Ibutang ta nga ang Saksi nga si Karen nagkadto kanday Samantha.

Matuod Bala nga Wala Kamo Nagapati kay Jesus?

Samantha: Siling sang pastor namon ang mga Saksi ni Jehova wala nagapati kay Jesus. Tuod ’na?

Karen: Nagapati kami kay Jesus. Ang matuod nagapati kami nga kinahanglan ang pagtuo kay Jesus para maluwas.

Samantha: Ako man.

Karen: Kon amo, pareho kita. Ako gali si Karen. Ikaw ’ya?

Samantha: Ako si Samantha.

Karen: Nalipay ako nga makilala ka. Siguro mamangkot ka, ‘Kon ang mga Saksi ni Jehova nagapati kay Jesus, ngaa nagasiling ang iban nga wala sila nagapati sa iya?’

Samantha: Gani man. Ngaa haw?

Karen: Nagatuo gid kami kay Jesus, pero wala kami nagapati sa tanan nga ginasugid sang mga tawo parte sa iya.

Samantha: Pareho sang ano ’bi?

Karen: Ang iban nagasiling nga si Jesus isa lang ka maayo nga tawo. Pero wala kami nagaugyon sina.

Samantha: Ako man gani.

Karen: Isa pa, ang mga Saksi ni Jehova wala nagaugyon sa mga panudlo nga nagakontradik sa ginsiling mismo ni Jesus parte sa iya kaangtanan sa iya Amay.

Samantha: Ano ang buot mo silingon man?

Karen: Ginatudlo sang madamo nga relihion nga si Jesus ang Dios. Basi amo man ’na guro ang ginapatihan mo.

Samantha: Huo, nagsiling si Pastor nga ang Dios kag si Jesus isa lang.

Karen: Pero indi bala nga mas maayo kon hibaluon ta ang ginsiling ni Jesus parte sa iya kaugalingon para mahibaluan naton ang kamatuoran parte sa iya?

Samantha: Huo no.

Ano ang Ginsiling ni Jesus?

Karen: Basahon ta bala ang ginasiling sang Biblia sa Juan 6:38. Si Jesus nagsiling: “Nagpanaug ako gikan sa langit agod himuon, indi ang akon kabubut-on, kundi ang kabubut-on sang nagpadala sa akon.” Ini nga bersikulo indi santu kon si Jesus ang Dios.

 Samantha: Ngaa?

Karen: Kay nagsiling si Jesus nga wala sia nagpanaug gikan sa langit para himuon ang iya kabubut-on.

Samantha: Tsakto no. Nagsiling sia nga nagkari sia para himuon ang kabubut-on sang Isa nga nagpadala sa iya.

Karen: Kag kon si Jesus ang Dios, sin-o ang nagpadala sa iya gikan sa langit? Isa pa, ngaa nagpasugot sia nga himuon ang kabubut-on sinang Isa?

Samantha: Daw naintiendihan ko na. Pero isa man lang ka teksto ang naghambal sina.

Karen: Ari pa ang isa nga ginsiling ni Jesus. Palihug bala basa sang Juan 7:16.

Samantha: “Si Jesus nagsabat sa ila kag nagsiling: ‘Ang akon ginatudlo indi akon, kundi iya sang nagpadala sa akon.’”

Karen: Salamat. Sa ginbasa mo, gintudlo bala ni Jesus ang iya mga ideya?

Samantha: Wala, nagsiling sia nga ang iya ginatudlo iya sang Isa nga nagpadala sa iya.

Karen: Husto. Kon amo, mahimo mamangkot kita: ‘Sin-o ang nagpadala kay Jesus? Kag sin-o ang naghatag sa iya sang mga kamatuoran nga itudlo niya?’ Indi ayhan nga inang Isa mas daku pa kay Jesus? Kag indi bala nga ang nagpadala labaw pa sangsa ginpadala?

Samantha: Huo no. Subong ko pa lang nabasa ini nga bersikulo.

Karen: Binagbinaga man ang ginsiling ni Jesus sa Juan 14:28: “Nabatian ninyo nga nagsiling ako sa inyo, Malakat ako kag mabalik sa inyo. Kon ginahigugma gid ninyo ako, magakasadya kamo nga makadto ako sa Amay, bangod ang Amay daku pa sa akon.” Suno diri, sin-o ang mas daku? Si Jesus ukon ang iya Amay?

Samantha: Ti siling da, ang Amay kuno.

Karen: Husto. May ginsiling pa gid si Jesus sa iya mga disipulo sa Mateo 28:18: “Ginhatag sa akon ang bug-os nga awtoridad sa langit kag sa duta.” Nagsiling bala diri si Jesus nga halin sang una may awtoridad na sia?

Samantha: Wala, kundi nagsiling sia nga ginhatag lang ini sa iya.

Karen: Kay kon si Jesus ang Dios, ngaa ginhatagan pa sia sing dugang nga awtoridad? Kag sin-o ang naghatag sini sa iya?

Samantha: Daw wala ko na ’ya napensaran haw.

Sin-o ang Iya Ginaistorya?

Karen: May isa pa ka butang nga makalilibog kon si Jesus ang Dios.

Samantha: Ano ina?

Karen: Parte ini sa pagbawtismo kay Jesus. Palihug bala basa sang Lucas 3:21, 22.

Samantha: “Karon sang nabawtismuhan na ang tanan nga tawo, ginbawtismuhan man si Jesus kag samtang nagapangamuyo sia, ang langit nabuksan kag nagkunsad sa iya ang balaan nga espiritu nga kaangay sa salampati, kag may tingog gikan sa langit: ‘Ikaw ang akon Anak, ang hinigugma; ginakahamut-an ko ikaw.’”

Karen: Ti, ano kuno ang ginhimo ni Jesus sang ginbawtismuhan sia?

Samantha: Nagapangamuyo sia.

Karen: Tsakto. Pero mahimo kita mamangkot, ‘Kon si Jesus ang Dios, kay sin-o sia nagapangamuyo?’

Samantha: Ipamangkot ko ’na bala kay Pastor.

Karen: Sa tapos mabawtismuhan si Jesus, may Isa nga naghambal gikan sa langit. Ano gani ang Iya ginsiling?

Samantha: Nagsiling sia nga si Jesus amo ang Iya Anak, nga Iya ginahigugma kag ginakahamut-an.

Karen: Husto. Pero kon si Jesus ang Dios, sin-o ang naghambal gikan sa langit?

Samantha: Tuod no. Daw wala ko gid ’na napensaran ba.

 Ngaa “Amay” kag “Anak”?

Karen: Nabasa man naton nga gintawag ni Jesus ang Dios nga iya Amay sa langit. Kag sang ginbawtismuhan sia, may tingog halin sa langit nga nagasiling nga si Jesus Anak Niya. Matuod ina kay gintawag ni Jesus ang iya kaugalingon nga Anak sang Dios. Karon, kon gusto mo paguaon nga pareho ang relasyon sang duha ka tawo, ano nga termino ang imo gamiton?

Samantha: Siguro, mag-utod.

Karen: Husto, ukon puede man nga kapid. Pero gintawag ni Jesus ang Dios bilang Amay kag ang iya kaugalingon bilang Anak. Gani, ano sa banta mo ang buot silingon ni Jesus?

Samantha: A, naintiendihan ko na. May ginatumod si Jesus nga mas magulang kag mas gamhanan sa iya.

Karen: Husto. Pensara bala: Kon ikaw mismo nakahibalo nga mag-utod ukon kapid ang tawag sa duha ka indibiduwal nga pareho ang relasyon, ano pa gid ayhan ang Daku nga Manunudlo nga si Jesus?

Samantha: Huo no.

Karen: Pero gingamit niya ang mga termino nga “Amay” kag “Anak” para mahibaluan naton ang iya kaangtanan sa Dios.

Samantha: Tuod no.

Ano ang Ginsiling sang mga Sumulunod ni Jesus sang Una?

Karen: Kon OK lang sa imo, may isa pa ka butang nga gusto ko ipaathag sa imo parte sini nga topiko.

Samantha: Sige OK lang.

Karen: Kon si Jesus gid man ang Dios, indi bala nga ginsiling ini kuntani sang iya mga disipulo?

Samantha: Gani man.

Karen: Pero wala sing mabasa sa Biblia nga amo sini ang ila gintudlo. Sa baylo, tan-awa bala ang ginsiling sang isa ka sumulunod ni Jesus sang una, nga si apostol Pablo. Sa Filipos 2:9, ginsugid niya ang ginhimo sang Dios sang nabanhaw si Jesus: “Ginbayaw [si Jesus] sang Dios sa mataas gid nga posisyon kag mainayuhon nga ginhatagan sia sing ngalan nga labaw sa tanan iban pa nga ngalan.” Suno diri, ano ang ginhimo sang Dios kay Jesus?

Samantha: Ginsiling diri nga ginbayaw sia sang Dios sa mataas gid nga posisyon.

Karen: Husto. Pero kon si Jesus tupong sa Dios antes sia napatay kag sang ulihi ginbayaw sia sang Dios sa mas mataas nga posisyon, nangin mataas na sia sa Dios e? May mas mataas pa bala sa Dios?

Samantha: Wala e. Imposible na ’ya.

Karen: Tsakto ka. Gani, base sini tanan nga ebidensia, masiling mo bala nga ginatudlo sang Biblia nga si Jesus ang Dios?

Samantha: Indi e. Suno sa Biblia, Anak sia sang Dios.

Karen: Husto. Pero makasalig ka nga wala ginapakanubo sang mga Saksi ni Jehova si Jesus. Nagapati kami nga paagi sa iya kamatayon bilang ginpromisa nga Mesias, mahimo maluwas ang tanan nga katawhan nga matutom sa Dios.

Samantha: Nagapati man ako sina.

Karen: Pero mahimo mamangkot ka, ‘Paano naton mapakita kay Jesus nga ginaapresyar naton ang paghatag niya sang iya kabuhi para sa aton?’ *

Samantha: Huo, gusto ko ’na mabal-an.

Karen: Mabalik ako para isugid sa imo ang sabat sang Biblia. Ari ka lang diri dason semana?

Samantha: Huo, ari lang ko di.

Karen: Sige, mabalik ako.

[Nota]