Nagaalagad ka bala sang una kay Jehova? Nagahunahuna ka bala nga mag-alagad liwat sa iya pero nagaduhaduha ka kon batunon ka pa niya? Palihug basaha sing maayo ini nga artikulo kag ang masunod sini. Ginhanda gid ini para sa imo.

“NANGAMUYO ako kay Jehova nga pabalikon ako kag patawaron sa akon mga sala,” siling sang isa ka babayi nga nag-untat sa pag-alagad sa Dios. Nabatyagan mo bala ang iya ginabatyag? Mahimo mamangkot ka: ‘Ano ang ginabatyag sang Dios sa mga nag-untat sa pag-alagad sa iya? Ginadumdom pa bala niya sila? Gusto bala niya nga magbalik sila?’ Para masabat ina nga mga pamangkot, usisaon naton ang ginsulat ni Jeremias. Makapabakod gid ini sa imo.—Basaha ang Jeremias 31:18-20.

Hunahunaa ang kahimtangan sang ginsulat ini ni Jeremias. Sang 740 B.C.E., pila ka dekada antes sang panahon ni Jeremias, gintugutan ni Jehova nga mabihag sang mga Asirianhon ang napulo ka tribo nga ginharian sang Israel. * Gintugutan ini sang Dios bilang disiplina sa iya katawhan bangod naghimo sila sing mabug-at nga mga sala kag wala namati sa mga paandam sang iya mga propeta. (2 Hari 17:5-18) Nagbag-o bala sila bangod nakaeksperiensia sila sang mga kabudlayan sang gintapok sila, kag napahilayo sa ila Dios kag sa ila pungsod? Nalimtan na bala sila ni Jehova? Pabalikon pa bala niya sila?

“Naghinulsul Ako”

Sang nabihag ang katawhan, nakamarasmas sila kag naghinulsol. Nakita ni Jehova ang ila matuod nga paghinulsol. Binagbinaga ang paglaragway ni Jehova sa ginbatyag sang tinapok nga mga Israelinhon, nga ginpatuhuyan subong Efraim.

“Nabatian ko si Efraim nga nagahaya tungud sa iya kaugalingon,” siling ni Jehova. (Bersikulo 18) Nabatian niya ang pagtuaw sang mga Israelinhon bangod sa ila mga sala. Ang ekspresyon nga “nagahaya tungud sa iya kaugalingon” mahimo nagakahulugan sing “paglungolungo,” siling sang isa ka iskolar. Pareho sila sa rebelde nga anak nga nagalungolungo bangod sa mga kabudlayan nga resulta sang iya ginhimo kag gusto niya balikan ang pagkabuhi sang ara pa sia sa ila balay. (Lucas 15:11-17) Ano ang ginsiling sang katawhan?

“Ginsilotan mo ako . . . subong sang tinday nga baka nga wala maanad sa gota.” (Bersikulo 18) Ginbaton sang katawhan nga dapat sila disiplinahon. Kay pareho sila sang tinday nga baka nga wala maanad sa gota. Mahimo nagakahulugan ini nga ang katawhan pareho sang tinday nga baka nga wala tani “nasuntok kon wala ini nagbato sa gota,” siling sang isa ka reperensia.

“Palisoa ako kag mapaliso ako, kay ikaw amo ang GINOO nga akon Dios.” (Bersikulo 18)  Mapainubuson sila nga nagpanawag sa Dios. Nagpakasala sila, pero nagpakitluoy sila nga kahamut-an liwat sang Dios. Ang isa ka badbad nagasiling: “Ikaw ang amon Dios—palihug pabalika kami.”—Contemporary English Version.

“Naghinulsul ako. . . . nahuya ako, kag nalibogan.” (Bersikulo 19) Naghinulsol ang katawhan kay nakasala sila. Ginbaton nila nga dapat sila manabat sa ila sala. Pareho lang nga ginapukpok nila ang ila dughan sa kahuya kag tuman nga kasubo.—Lucas 15:18, 19, 21.

Mahinulsulon ang mga Israelinhon. Bangod sa ila kasubo, gintu-ad nila ang ila mga sala sa Dios, kag ginbag-o ang ila pagkabuhi. Maluoy bala sa ila ang Dios? Pabalikon bala niya sila?

“Sa Pagkamatuud Magakalooy Ako sa Iya”

Suod gid si Jehova sa mga Israelinhon. Nagsiling sia: “Amay ako sang Israel, kag si Efraim panganay ko.” (Jeremias 31:9) Indi bala pagbatunon sang mahigugmaon nga amay ang iya mahinulsulon nga anak? Talupangda kon paano ginpabutyag ni Jehova ang iya pagpalangga sa iya katawhan.

“Si Efraim bala ang akon pinakamahal nga anak? Pinalangga bala sia nga bata? Kay sa masunsun nga nagapamolong ako batok sa iya, ginapanumdum ko pa sia sing hanuut.” (Bersikulo 20) Makapaumpaw gid ini! Pareho sa estrikto pero mahigugmaon nga ginikanan, naobligar ang Dios nga maghambal “batok” sa iya kabataan, kag sulitsulit nga nagpaandam sa ila mga sala nga ginahimo. Sang wala sila namati, gintugutan sang Dios nga matapok sila—sa amo, ginpahalin sila sa ila pungsod. Pero bisan pa nga gindisiplina niya sila, indi gid niya mahimo nga kalimtan sila. Wala ginakalimtan sang mahigugmaon nga amay ang iya mga anak. Pero, ano ang ginbatyag ni Jehova sang matuod nga naghinulsol ang iya mga anak?

“Ang akon tagiposoon ginahidlaw sa iya; sa pagkamatuud magakalooy ako sa iya.” (Bersikulo 20) Nahidlaw gid si Jehova sa iya mga anak. Natandog ang iya tagipusuon bangod sa ila sinsero nga paghinulsol, kag gusto gid niya nga magbalik sila sa iya. Pareho sang amay sa parabola ni Jesus parte sa rebelde nga anak, “napahulag sang kaluoy” si Jehova kag handa niya nga batunon ang iya mga anak.—Lucas 15:20.

“Ginbaton Ako Liwat ni Jehova!”

Ginapakita sang Jeremias 31:18-20 kon daw ano ka mahigugmaon kag maluluy-on si Jehova. Wala niya ginakalimtan ang mga nag-untat sa pag-alagad sa iya. Ano abi kon gusto nila manumbalik sa iya? Ang Dios “handa sa pagpatawad.” (Salmo 86:5) Indi niya pag-isikway ang mga mahinulsulon nga nagapalapit sa iya. (Salmo 51:17) Sa baylo, nalipay sia nga batunon sila.—Lucas 15:22-24.

Ang babayi nga ginsambit kaina nagtinguha nga magbalik kay Jehova kag nagtambong sa kongregasyon sang mga Saksi ni Jehova sa ila lugar. Sang primero, nagaduhaduha sia. “Daw wala ako sing pulos,” siling niya. Pero ginbuligan sia sang mga gulang sa kongregasyon nga magbakod liwat sa espirituwal. Nagsiling sia: “Nagapasalamat gid ako kay ginbaton ako liwat ni Jehova!”

Kon nag-untat ka sa pag-alagad kay Jehova kag gusto mo nga magbalik sa iya, ginaagda ka namon nga magtambong sa kongregasyon sang mga Saksi ni Jehova sa inyo lugar. Dumduma nga si Jehova mahigugmaon kag maluluy-on kon ang mga mahinulsulon nagapangabay sa iya, “Palihug pabalika kami.”

Bahin sang Biblia nga Mahimo basahon sa Abril:

▪ Jeremias 17-31

[Nota]