Ano ang Dapat Himuon sang mga Cristiano Subong?

ANG matuod nga mga Cristiano subong wala nagaentra sa pulitika. Ngaa? Bangod ginasunod nila ang halimbawa ni Jesus. Nagsiling sia parte sa iya kaugalingon: “Ako indi bahin sang kalibutan.” Parte naman sa iya mga sumulunod, nagsiling sia: “Kamo indi bahin sang kalibutan.” (Juan 15:19; 17:14) Binagbinaga ang pila ka rason kon ngaa indi dapat mag-entra ang mga Cristiano sa pulitika.

1. Limitado ang ikasarang sang tawo. Ang Biblia nagasiling nga ang tawo wala sing ikasarang ukon kinamatarong sa paggahom sa iya kaugalingon. Si propeta Jeremias nagsiling: “Ang dalanon sang tawo wala sa iya kaugalingon, wala sa tawo nga nagalakat sa pagmando sang iya mga tikang.”—Jeremias 10:23.

Subong nga ang mga tawo wala gintuga para maglupad sa ila kaugalingon lamang nga ikasarang, wala man sila gintuga para gamhan ang ila kaugalingon. Ang historian nga si David Fromkin nagkomento parte sa mga limitasyon sang gobierno: “Ang gobierno ginahuman sang mga tawo; gani pirme ini nagakapaslawan kag wala kapat-uran. May gahom sila, pero limitado lamang.” (The Question of Government) Indi katingalahan nga nagpaandam ang Biblia nga indi kita magsalig sa mga tawo!—Salmo 146:3.

2. Ginaimpluwensiahan sang malaut nga mga espiritu. Sang gintanyagan ni Satanas si Jesus nga mangin gumalahom sang kalibutan, wala niya ginpanghiwala nga may gahom gid man ang Yawa sa paghimo sini. Sang ulihi, gintawag ni Jesus si Satanas nga “ang manuggahom sang kalibutan.” Pagligad sang pila ka tuig, ginlaragway ni Pablo si Satanas subong “dios sining sistema sang mga butang.” (Juan 14:30; 2 Corinto 4:4) Ginsulatan ni Pablo ang iya mga masigka-Cristiano: “Nagapakigdumog kita . . . batok sa mga manuggahom sang kalibutan sining kadudulman, batok sa malaut nga mga puersa nga espiritu sa langitnon nga mga duog.” (Efeso 6:12) Wala nahibaluan sang mga tawo nga ang malaut nga mga espiritu amo ang matuod nga gumalahom sini nga kalibutan. Paano maimpluwensiahan sini nga kamatuoran ang aton pagtamod sa pulitika?

Talupangda ini: Pareho sang gamay nga baruto nga ginaanod sang mabaskog nga sulog, ginabutong man sang gamhanan nga malaut nga mga espiritu ang pulitikal nga sistema. Kag pareho sang mga mananagat sa sina nga baruto nga gamay lang ang mahimo para mabatuan ang sulog, gamay man ang mahimo sang mga pulitiko agod mabatuan ang impluwensia sang gamhanan  nga mga espiritu. Gusto gid sining malaut nga mga espiritu nga patalangon ang mga tawo kag magtuga sing “kailo sa duta.” (Bugna 12:12) Gani, ang matuod nga pagbag-o mahimo lamang sang isa ka persona nga mas gamhanan kay Satanas kag sa iya mga demonyo. Ina nga Persona amo mismo si Jehova nga Dios. *—Salmo 83:18; Jeremias 10:7, 10.

3. Ang matuod nga mga Cristiano nagadampig lamang sa Ginharian sang Dios. Nahibaluan ni Jesus kag sang iya mga disipulo nga sa ginpat-od nga tion, magatukod mismo ang Dios sang isa ka gobierno sa langit nga magagahom sa bilog nga duta. Ginatawag ini sang Biblia nga Ginharian sang Dios kag ginapahayag nga si Jesucristo ang gintangdo nga Hari. (Bugna 11:15) Bangod apektado sini nga Ginharian ang tanan nga tawo, ginhimo ni Jesus nga panguna nga topiko sang iya mga panudlo “ang maayong balita sang ginharian sang Dios.” (Lucas 4:43) Gintudluan man niya ang iya mga disipulo nga mangamuyo: “Magkari ang imo ginharian.” Ngaa? Bangod paagi sa sina nga Ginharian, pat-od nga matuman ang kabubut-on sang Dios sa langit kag sa duta.—Mateo 6:9, 10.

Ano naman ang matabo sa mga gobierno sang tawo? Ang Biblia nagasiling nga ang gobierno “sang bug-os napuy-an nga duta” malaglag. (Bugna 16:14; 19:19-21) Kon ang isa nagapati gid nga laglagon sang Ginharian sang Dios ang tanan nga gobierno sang tawo, dapat lang nga indi niya pagsuportahan ini nga mga gobierno. Kay kon suportahan niya ini, mangin kaaway sia sang Dios.

Kon ang matuod nga mga Cristiano wala nagaentra sa pulitika, buot bala silingon nga indi sila interesado nga pauswagon ang ila komunidad? Binagbinaga ang sabat sa masunod nga artikulo.

[Nota]

[Blurb sa pahina 7]

Ginasuportahan sang mga Saksi ni Jehova ang Ginharian sang Dios, indi ang pulitika