“Ini Nagakahulugan sang Kabuhi nga Walay Katapusan”

“Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”—JUAN 17:3.

ANG ihibalo makaluwas sang kabuhi. Sang ginlupot ang 10 pa lang ka bulan nga si Nouhou, nahibaluan na sang iya iloy nga isa ka health worker sa ila lugar sa Niger kon ano ang himuon. Gintimpla niya ang kalamay, asin, kag matinlo nga tubig para ipainom sa iya bata. Suno sa UNICEF, “natapna dayon ang lupot sang iya bata kay maabtik niya nga ginbulong ini kag may ihibalo sia.”

Ang ihibalo sa Biblia makaluwas man sang kabuhi. Ang una nga manunulat sang Biblia nga si Moises nagsiling: “Ini indi butang nga walay pulus sa inyo, bangud nga kabuhi ninyo ini, kag paagi sining butang palawigon ninyo ang inyo mga adlaw.” (Deuteronomio 32:47) Mapalawig gid bala sang Biblia ang aton kabuhi? Sa ano nga paagi nga nagakahulugan ini sang aton kabuhi?

Ginpakita sang nagligad nga lima ka artikulo nga ang Biblia isa ka libro nga indi matupungan sa pagkamasaligan sang tagna sini, pagkasibu sa kasaysayan kag siensia, paghisantuanay, kag sa praktikal nga giya sini. Ginapakita sini nga pinasahi gid ang Biblia. Gani kon nagapangangkon ini nga nagatudlo kon paano maglawig ang kabuhi—kabuhi nga wala sing katapusan—indi bala nga mas maayo kon usisaon mo gid ini?

Ginapalig-on ka namon nga tun-an kon paano ang sibu nga ihibalo sa Biblia makahatag sing kalinong sa hunahuna subong kag kalipay sa palaabuton. Malipay ang mga Saksi ni Jehova nga ipakita sa imo kon paano matigayon ini nga ihibalo.

[Kahon/Retrato sa pahina 9]

Pinasahi man ang Biblia kay amo lamang ini ang makasabat sang aton importante nga mga pamangkot:

• Ngaa ari kita diri?

• Ngaa grabe gid ang pag-antos?

• Ano ang paglaum sang napatay ko nga mga hinigugma?

Makita mo ang sabat sang Biblia sa sini nga mga pamangkot sa sini nga libro, Ano Gid ang Ginatudlo Sang Biblia?, nga ginhimo sang mga Saksi ni Jehova.