Nagahisanto nga mga Libro

“Ang tagna wala mag-abot paagi sa kabubut-on sang tawo, kundi ang mga tawo nagpamulong gikan sa Dios samtang ginatuytuyan sila sang balaan nga espiritu.”—2 PEDRO 1:21.

ANO ANG KINALAIN SANG BIBLIA? Bisan ang mga rekord sadto nga dungan nga ginsulat wala nagahisantuanay. Ilabi na gid ang mga libro nga ginsulat sang lainlain nga tawo, sa lainlain nga lugar, kag sa lainlain nga tion. Pero ang Biblia nagapangangkon nga ang tanan nga 66 ka libro sini may isa lang ka Awtor, amo nga nagaugyunay ang mensahe sini.—2 Timoteo 3:16.

HALIMBAWA: Ang manugbantay sang karnero sang ika-16 nga siglo B.C.E. nga si Moises, nagsulat sa una nga libro sang Biblia nga ang “binhi” magaabot para luwason ang katawhan. Ini nga libro nagtagna sang ulihi nga ang binhi magahalin sa kaliwat nanday Abraham, Isaac, kag Jacob. (Genesis 3:15; 22:17, 18; 26:24; 28:14, NW) Pagligad sang mga 500 ka tuig, ginpahibalo ni propeta Natan nga ining binhi magahalin sa linya ni Hari David. (2 Samuel 7:12) Isa ka libo ka tuig sang ulihi, ginpaathag ni apostol Pablo nga ang binhi amo si Jesus upod ang isa ka grupo sang iya pinili nga mga sumulunod. (Roma 1:1-4; Galacia 3:16, 29) Sang ulihi, sang katapusan sang unang siglo C.E., ang katapusan nga libro sang Biblia nagtagna nga ang mga miembro sang binhi magapanaksi kay Jesus sa duta, pagabanhawon sa langit, kag magagahom upod sa iya sa sulod sang 1,000 ka tuig. Ining natingob nga binhi magalaglag sa Yawa kag magaluwas sa katawhan.—Bugna 12:17; 20:6-10.

ANG GINASILING SANG MGA KOMENTARISTA SANG BIBLIA: Pagkatapos nga mausisa sing maayo ang 66 ka libro sang Biblia, si Louis Gaussen nagsulat nga nakibot gid sia sa “makahalawhaw nga paghiusa sini nga libro, nga ginsulat sa sulod sang 1,500 ka tuig sang madamo nga awtor, . . . nga nagtinguha nga maghimo sing pareho nga tulumuron kag lab-uton ini, bisan pa wala nila ini mahangpan sing bug-os, nga amo ang kasaysayan sang pagluwas sa kalibutan paagi sa Anak sang Dios.”—Theopneusty—The Plenary Inspiration of the Holy Scriptures.

ANO SA BANTA MO? Mapaabot mo bala nga maghisantuanay ang libro nga ginsulat sang mga 40 ka tawo sa sulod sang sobra 1,500 ka tuig? Ukon pinasahi gid ang Biblia?

[Blurb sa pahina 7]

“Kon tingbon ini nga mga sinulatan, nagahuman ini sang isa ka libro . . . Wala gid sang literatura nga kaanggid ukon makatupong sa sini.”—THE PROBLEM OF THE OLD TESTAMENT, NI JAMES ORR