Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ngaa ginhatagan sang Dios sing ngalan ang iya kaugalingon?

Mahimo nga gusto mo gid nga tawgon ka sa imo personal nga ngalan sangsa titulo lang, pareho sang “lalaki,” “mister,” “madam,” ukon “babayi.” Ang ngalan nagapakilala sa imo subong indibiduwal. Ang Dios gintawag sa mga titulo pareho sang “GINOONG Dios,” “Dios nga Makaako,” kag “Manunuga.” (Genesis 15:2; 17:1; Manugwali 12:1) Pero ginhatagan man niya ang iya kaugalingon sing ngalan para makatigayon kita sing personal nga kaangtanan sa iya. Ang ngalan sang Dios amo si Jehova. *—Basaha ang Isaias 42:8.

Bisan pa gin-islan sang mga translator sang Biblia ang ngalan sang Dios sang mga termino pareho sang “Dios” kag “Ginuo,” ina nga ngalan makita sing mga 7,000 ka beses sa Hebreo nga mga manuskrito sang Biblia sadto. Ginapakita sini nga gusto gid sang Dios nga makilala ang iya ngalan.—Basaha ang Isaias 12:4.

2. Ngaa importante nga mahibaluan ang ngalan sang Dios?

Ang paghibalo sa ngalan sang Dios indi lamang paghibalo kon paano ini mitlangon kundi nagakahulugan ini nga dapat may suod ka nga kaangtanan sa iya. Ang ngalan nga Jehova nagakahulugan sing “Sia nga Nagapahanabo nga Mangin Amo.” Nagapasalig ini nga himuon sang Dios ang bisan ano nga kinahanglanon para matuman ang iya katuyuan. Gani, ang paghibalo sang ngalan sang Dios nagakahulugan nga nagapati ang isa nga tumanon sang Dios ang iya mga promisa. (Salmo 9:10) Ang mga tawo nga nakahibalo kag nagagamit sang ngalan sang Dios nagasalig kag nagauna sa iya sa ila kabuhi. Ini sila protektahan ni Jehova nga Dios.—Basaha ang Salmo 91:14.

 3. Ngaa gusto sang Dios nga makilala ang iya ngalan?

Gusto sang Dios nga makilala sang mga tawo ang iya ngalan para makabenepisyo sila. Makabulig ini sa ila nga mangin abyan sang Dios, kag may paglaum sila nga mabuhi sing wala katapusan. Indi katingalahan nga luyag gid ni Jehova nga ipakilala ang iya ngalan!—Basaha ang Juan 17:3; Roma 10:13, 14.

Ginpakilala ni Jesus ang ngalan sang Dios paagi sa pagtudlo sa mga tawo sang mga dalanon, kasuguan, kag mga promisa sang Dios. Subong, ini nga hilikuton nga pagpakilala sang ngalan sang Dios sa tanan nga pungsod ginapadayon sang mga sumulunod ni Jesus. Ginahimo nila ini bilang nahiusa nga ‘katawhan para sa ngalan sang Dios.’—Basaha ang Binuhatan 15:14; Juan 17:26.

4. Paano himayaon sang Dios ang iya ngalan?

Gusto ni Jehova nga Dios nga himayaon ang iya ngalan kay ginpakahuy-an ini. Halimbawa, ang iban nga tawo nagasiling nga wala niya gintuga ang kabuhi kag indi kinahanglan nga tumanon naton sia. Ang iban naman nagasiling nga wala sia nagaulikid sa aton kag sia ang nagapaantos sa aton. Ini nga mga tawo nagapakahuya sa ngalan sang Dios. Pero indi nila ini mahimo asta san-o. Laglagon sang Dios ang mga nagapakahuya sa iya ngalan.—Basaha ang Salmo 83:17, 18.

Himayaon ni Jehova ang iya ngalan kon tapuson na sang iya Ginharian ang tanan nga gobierno sang tawo kag ibalik ang kalinong kag seguridad. (Daniel 2:44) Sa indi madugay, makilala na sang tanan nga si Jehova amo ang matuod nga Dios.—Basaha ang Ezequiel 36:23; Mateo 6:9.

Ano ang dapat mo himuon? Mangin suod sa Dios paagi sa pagtuon sa iya Pulong kag pagpakig-upod sa mga tawo nga nagahigugma sa iya. Kon himayaon na ni Jehova ang iya ngalan, dumdumon niya ang iya matutom nga mga alagad.—Malaquias 3:16.

Para sa dugang nga impormasyon, basaha ang kapitulo 1 sini nga libro, Ano Gid ang Ginatudlo Sang Biblia?, nga ginhimo sang mga Saksi ni Jehova.

[Nota]

[Retrato sa pahina 16]

Ang ngalan sang Dios sa isa ka Hebreo nga manuskrito sadto