Pareho Lang Bala sa Iban nga Libro?

“Ang pagsulat sa bug-os nga Kasulatan gintuytuyan sang Dios kag mapuslanon . . . , agod ang tawo sang Dios may ikasarang gid, kag nasangkapan sing bug-os para sa tagsa ka maayong buhat.”—2 TIMOTEO 3:16, 17.

INDI tanan ugyon sa ginasiling sini nga teksto sa Biblia. Kamusta sa imo bahin? Diin sa masunod ang pareho sang imo pagtamod sa Biblia?

• Isa ka maayo nga literatura

• Isa sa importante nga balaan nga mga libro

• Isa ka libro sang mga leyenda nga may moral nga mga leksion

• Ang Pulong sang Dios

Ang isa pa gid ka pamangkot amo, Importante bala kon ano ang imo ginapatihan? Binagbinaga ang ginasiling sang Biblia: “Ang tanan nga butang nga ginsulat sadto ginsulat sa pagtudlo sa aton, agod paagi sa aton pagbatas kag paagi sa lugpay gikan sa Kasulatan makatigayon kita sang paglaum.” (Roma 15:4) Gani nagapangangkon ang Biblia nga gindesinyo ini para magtudlo, magpaumpaw, kag maghatag sing paglaum sa aton.

Pero kon ang Biblia isa lamang ka literatura ukon isa sang balaan nga mga libro, saligan mo bala ini sa pagtudlo kag pagtuytoy sa imo pamilya, ilabi na kon ang mensahe sini tuhay sa imo ginapatihan nga maayo? Kon ang Biblia mga mito lamang, malipay ka bala kag magalaum sa mga promisa sini?

Sa pihak nga bahin, kumbinsido ang minilyon nga nagatuon sang Biblia nga amo gid ini ang Pulong sang Dios. Ngaa? Ano ang kinalain sang Biblia sa iban nga libro? Palihug hibalua ang lima ka pinasahi nga kaundan sang Biblia sa masunod nga mga artikulo.