Praktikal Subong

“Ang imo polong suga sa akon mga tiil kag kapawa sa akon banas.”—SALMO 119:105.

ANO ANG KINALAIN SANG BIBLIA? Mahimo masiling nga ekselente ang pila ka libro, pero indi gid ini makagiya sa pagkabuhi. Kag ang moderno nga mga manwal subong kinahanglan pirme bag-uhon. Pero ang Biblia nagapangangkon nga “ang tanan nga butang nga ginsulat sadto ginsulat sa pagtudlo sa aton.”—Roma 15:4.

HALIMBAWA: Bisan pa indi ini libro sa medisina, ang Biblia may praktikal nga mga suhestyon sa maayo nga emosyon kag panglawas. Halimbawa, nagasiling ini nga “ang malinong nga tagiposoon amo ang kabuhi sang unud.” (Hulubaton 14:30) Ang Biblia nagapaandam man: “Ang nagapain sang iya kaugalingon nagapangita sang iya kaugalingon nga handum kag nagapakig-away sa tanan nga maayo nga kaalam.” (Hulubaton 18:1) Pero nagasiling man ini nga “may kapin nga kalipay sa paghatag sangsa pagbaton.”—Binuhatan 20:35.

ANG GINAPAKITA SANG MGA RESEARCH: Ang pagkakalmado, mabakod nga pag-abyanay, kag kaalwan makapaayo sa panglawas. Ang The Journal of the American Medical Association nagreport: “Ang mga maakigon doble ang risgo nga maistrok sangsa mga nagapugong sang ila kaakig.” Nasapwan sa napulo ka tuig nga pagtuon sa Australia nga ang mga tigulang nga “madamo sing mga abyan kag pirme may ginatuaran” mas malawig sing kabuhi. Kag sang 2008, natun-an sang mga researcher sa Canada kag Estados Unidos nga “ang paggasto para sa iban mas makapahalipay sangsa paggasto para sa kaugalingon.”

ANO SA BANTA MO? May masaligan ka pa bala nga libro parte sa panglawas nga ginsulat sing mga 2,000 ka tuig ang nagligad? Ukon pinasahi gid ang Biblia?

[Blurb sa pahina 8]

“Nanamian gid ako sa Biblia . . . bangod sa ekselente nga impormasyon sini parte sa medisina.”—HOWARD KELLY, M.D., ISA SANG MGA NAGTUKOD SANG THE JOHNS HOPKINS UNIVERSITY SCHOOL OF MEDICINE