Tagna—Nagakatuman Tanan

“Gintuman sang GINOO nga inyo Dios ang tanan nga maayo nga mga butang nga iya ginpromisa sa inyo. Wala gid sing bisan isa nga wala natuman.”—JOSUE 23:14, Ang Pulong sang Dios, APD.

ANO ANG KINALAIN SANG BIBLIA? Ang mga orakulo sadto indi gid masaligan, kag amo man ang mga horoscope subong. Ang futurology base sa nagakatabo mismo kag talagsa lang ini nagahatag sing detalye sa ginatagna sini nga matabo sing ginatos pa ka tuig sa ulihi. Sa kabaliskaran, ang mga tagna sang Biblia detalyado kag pirme nagakatuman, bisan pa nga ini ginhambal “kutub sa dumaan nga mga tion sang mga butang nga wala pa mahimo.”—Isaias 46:10.

HALIMBAWA: Sang ikan-um nga siglo B.C.E., nakita ni propeta Daniel paagi sa isa ka palanan-awon ang tagna parte sa madasig nga pagpierde sang Gresya sa Medo-Persia. Gintagna man sini nga pagkatapos ‘magbakud’ ang nagdaug nga hari sang Gresya, ‘mapungal’ ang iya ginharian. Sin-o ang mabulos sa iya? Si Daniel nagsulat: “Ang apat ka ginharian magatindug gikan sa pungsud, apang indi sa kusug niya.”—Daniel 8:5-8, 20-22.

ANG GINASILING SANG MGA HISTORIAN: Mga 200 ka tuig pagkatapos sang panahon ni Daniel, nangin hari sang Gresya si Alejandro nga Daku. Sa sulod sang napulo ka tuig, nadaug niya ang Emperyo sang Medo-Persia kag nakalab-ut ang iya paggahom sa Indus River (sa Pakistan subong). Pero gulpi lang sia napatay sa edad nga 32. Sang ulihi, narumpag ang iya emperyo sa inaway malapit sa Ipsus sa Asia Minor. Gintunga sang apat ka heneral nga nagdaug sa inaway ang Emperyo sang Gresya. Pero wala sa ila sing nakatupong sa gahom ni Alejandro.

ANO SA BANTA MO? May iban pa bala nga libro nga natuman ang tanan nga tagna sini? Ukon pinasahi gid ang Biblia?

[Blurb sa pahina 4]

“Ang mga tagna sang Biblia . . . puerte kadamo amo nga imposible nga natabuan lang ang mga katumanan sini.”—A LAWYER EXAMINES THE BIBLE, NI IRWIN H. LINTON

[Picture Credit Line sa pahina 4]

© Robert Harding Picture Library/SuperStock