Ang Biblia Nagapabag-o sang Kabuhi

ANO ang nakabulig sa isa ka babayi nga taga-Pilipinas nga mauntatan ang pagpahubog kag mangin maayo ang pagkabuhi sang iya pamilya? Ngaa ang isa ka karatidor nga taga-Australia nangin mahidaiton nga ministro sang relihion? Basaha ang ila ginasiling.

“Ang Pagbag-o Indi Madali.”—CARMEN ALEGRE

NATAWO: 1949

PUNGSOD: PILIPINAS

KABUHI SANG UNA: PALAHUBOG

ANG AKON NAGLIGAD: Natawo ako sa San Fernando, isa ka banwa sa probinsia sang Camarines Sur. Pero sa Antipolo, probinsia sang Rizal na ako nagtener. Nahamtang sa nabukid kag hilamunon nga lugar nga may kakahuyan, ang Antipolo isa ka malinong nga banwa sang una ko nga pagsaylo diri. Malaka ka lang makakita sang nagalakat kon gab-i. Pero subong, isa na ini ka daku nga siudad nga madamo sing populasyon.

Pagligad sang pila ka tion sang pagsaylo ko sa Antipolo, nakilala ko si Benjamin kag sang ulihi nagpakasal kami. Kabudlay gali mangabuhi. Para malimtan ko ang akon mga problema, nagpahubog ako. Naglain ang akon batasan, kag makita ini sa pagtratar ko sa akon bana kag kabataan. Dali ako maakig kag malip-ot ang akon pasensia sa ila. Wala ko ginataha ang akon bana. Indi malipayon ang amon pamilya.

KON PAANO GINBAG-O SANG BIBLIA ANG AKON KABUHI: Ang magulang nga babayi sang akon bana, nga si Editha, isa sang mga Saksi ni Jehova. Ginpalig-on niya kami ni Benjamin nga magtuon sa Biblia sa mga Saksi. Ginbaton namon ang tanyag kag nagalaum kami nga makabulig ini para mangin maayo ang amon pamilya.

Samtang nagatuon kami, natun-an namon ang madamo nga kamatuoran. Natandog gid ako sa ginasiling sang Bugna 21:4. Parte sa mga magaistar sa paraiso sa duta sa palaabuton sa idalom sang Ginharian sang Dios, ini nagasiling nga “pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” Gusto ko nga malakip sa mga tawo nga magabaton sini nga mga pagpakamaayo.

Narealisar ko nga kinahanglan ako maghimo sang pila ka dalagku nga pagbag-o sa akon paggawi kag batasan. Ang pagbag-o indi madali, pero amat-amat ko nga nauntatan ang pagpahubog. Natun-an ko man nga mangin mainayuhon kag mapinasensiahon sa akon pamilya. Dugang pa, natun-an ko nga tahaon ang akon bana kag magkooperar sa iya pagpanguna sa amon pamilya.

 Sang nagtambong kami ni Benjamin sa mga pagtilipon sang mga Saksi ni Jehova, nagdayaw gid kami sa amon nakita. Ang mga Saksi wala nagapanahor, wala nagapahubog, kag wala sing ginapaboran. Ginapakig-angutan nila ang tanan nga may dignidad kag pagtahod. Nakumbinsi kami nga nakita na namon ang matuod nga relihion.—Juan 13:34, 35.

MGA BENEPISYO: Nangin maayo ang pagkabuhi sang amon pamilya. Malipayon kami ni Benjamin sa amon pag-asawahay, kag nalipay kami magtudlo sa iban parte sa Biblia. Ang amon duha ka bata kag ang ila mga asawa nagtuon man sa Biblia. Nagalaum kami nga makaupod namon sila sa pag-alagad kay Jehova. Amo gid ini ang pinakamaayo nga paagi sang pagkabuhi.

“Pamatyag Ko Wala sing Makapierde sa Akon.”—MICHAEL BLUNSDEN

NATAWO: 1967

PUNGSOD: AUSTRALIA

KABUHI SANG UNA: KARATIDOR

ANG AKON NAGLIGAD: Nagdaku ako sa Albury, isa ka matahom kag mainuswagon nga siudad sa New South Wales. Ang Albury kilala nga malinong istaran. Pero pareho sa kalabanan nga siudad, may mga krimen man diri.

Nagdaku ako nga may masulhay nga kabuhi. Bisan pa nagbulagay ang akon mga ginikanan sang siete anyos pa lang ako, ginsiguro nila nga maamanan kami nga mag-ulutod sang amon kinahanglanon. Nakaeskwela ako sa pinakamaayo nga pribado nga eskwelahan sa amon lugar. Gusto ni Tatay nga mangin negosyante ako pagkagradweyt ko. Pero mas interesado ako sa sports, kag nangin maayo ako sa cycling kag karate. Nagtrabaho lang ako sa isa ka talyer amo nga madamo ako sing tion nga magamit sa hilig ko nga mga sport.

Ginpabugal ko ang maayo ko nga lawas. Kon kaisa, pamatyag ko wala sing makapierde sa akon. Puede ko gamiton ang akon kusog para daugdaugon ang iban. Pero nahibaluan ini sang akon master sa karate, gani gintudluan niya ako sang disiplina sa kaugalingon kag maayo nga pagbinatasan. Pirme niya ginapadaku nga importante ang pagkamasinulundon kag pagkamainunungon.

KON PAANO GINBAG-O SANG BIBLIA ANG AKON KABUHI: Sang nagtuon ako sa Biblia, natun-an ko nga ginadumtan ni Jehova ang kasingki. (Salmo 11:5) Sang primero, nagpangatarungan ako nga ang karate indi masingki kundi isa ka sport nga indi makahalalit. Sa pamatyag ko ang karate nagapasanyog sang maayo nga pamatasan kag mataas nga talaksan nga nahisuno gid sa ginatudlo sang Biblia. Ang mag-asawa nga Saksi nga nagatudlo sa akon mapinasensiahon gid. Wala nila ako ginsilingan nga untatan ang karate. Padayon lang nila ako nga ginatudluan sang kamatuoran sa Biblia.

 Samtang nagadamo ang akon nahibaluan sa Biblia kag nangin suod ang akon relasyon kay Jehova, nagbag-o ang akon pagtamod sa mga butang. Nagdayaw gid ako sa akon natun-an parte sa halimbawa nga ginpakita sang Anak ni Jehova nga si Jesus. Bisan pa gamhanan gid si Jesus, wala niya gingamit ang iya gahom para sakiton ang iban. Ang iya pulong nga narekord sa Mateo 26:52 nagtandog gid sa akon: “Ang tanan nga nagagamit sang espada mapatay paagi sa espada.”

Samtang nagadamo ang akon natun-an parte kay Jehova, nagadalom man ang akon gugma kag pagtahod sa iya. Makatalandog gid mahibaluan nga nagaulikid sa akon ang aton Manunuga nga tuman kaalam kag gamhanan. Natandog gid ako nga mahibaluan nga bisan ginapaslaw ko si Jehova ukon gusto ko na mangampo, indi gid niya ako pagpabay-an basta nagapaninguha lang ako. Napalig-on gid ako sa iya promisa: “Ako si Jehova nga imo Dios nagauyat sa imo tuo nga kamot kag nagasiling sa imo, ‘Indi ka mahadlok. Buligan ko ikaw.’” (Isaias 41:13, NW) Sang narealisar ko nga ginapakitaan ako sing amo sina nga sahi sang gugma, indi ko gusto nga buy-an ini.

Nakahibalo ako nga ang pag-untat sa karate amo ang pinakamabudlay himuon. Pero nahibaluan ko man nga makapahalipay ini kay Jehova, kag kumbinsido ako nga ang pag-alagad sa iya takus gid sang sakripisyo. Nakumbinsi ako sang ulihi sang ginbasa ko ang ginhambal ni Jesus sa Mateo 6:24: “Wala sing makapaulipon sa duha ka agalon.” Narealisar ko nga imposible ko maalagad sing bug-os si Jehova samtang padayon ako sa karate, kay mahimo nga mas pasulabihon ko ang karate. Sang ulihi kinahanglan ko na magpili sa duha.

Indi mahapos biyaan ang karate. Galalain ako. Nalipay ako nga napahalipay ko si Jehova, pero nagabatyag man ako nga daw ginatraidoran ko ang akon master sa karate. Ginakabig sang mga karatidor ang pagtraidor bilang indi mapatawad nga sala. Pilion pa gani sang iban nga maghikog sangsa mahuy-an.

Wala ako sing kaisog nga ipaathag sa akon master kon ngaa mahalin ako. Gani, naglakat ako nga wala naglisensia kag wala na nagpakigkomunikar sa iya kag sa iban ko pa nga kaupdanan. Nahibaluan ko nga husto ang ginhimo ko sa pag-untat sa karate, pero daw ginkonsiensia man ako nga wala ko napaathag ang akon bag-o nga mga ginapatihan. Kanugon sang kahigayunan nga wala ko masugid ang akon pagtuo sa iban. Nagbatyag ako nga daw ginpaslaw ko na si Jehova antes ko pa sia maalagad. Ginkonsiensia ako tungod sini. Madamo nga tion nga gusto ko kuntani mangamuyo kay Jehova, pero nagahilibion lang ako.

Siguro may nakita nga maayo si Jehova sa akon kay ginpahulag niya ang mga kauturan sa kongregasyon nga palig-unon ako. Pinasahi gid ang ila gugma, pagpaumpaw, kag pakig-abyan. Nalugpayan man ako sa sugilanon sa Biblia parte kanday David kag Batseba. Bisan pa nakahimo sing serioso nga sala si David, ginpatawad sia ni Jehova sang matuodtuod sia nga naghinulsol. Sang ginpamensaran ko ini nga sugilanon, nabuligan ako sini kon paano tamdon ang akon mga kakulangan.

MGA BENEPISYO: Sang wala pa ako makatuon sa Biblia, kaugalingon ko lang ang ginapensar ko kag wala ako sing labot sa iban. Pero sa bulig ni Jehova kag sang akon matahom nga asawa nga pito ka tuig ko na nga kaupod, nangin mainulikdon na ako sa iban. Ginpakamaayo kami nga matudluan ang iban sa Biblia, lakip ang pila nga may mabudlay nga kahimtangan. Ang kalipay nga makita nga ginabag-o sang gugma ni Jehova ang kabuhi sang iban mas daku pa sangsa kalipay nga maangkon sang isa ka kampeon sa karate.

[Blurb sa pahina 14]

“Makatalandog gid mahibaluan nga nagaulikid sa akon ang aton Manunuga nga tuman kaalam kag gamhanan”

 [Kahon/Retrato sa pahina 15]

“Salamat sa Sining Matahom nga mga Artikulo!”

Nanamian ka bala magbasa sang mga eksperiensia bag-o lang? Duha lamang ini sa sobra 50 ka sugilanon nga ginpagua sa Ang Lalantawan sugod sang Agosto 2008. Ang serye nga “Ang Biblia Nagapabag-o sang Kabuhi” nangin paborito gid sang mga bumalasa. Ngaa?

Ang mga tawo nga ginsambit sa sini nga mga artikulo may lainlain nga ginhalinan. Antes nila matun-an ang parte kay Jehova nga Dios, ang pila madinalag-on pero wala sing matuod nga katuyuan ang ila kabuhi. Ang iban naman nakigbato sa mabudlay nga mga hangkat, pareho sang pagkamaakigon ukon pag-abuso sa droga ukon alkohol. Ang iban nagdaku nga Saksi pero nagbiya sa pagsimba kay Jehova. Tanan ini nga eksperiensia nagapakita nga posible nga maghimo sing mga pagbag-o para mapahalipay ang Dios. Kag may mga benepisyo gid sa paghimo sini. Ano ang epekto sini nga mga sugilanon sa mga bumalasa?

Ang isa ka bumalasa nagpaathag kon paano nakabulig ang artikulo sa Pebrero 1, 2009 sa pila ka priso sa prisuhan para sa mga babayi.

▪ “Madamo nga priso ang natandog sa mga eksperiensia nga ginsambit sa sini nga artikulo,” siling niya. “Epektibo gid ang mga piktyur ‘sadto’ kag ‘subong,’ lakip ang malip-ot nga biograpiya sang tagsa ka ginsambit nga indibiduwal. Madamo nga priso ang pareho man sa ila sang una. Sa tapos mabasa sang duha ka priso ini nga mga sugilanon, nagtuon sila sa Biblia.”—C. W.

Daku man ang epekto sang mga eksperiensia nga ginsambit sa sini nga mga artikulo sa pila ka bumalasa. Halimbawa, ang Abril 1, 2011, nga gua nagsambit sang eksperiensia ni Guadalupe Villarreal, nga nagbiya sang iya imoral nga pagkabuhi para maalagad si Jehova. Talupangda ang duha lang sa madamo nga sulat nga naghalin sa mga bumalasa parte sa iya sugilanon.

▪ “Natandog gid ako sang eksperiensia ni Guadalupe. Makalilipay makita kon paano ang gugma kay Jehova kag sa iya Pulong makapabag-o sing bug-os sa isa ka tawo!”—L. F.

▪ “Sang una ginatinguhaan ko nga isugid sa tanan ang akon ginapatihan, lakip na sa mga agi kag tomboy. Pero sining karon lang daw ginalikawan ko na sila. Ini nga artikulo nakabulig sa akon nga tamdon sila pareho sa pagtamod ni Jehova, nga posible sila mangin alagad niya.”—M. K.

Ang isa pa ka eksperiensia nga nanamian gid sang mga bumalasa amo ang sugilanon ni Victoria Tong, nga naggua sang Agosto 1, 2011. Ginsaysay ni Victoria ang iya masubo nga inagihan. Ginsambit niya nga ginabatuan niya ang balatyagon nga wala sia ginahigugma ni Jehova, bisan tinuig na sia nga nagaalagad sa iya. Kag ginsambit man niya kon ano ang nakabulig sa iya nga batunon ang gugma ni Jehova. Talupangda kon ano ang ginsiling sang mga bumalasa parte sa iya sugilanon.

▪ “Natandog gid ako sang eksperiensia ni Victoria. Madamo man ako sing masubo nga inagihan sa kabuhi. Pirme ko ginabatuan ang negatibo nga panghunahuna, bisan pa madugay na ako nga Saksi. Ang eksperiensia ni Victoria nagpalig-on sa akon nga manikasog pa gid nga batunon nga palangga ako ni Jehova.”—M. M.

▪ “Sang bataon pa ako, ginpakigbatuan ko ang akon pagkaadik sa pornograpiya. Sining karon lang, nagbalik naman ini. Nagpabulig ako sa Cristianong manugdumala, kag amat-amat nga nalandas ko ang akon problema. Ginpasalig nila ako nga ginahigugma kag ginakaluy-an ako sang Dios. Pero kon kaisa, nagabatyag gihapon ako nga wala sing pulos, nga daw indi ako mahimo higugmaon ni Jehova. Nakabulig gid sa akon ang sugilanon ni Victoria. Narealisar ko subong nga kon indi ko mabaton nga mapatawad ako sang Dios, daw pareho lang nga indi bastante ang halad sang iya Anak para mapatawad ang akon mga sala. Gingunting ko ini nga artikulo para mabasa kag mapamalandungan ko kon nagabatyag ako nga wala ako sing pulos. Salamat sa sining matahom nga mga artikulo!”—L. K.