HUO ang sabat. Parte sa iya mga ginakahamut-an, si Jehova nagapromisa: “Patawaron ko ang kalautan nila, kag indi na pagdumdumon ang ila sala.” (Jeremias 31:34) Gani ginapasalig niya kita nga kon nagapatawad sia sa mga mahinulsulon, wala na niya ginadumdom pa ang ila mga sala. Pero buot bala silingon nga indi madumduman sang Manunuga sang tuman kadaku nga uniberso ang mga sala nga iya ginpatawad? Ang pinamulong ni Ezequiel nagapaathag kon paano ginapatawad kag ginakalimtan sang Dios ang mga sala.—Basaha ang Ezequiel 18:19-22.

Paagi kay propeta Ezequiel, ginpahibalo ni Jehova ang paghukom batok sa indi matutom nga Juda kag Jerusalem. Ginsikway sang bilog nga pungsod ang pagsimba kay Jehova kag ginpuno nila ang duta sang kasingki. Gintagna ni Jehova ang kalaglagan sang Jerusalem paagi sa mga Babilonianhon. Bisan pa nga ginhukman sila, may mensahe sang paglaum si Jehova. Puede makapili ang kada isa, pero manabat sila sa ila kaugalingon nga desisyon.—Bersikulo 19, 20.

Pero kamusta kon ang isa magbag-o? Si Jehova nagsiling: “Kon ang malauton magtalikod sa tanan niyang sala nga nahimo kag magbantay sang tanan nakon nga palatukuran kag maghimo sang sono sa kasogoan kag katadlongan, sa pagkamatuud magakabuhi sia; indi sia mapatay.” (Bersikulo 21) Huo, si Jehova “handa sa pagpatawad” sa mahinulsulon nga nagbag-o, kag nagpakita sang matuod nga paghinulsol.—Salmo 86:5.

Kamusta naman ang mga sala nga nahimo niya? “Wala gid sang iya mga paglalis nga nahimo nga dumdumon batok sa iya,” paathag ni Jehova. (Bersikulo 22) Talupangda nga ang mga sala sang mahinulsulon ‘indi pagdumdumon batok sa iya.’ Ngaa importante ini?

Sa Biblia, ang Hebreo nga tinaga nga gintranslate “dumdumon” mahimo nga wala lamang nagakahulugan sing pagdumdom sang nagligad. Parte sa sini nga tinaga, ang isa ka reperensia nagasiling: “Sa masami, nagakahulugan [ini] sang buhat ukon kombinasyon sang mga tinaga nga nagalaragway sang buhat.” Gani, “ang pagdumdom” mahimo nagakahulugan sing “pagbuhat.” Kon magsiling si Jehova nga ang mga sala sang isa nga mahinulsulon ‘indi pagdumdumon batok sa iya,’ buot Niya silingon nga indi na Niya pagsilutan pa ang isa bangod sang iya nahimo nga mga sala, subong sang pagsukna ukon pagsilot sa iya. *

Ang mga pulong sa Ezequiel 18:21, 22 nagapakita kon paano nagapatawad sing bug-os si Jehova. Kon nagapatawad sia, indi na niya ini pag-ungkaton pa. Sa baylo, ginakalimtan na niya ang mga sala sang mga mahinulsulon. (Isaias 38:17) Daw pareho lang nga ginapanas niya ang ila mga sala.—Binuhatan 3:19.

Bangod indi kita perpekto, kinahanglan naton ang kaluoy sang Dios kay pirme kita nagakasala. (Roma 3:23) Pero gusto ni Jehova nga mahibaluan naton nga kon maghinulsol gid kita, handa sia magpatawad sa aton. Kag kon magpatawad sia, ginakalimtan niya ini, buot silingon indi na niya pag-ungkaton pa ang aton mga sala para suknaan ukon silutan kita. Makapaumpaw gid ini! Wala ka bala napahulag sang kaluoy sang Dios nga mangin suod sa iya?

Bahin sang Biblia nga Mahimo Basahon sa Hulyo:

▪ Ezequiel 6-20

[Nota]