Mangin Suod sa Manugpamati sang Pangamuyo

MADAMO nga nagapangangkon nga nagapati sa Dios ang indi makapaathag kon ngaa may pagtuo sila. Indi man nila mapaathag kon ngaa ang relihion amo sa masami ang ginabangdan sang kalainan ukon ngaa ginatugutan sang Dios ang pag-antos. Basta nagapangamuyo lang sila sa isa ka Dios nga indi nila kilala.

Pero puede ka mangin suod sa Dios. Mapabakod mo ang imo pagtuo paagi sa pagkilala sa Dios amo nga mahigugma mo sia kag mapabaloran. Ang matuod nga pagtuo nabase sa ebidensia. (Hebreo 11:1) Kon matun-an mo ang kamatuoran parte sa Dios, makilala mo sia kag makapakig-abyan ka sa iya. Binagbinaga ang eksperiensia sang pila nga nagpangamuyo bisan nagaduhaduha sila sa pagluntad sang Dios.

▪ Si Patricia nga ginsambit sa una nga artikulo. “Isa ka adlaw, kaupod ko ang mga napulo ko ka abyan, kag ginaistoryahan nila ang parte sa relihion. Ginsugiran ko sila nga naghalin ako sa balay para indi ko mabatian ang pag-istoryahanay ni Tatay, nga isa ka atiesta, kag sang isa ka Saksi ni Jehova nga nagapamalaybalay. ‘Basi husto ang mga Saksi ni Jehova,’ siling sang isa ko ka abyan.

“‘Makadto ta bala sa ila mga miting para mabal-an ta,’ siling pa sang isa. Kag amo gid sini ang amon ginhimo. Bisan pa nga nagapangduhaduha kami, ang pila sa amon nagpadayon sa pagkadto kay mainabyanon gid ang mga Saksi.

“Pero isa ka Domingo, may nabatian ako nga nagpabag-o sang akon pagtamod. Ginpaathag sang humalambal kon ngaa nagaantos ang mga tawo. Wala ko pa gid anay nahibaluan nga gintuga gali nga perpekto ang tawo kag nga ang sala kag kamatayon nagsugod sa isa ka tawo kag dayon naglapnag sa tanan. Ginpaathag man niya kon ngaa importante ang kamatayon ni Jesus para mapanumbalik sa mga tawo ang gindula sang una nga tawo. * (Roma 5:12, 18, 19) Nahangpan ko dayon ang tanan. ‘May Dios gid gali nga nagaulikid sa aton,’ pensar ko. Nagpadayon  ako sa pagtuon sa Biblia kag sang ulihi, sa una nga tion sa akon kabuhi, makapangamuyo na ako sa isa nga nagaluntad.”

▪ Si Allan nga ginsambit man sa una nga artikulo. “Isa ka adlaw, nagkadto ang mga Saksi ni Jehova sa balay, kag ginpasulod sila sang akon asawa kay interesado sia sa ila ginasiling parte sa pagkabuhi sing wala katapusan sa duta. Nainit ako. Gani ginpakadto ko ang akon asawa sa kusina kag ginsilingan, ‘Indi ka magpatunto ha. Indi na ’ya mapatihan!’

“‘Ti, kadtui ’to ’bi sila kag pamatud-i nga sala ang ila ginahambal,’ sabat niya.

“Siempre, indi ko ini mapamatud-an. Pero kabuot gid sa ila kag ginhatagan ako sang libro parte sa kon bala ang kabuhi gintuga ukon paagi sa ebolusyon. Maathag gid ang mga argumento sini kag puno sing mga ebidensia amo nga namat-od ako nga magtuon sing dugang pa parte sa Dios. Nagtuon ako sa Biblia sa mga Saksi, kag narealisar ko dayon nga tuhay gid ang ila ginatudlo sangsa akon anay ginapatihan parte sa relihion. Samtang nagadamo ang akon natun-an parte kay Jehova, espesipiko na ako nga nagapangamuyo sa iya. May mga batasan ako nga indi maayo, gani nangamuyo ako para buligan niya  nga madula ini. Nabatyagan ko nga ginsabat ni Jehova ang akon mga pangamuyo.”

▪ Si Andrew nga taga-England. “Bisan pa nga ginasuportahan ko gid ang siensia, nagapati lang ako sa teoriya sang ebolusyon kay siling sang iban napamatud-an na ini. Wala na ako nagapati sa Dios bangod sa malain nga mga nagakatabo.

“Pero kon kaisa nagahunahuna ako: ‘Kon may Dios gid man, gusto ko mabal-an kon ngaa nagakatabo ini. Ngaa kadamo gid sang krimen kag inaway?’ Kon may problema ako, nagapangamuyo ako kon kaisa, pero wala ako nakahibalo kon sin-o ang ginapangamuyuan ko.

“Dayon may naghatag sa akon asawa sang tract nga ginhimo sang mga Saksi ni Jehova nga may tig-ulo Ini Bala nga Kalibutan Makalampuwas? Amo gid ina ang pamangkot nga ginapaligban ko. Ang tract nagpahunahuna sa akon parte sa Biblia, ‘Masaligan ayhan ang mga sabat sini?’ Sang ulihi, samtang nagabakasyon ako, ginhatagan ako sang libro nga The Bible—God’s Word or Man’s? * Sang narealisar ko nga nagaugyon gali ang Biblia sa matuod nga siensia, nahunahuna ko nga kinahanglan ko magtuon sing dugang pa parte sa Biblia. Gani sang gintanyagan ako sang isa sa mga Saksi ni Jehova nga magtuon sa Biblia, ginbaton ko ini. Sang nahangpan ko ang mga katuyuan ni Jehova, nakilala ko sia bilang matuod nga persona, isa nga makapangamuyo ako sing hilway.”

▪ Si Jan nga nagdaku nga Protestante sa London. “Bangod sa pagpakunokuno sang relihion kag paglapnag sang pag-antos, nadulaan ako sing gana sa relihion. Nag-untat man ako sa kolehiyo kag nangita sing kuarta paagi sa pagkanta kag paggitara. Diri ko nakilala si Pat. Nagdaku sia nga Katoliko kag nadulaan man sing gana sa relihion.

“Nagpuyo kami sa isa ka balay nga gin-abandona upod sa iban nga nag-untat man eskwela kag interesado sa relihion sang Sidlangan. Asta sa tungang gab-i ang amon binaisay parte sa kahulugan sang kabuhi. Bisan pa wala kami ni Pat nagapati sa Dios, nagapati kami nga may gahom nga nagtuga sang kabuhi.

“Sang magsaylo kami sa naaminhan nga England para mangita sing trabaho bilang musikero, natawo ang amon subang. Isa ka gab-i nagmasakit sia, kag nakapangamuyo ako ahat sa Dios nga wala ko ginapatihan. Sang ulihi, naglas-ay ang amon pagtamdanay ni Pat, kag naglayas kami sang akon subang. Nangamuyo ako liwat para buligan ako, engkaso nga may nagapamati gid man. Wala ako kahibalo nga amo man gali sini ang ginhimo ni Pat.

“Pagkahapon, duha ka Saksi ni Jehova ang nanuktok sa puertahan ni Pat kag ginpakita sa iya ang pila ka laygay sa Biblia. Gintawgan niya ako kag ginpamangkot kon gusto ko magtuon sa Biblia upod sa iya kag sa mga Saksi. Natun-an namon sang ulihi nga para mapahalipay ang Dios, dapat kami magpakasal. Daw kabudlay gid ini himuon kay indi maayo ang amon relasyon.

“Gusto namon nga mahibaluan pa gid ang parte sa katumanan sang mga tagna sa Biblia, ang kabangdanan sang pag-antos, kag kon ano gid ang Ginharian sang Dios. Amat-amat namon nga naintiendihan nga nagaulikid gid ang Dios, kag gusto namon nga tumanon ang iya ginasiling. Nagpakasal kami. Nabuligan kami sang Pulong sang Dios sa pagpadaku sang amon tatlo ka bata. Nagapati gid kami nga ginpamatian ni Jehova ang amon mga pangamuyo.”

Usisaa Mismo ang mga Ebidensia

Pareho sa minilyon ka tawo, wala nadaya sang butig nga relihion ang mga ginsambit sa sini nga artikulo. Nahangpan nila kon ngaa ginatugutan sang Dios ang pag-antos. Natalupangdan mo bala nga sila tanan nakumbinsi bangod sang sibu nga paghangop sa Biblia nga nagapamati gid si Jehova sa mga pangamuyo?

Gusto mo bala usisaon ang ebidensia nga may Dios gid man? Nalipay ang mga Saksi ni Jehova sa pagbulig sa imo nga matun-an ang kamatuoran parte kay Jehova kag kon paano ka mangin suod sa ‘Manugpamati sang pangamuyo.’—Salmo 65:2.

[Mga Nota]

[Blurb sa pahina 10]

“Sang nahangpan ko ang mga katuyuan ni Jehova, nakilala ko sia bilang matuod nga persona, isa nga makapangamuyo ako sing hilway”

[Retrato sa pahina 9]

Ang matuod nga pagtuo nabase sa ebidensia kag sa handum nga mahibaluan ang kamatuoran parte sa Dios